కాచిగూడలోని ఓ ఇంట్లో అగ్నిప్రమాదం....చిన్నారి మృతి

హైదరాబాద్ నగరంలోని కాచిగూడ పోలీస్ స్టేషన్ పరిధిలో ఉన్న సుందర్ నగర్‌లో శుక్రవారం మధ్యాహ్నం పెను విషాదం చోటుచేసుకుంది. ఒక నివాస గృహంలో ఎయిర్ కండిషనర్ పేలడంతో జరిగిన అగ్నిప్రమాదంలో ఐదేళ్ల చిన్నారి సజీవ దహనమవ్వగా.. మరొక బాలుడు ప్రాణాపాయ స్థితిలో ఆసుపత్రిలో చికిత్స పొందుతున్నాడు. ప్రాథమిక వివరాల ప్రకారం.. సుందర్ నగర్‌లోని ఒక ఇంట్లో మధ్యాహ్నం సమయంలో పిల్లలు గదిలో ఉన్నారు.

ఆ సమయంలో ఏసీలో ఒక్కసారిగా విద్యుత్ షార్ట్ సర్క్యూట్ సంభవించి అది పేలిపోయింది. మంటలు క్షణాల్లో గది మొత్తం వ్యాపించాయి. ఏసీ నుంచి వెలువడిన దట్టమైన విషపూరిత పొగ గదిని చుట్టుముట్టడంతో పిల్లలు బయటకు వచ్చే అవకాశం లేకపోయింది. లోపల పొగ కారణంగా ఊపిరాడక ఐదేళ్ల చిన్నారి అక్కడిక్కడే ప్రాణాలు కోల్పోయారు. మంటల్లో చిక్కుకున్న మరో బాలుడిని స్థానికులు సాహసించి బయటకు తీశారు. ప్రస్తుతం ఆ బాలుడి పరిస్థితి విషమంగా ఉన్నట్లు వైద్యులు తెలుపుతున్నారు.

ఇటీవల కాలంలో నగరంలో ఏసీల వల్ల జరుగుతున్న ప్రమాదాలు ఆందోళన కలిగిస్తున్నాయి. ఇలాంటి ఘటనలు పునరావృతం కాకుండా ఉండటానికి నిపుణులు కొన్ని సూచనలు చేస్తున్నారు. ఏసీలను గంటల తరబడి ఏకధాటిగా నడపకూడదు. కంప్రెసర్ వేడెక్కడం వల్ల పేలుళ్లు సంభవించే అవకాశం ఉంటుంది. ప్రతి 4-5 గంటల వాడకం తర్వాత కొంత సమయం విరామం ఇవ్వడం మంచిది.

విద్యుత్ సరఫరాలో ఒడిదుడుకులు ఉన్నప్పుడు ఏసీలు దెబ్బతినే అవకాశం ఉంది. నాణ్యమైన స్టెబిలైజర్ వాడటం వల్ల షార్ట్ సర్క్యూట్ ముప్పును చాలా వరకు తగ్గించవచ్చు. ఏసీలోని గ్యాస్ లీక్ అవుతున్నప్పుడు ఒక రకమైన వాసన వస్తుంది. అలాంటప్పుడు వెంటనే ఏసీని ఆపివేసి టెక్నీషియన్‌తో తనిఖీ చేయించాలి. గ్యాస్ లీకేజీలు అగ్నిప్రమాదాలకు ప్రధాన కారణమవుతాయి. ఇలాంటి జాగ్రత్తలు తీసుకుంటే.. అగ్ని ప్రమాదాల నుంచి తప్పించేకోవచ్చు అని నిపుణులు చెబుతున్నారు.

ఇదిలా ఉండగా.. మేడ్చల్ మల్కాజిగిరి జిల్లా అన్నోజిగూడ వద్ద పెను ప్రమాదం తృటిలో తప్పింది. శుక్రవారం హైదరాబాద్-వరంగల్ రహదారిపై ప్రయాణిస్తున్న ఒక వ్యాన్‌లో ఒక్కసారిగా మంటలు చెలరేగాయి. డ్రైవర్ నియంత్రణ కోల్పోవడంతో మంటలతో ఉన్న ఆ వాహనం నేరుగా పక్కనే ఉన్న భారత్ పెట్రోల్ బంక్‌లోకి దూసుకెళ్లింది. ఇది గమనించిన బంక్ సిబ్బంది వెంటనే అప్రమత్తమై మంటలను అదుపు చేయడంతో భారీ పేలుడు తప్పింది. ఈ ఘటనలో వ్యాన్ పూర్తిగా కాలిపోయినప్పటికీ.. ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు. సమాచారం అందుకున్న పోలీసులు, అగ్నిమాపక సిబ్బంది ఘటనా స్థలానికి చేరుకుని ప్రమాదానికి గల కారణాలపై దర్యాప్తు చేస్తున్నారు.