ఆసియాలోనే టాప్ షాపింగ్ స్ట్రీట్స్ హైదరాబాద్‌లో ఇదే

అత్యంత వేగంగా అభివృద్ధి చెందుతూ ప్రపంచ దృష్టిని ఆకర్షిస్తున్న హైదరాబాద్.. మరో రికార్డ్ సాధించింది. ఆసియాలోనే టాప్ షాపింగ్ స్ట్రీ‌ట్స్లు ఉన్న నగరంగా హైదరాబాద్‌ ఘనత సాధించింది. "కుష్మాన్, వేక్‌ఫీల్డ్ మెయిన్ స్ట్రీట్స్ అక్రాస్ ది వరల్డ్ 2025" నివేదికలో.. ఆసియా పసిఫిక్ ప్రాంతానికి చెందిన 50 వ్యాల్యుబుల్ షాపింగ్ స్ట్రీట్స్‌లో హైదరాబాద్‌లోని బంజారాహిల్స్, హిమాయత్‌నగర్ స్ట్రీట్స్‌కు చోటు దక్కింది. లగ్జరీ, రిటైల్ షాపింగ్‌కు కేంద్రాలుగా పేరుగాంచి.. ప్రపంచంలోని ప్రధాన స్ట్రీట్‌ల జాబితాలో చేరడం విశేషం.

"కుష్మాన్, వేక్‌ఫీల్డ్ మెయిన్ స్ట్రీట్స్ అక్రాస్ ది వరల్డ్ 2025 నివేదిక" ప్రకారం మొదటి రెండు స్థానాల్లో చైనాలోని రెండు స్ట్రీట్‌లు ఉన్నాయి. 24 స్థానంలో ఢిల్లీలోని ఖాన్ మార్కెట్, 26 స్థానంలో ఢిల్లీ కన్నాట్ ప్లేస్, గురుగ్రామ్ గలేరియా మార్కెట్ ఉన్నాయి. ఢిల్లీతో పాటు ముంబై, బెంగళూరు, కోల్‌కతా, పుణె వంటి నగరాల్లోని స్ట్రీట్‌లు కూడా ఈ జాబితాలో చోటు దక్కించుకున్నాయి. హైదరాబాద్‌లోని బంజారాహిల్స్, హిమాయత్‌నగర్ స్ట్రీట్స్‌ రెండూ.. 48వ స్థానంలో నిలిచాయి. చెన్నైలోని పాండి బజార్, అన్నా నగర్ 50, 51 స్థానాల్లో నిలిచాయి.

కాగా, ఈ జాబితాలో తెలుగు రాష్ట్రాల నుంచి చోటు దక్కించుకున్న ఏకైక నగరంగా హైదరాబాద్ ఉండటం గమార్హం. కాగా, బంజారాహిల్స్‌లో షాపు అద్దె స్క్వేర్ ఫీట్‌కు రూ. 2680 చొప్పున ఉంది. ప్రశాంతమైన వాతావరణంతో కూడిన బంజారాహిల్స్.. చాలా కాలంగా ప్రీమియం రిటైల్ షాపింగ్‌కు ప్రసిద్ధి. ఇక్కడ బోటిక్‌లు, కేఫ్‌లు, ఫ్లాగ్‌షిప్ స్టోర్‌లు, క్యూరేటెడ్ డిజైనర్ స్పేస్‌లు ఉన్నాయి. లగ్జరీ, లైఫ్‌స్టైల్, కస్టమర్ బేస్ బ్రాండ్‌లకు అట్రాక్టివ్ డెస్టినేషన్గా ఈ స్ట్రీట్‌ నిలుస్తోంది.

దీనికి విరుద్ధంగా సరసమైన ధరలతో హిమాయత్‌నగర్‌‌లో అందుబాటు ధరల్లో వస్తువులు లభిస్తాయి. రిటైల్ బ్రాండ్లు కోరుకునే ప్రజలకు.. సరసమైన ధరల్లో జ్యువెల్లరీ షాప్‌లు, బేకరీలు, బుక్ స్టాల్స్, స్టేషనరీ షాపులకు ఈ స్ట్రీట్ ప్రసిద్ధి. ఇక్కడికి సామాన్యుల నుంచి సెలబ్రిటీల వరకు వివిధ వర్గాల ప్రజలు వస్తారు. ఎప్పుడూ ఇక్కడికి వచ్చి షాపింగ్ చేసే లాయల్ కస్టమర్లు కూడా ఉంటారు. అందుకే షాపింగ్ డెస్టినేషన్‌గా హిమాయత్ నగర్ స్ట్రీట్ ఉంది.

ర్యాంకింగ్ ఎలా ఇస్తారు..

కుష్మాన్ అండ్ వేక్‌ఫీల్డ్ వార్షిక నివేదికలో ప్రపంచవ్యాప్తంగా ఉన్న ప్రధాన హై-స్ట్రీట్ రిటైల్ ప్రాంతాలను పరిశీలిస్తుంది. ఆయా ప్రాంతాల్లో అద్దె ఎంత ఉంది, బ్రాండ్ ఆసక్తి, వినియోగదారుల రద్దీ, కస్టమర్ల ప్రవర్తనపై దృష్టి సారిస్తుంది. ఈ నివేదికలో చోటు సంపాదించడం అంటే.. హైదరాబాద్‌లో రిటైల్ మార్కెట్ మరింత విస్తరిస్తుందనే సంకేతమే కాకుండా.. ప్రపంచవ్యాప్తంగా నగరాలతో పోటీ పడుతోందని సూచిస్తోంది. బంజారాహిల్స్, హిమాయత్ నగర్ వంటి స్ట్రీట్స్‌కు తాజాగా వచ్చిన గుర్తింపు.. మునుపటి కంటే మరింత వేగంగా అభివృద్ధి చెందుతున్నాయనడానికి సంకేతం.