రసాయనాలతో నోరూరించే స్వీట్లు.. 17 స్వీట్ షాప్, స్పైసెస్ దుకాణలకు నోటీసులు

తెలంగాణ రాష్ట్ర ఫుడ్ సేఫ్టీ కమిషనర్ ఆదేశాల మేరకు, ఉమ్మడి నల్గొండ, ఖమ్మం జిల్లాల్లో ఆహార భద్రత అధికారులు ఆకస్మిక దాడులు నిర్వహించారు. ఉమ్మడి నల్గొండ జిల్లా జోనల్ అధికారిణి వి. జ్యోతిర్మయి ఆధ్వర్యంలో స్వీట్స్ షాపులు, స్పైసెస్ (మసాలా) తయారీ కేంద్రాలు, రిటైల్ యూనిట్లను లక్ష్యంగా చేసుకుని ఈ స్పెషల్ డ్రైవ్ చేపట్టారు. తనిఖీల్లో భాగంగా అధికారులు అనేక దుకాణాల్లో, తయారీ కేంద్రాల్లో ఫుడ్ సేఫ్టీ నిబంధనల ఉల్లంఘనలను గుర్తించారు.

12 స్వీట్స్ తయారీ కేంద్రాల వంటగదులు పూర్తిగా అపరిశుభ్రంగా ఉన్నట్లు గుర్తించారు. అలాగే, స్వీట్స్ తయారీలో హానికర రసాయనాలతో కూడిన రంగులను ఉపయోగించినట్లు తేలింది.

ఆహార పదార్థాలను తయారు చేసే సిబ్బంది (ఫుడ్ హ్యాండ్లర్స్) ఎవరూ హెయిర్ క్యాప్‌లు, గ్లౌజులు ధరించకపోవడం గమనార్హం.

పసుపు, కారం, ఇతర మసాలా పొడులను ప్రాసెస్ చేసే కేంద్రాల్లో పురుగులతో, నాణ్యత లోపించిన ముడి సరుకులు ఉపయోగించినట్లు అధికారులు గుర్తించారు. అంతేకాకుండా, తయారీ కేంద్రాల్లోని గోడలు, పైకప్పులపై నూనెతో కూడిన దుమ్ముధూళి పేరుకుపోయి కనిపించింది.

అధికారులు మొబైల్ ఫుడ్ టెస్టింగ్ ల్యాబ్‌ను ఉపయోగించి 12 స్వీట్స్ తయారీ కేంద్రాలలో, 7 స్పైసెస్ తయారీ, రిటైల్ కేంద్రాలలో స్పాట్ టెస్ట్‌లు నిర్వహించారు. నిబంధనలను ఉల్లంఘించినందుకు గాను మొత్తం 17 స్వీట్ షాప్, స్పైసెస్ దుకాణదారులకు నోటీసులు జారీ చేశారు. 48 కిలోల స్వీట్లు హానికర రంగులతో చేసినవి గుర్తించారు.తయారీలో కాలం చెల్లిన ఆహార పదార్థాలు, 5 కిలోల పురుగులు పట్టిన ధనియా పొడిని అక్కడికక్కడే ధ్వంసం చేశారు. సుమారు 90 కిలోల లేబుల్ లేనటువంటి ఆహార పదార్థాలను, 50 కిలోల పురుగులతో కూడిన మైదా పిండిని సీజ్ చేశారు. మొత్తం 27 అనుమానిత శాంపిల్స్‌ను మరింత పరీక్ష నిమిత్తం ల్యాబ్‌కు పంపించారు.

ల్యాబ్ నివేదిక ఆధారంగా ఆహార కల్తీ అని నిర్ధారణ అయితే, చట్టరీత్యా కఠిన చర్యలు తీసుకుంటామని జోనల్ అధికారిణి వి. జ్యోతిర్మయి హెచ్చరించారు. ఆహార కల్తీకి పాల్పడిన వారు ఎంతటి వారినైనా ఉపేక్షించేది లేదని, ఆహార భద్రతా నిబంధనలు పాటించని పక్షంలో కఠిన చర్యలు తప్పవని ఆమె వ్యాపారులను హెచ్చరించారు. భవిష్యత్తులో కూడా ఇలాంటి స్పెషల్ డ్రైవ్స్ తరచూ నిర్వహించబడుతాయని ఆమె స్పష్టం చేశారు.