కాచిగూడ పేరు వెనుక ఇంట్రెస్టింగ్ స్టోరీ

హైదరాబాద్‌ నగరంలోని ప్రతిష్టాత్మక ప్రదేశాలు, ప్రాంతాల వెనుక ఆసక్తికరమైన చారిత్రక నేపథ్యం దాగి ఉంది. ముఖ్యంగా.. నగరంలో అత్యంత రద్దీగా ఉండే వాణిజ్య, రవాణా కేంద్రాలలో ఒకటైన కాచిగూడ రైల్వే స్టేషన్ భవనం కేవలం నిర్మాణ అద్భుతమే కాదు.. దాని పేరు వెనుక ఒక సామాజిక వర్గం చరిత్ర ముడిపడి ఉంది.

కాచిగూడ నామకరణ చరిత్ర..

కాచిగూడ అనే పేరు 'కాచి' అనే సామాజిక వర్గం పేరు నుంచి ఉద్భవించింది. శతాబ్దాల క్రితం, ఉత్తర భారతదేశంలోని బుందేల్‌ఖండ్‌ ప్రాంతానికి చెందిన కాచి కులస్థులు మొఘల్ చక్రవర్తి ఔరంగజేబు గోల్కొండ కోటపై దండయాత్రకు వచ్చినప్పుడు అతని సైన్యంలో సైనికులుగా పాల్గొన్నారు.

దండయాత్రలో విజయం సాధించిన తర్వాత.. ఈ కాచి కుటుంబాలలో కొంతమంది నగరంలోనే కార్వాన్ రాంసింగ్‌పుర ప్రాంతంలో స్థిరపడ్డారు. 1916వ సంవత్సరంలో ఏడో నిజాం మీర్ ఉస్మాన్ అలీ ఖాన్ అక్కడ రైల్వే స్టేషన్ భవన నిర్మాణం చేపట్టారు. ఆ సమయంలో సుమారు 300 కాచి కుటుంబాలు ఈ నిర్మాణ పనుల్లో పాలుపంచుకున్నాయి. వారి పనితీరుకు, సేవలకు సంతృప్తి చెందిన నిజాం, మూసీ నది తీరప్రాంత భూములను వారికి ఇనాంగా ఇచ్చి.. ఆ ప్రాంతానికి వారి సామాజిక వర్గం పేరిట 'కాచిగూడ' అని పేరు పెట్టినట్లు సమాచారం.

తదనంతర కాలంలో ఈ కాచి కుటుంబాలు కూరగాయలు, పండ్లు, ధాన్యాలను పండించి చార్మినార్ ప్రాంతంలో విక్రయించేవారని చారిత్రక కథనాలు చెబుతున్నాయి. కాచిగూడ లాగే హైదరాబాద్, సికింద్రాబాద్ నగరాల పేర్ల వెనుక కూడా చారిత్రక వ్యక్తుల పేర్లు, ఘట్టాలు ఉన్నాయి. హైదరాబాద్ నగరం పేరు నగర స్థాపకుడు అయిన మహ్మద్ కులీ కుతుబ్ షా ప్రియమైన భార్య భాగమతికి ఇచ్చిన బిరుదు 'హైదర్ మహల్' పేరు మీద వచ్చినట్లు ప్రసిద్ధి. కాలక్రమేణా ఇది హైదరాబాద్‌గా స్థిరపడింది. ఈ విధంగా హైదరాబాద్ నగరంలోని ప్రాంతాల పేర్లు కేవలం భౌగోళిక గుర్తింపు మాత్రమే కాక.. ఆయా ప్రాంతాల చరిత్ర, సంస్కృతి.. పాలనా నేపథ్యాన్ని ప్రతిబింబిస్తాయి.