జాతీయ, అంతర్జాతీయ స్థాయిలో,,,హైదరాబాద్ యువతికి పురస్కారాలు

హైదరాబాద్‌కు చెందిన మిథాలీ అగర్వాల్ (కావ్య) జాతీయ స్థాయిలో గొప్ప గుర్తింపు సాధించారు. జైపూర్‌లోని జైబాఘ్ ప్యాలెస్‌లో ఇటీవల జరిగిన ప్రతిష్ఠాత్మక మిసెస్ ఇండియా 2025 పోటీల్లో ఆమె రెండు ప్రధాన బిరుదులను గెలుచుకున్నారు. డిసెంబర్ 18 నుంచి 22 వరకు జరిగిన ఈ పోటీలలో మిథాలీ తన ప్రతిభతో మిసెస్ ఇండియా 2025 గ్లోబల్ అంబాసిడర్ మరియు మిసెస్ ఇండియా కన్జీనియాలిటీ 2025 అవార్డులను కైవసం చేసుకున్నారు.

మిథాలీ అగర్వాల్ స్వస్థలం మధ్యప్రదేశ్‌లోని హర్దా జిల్లా హృద్యా నగరి గ్రామం. ప్రస్తుతం ఆమె హైదరాబాద్‌ను తన నివాసంగా మార్చుకున్నారు. ఆమె నేపథ్యం ఇంజినీరింగ్ అయినప్పటికీ.. కమ్యూనికేషన్ రంగంపై ఉన్న మక్కువతో ఆ దిశగా అడుగులు వేశారు. గతంలో ఆమె ఐఐటీ హైదరాబాద్‌లో పబ్లిక్ రిలేషన్స్ ఆఫీసర్‌గా(PRO) పనిచేసి.. సంస్థ ప్రతిష్టను పెంచడంలో కీలక పాత్ర పోషించారు.

ఆమె కమ్యూనికేషన్ నైపుణ్యాలకు గుర్తింపుగా ఇప్పటికే పలు జాతీయ, అంతర్జాతీయ పురస్కారాలు లభించాయి. ముఖ్యంగా కార్పొరేట్ కమ్యూనికేషన్ విభాగంలో 'డైనమిక్ వుమన్ లీడర్‌షిప్ అవార్డు' ఆమె ప్రతిభకు నిదర్శనం. కేవలం అందాల పోటీలకే పరిమితం కాకుండా.. సమాజానికి ఏదైనా చేయాలనే తపన మిథాలీలో మెండుగా ఉంది. ఆమె EcoMiTz (ఎకోమిట్జ్) అనే సంస్థను స్థాపించి, పర్యావరణ పరిరక్షణపై ప్రజల్లో అవగాహన కల్పిస్తున్నారు. ప్లాస్టిక్ రహిత సమాజం, ప్రకృతిని కాపాడుకోవాల్సిన అవసరంపై ఆమె నిరంతరం కృషి చేస్తున్నారు.

అంతేకాకుండా.. మహిళల ఆరోగ్యం, గౌరవం విషయంలో కూడా ఆమె చురుగ్గా పనిచేస్తున్నారు. ప్యాడ్ కేర్ సంస్థకు గుడ్‌విల్ మిత్రగా ఉంటూ.. నెలసరి సమయంలో తీసుకోవాల్సిన జాగ్రత్తలు.. మహిళల పరిశుభ్రతపై మారుమూల ప్రాంతాల్లో అవగాహన కల్పిస్తున్నారు. ఈ సామాజిక సృహే ఆమెను అందాల పోటీల్లో ఇతర అభ్యర్థుల కంటే ముందు వరుసలో నిలబెట్టింది. మిసెస్ ఇండియా పోటీల్లో గ్లోబల్ అంబాసిడర్ బిరుదు పొందడం అంటే అది కేవలం ఒక కిరీటం మాత్రమే కాదు.. ప్రపంచవ్యాప్తంగా భారతీయ మహిళల ప్రతిభను, సంస్కృతిని చాటిచెప్పే బాధ్యత.

ఈ హోదాలో మిథాలీ అంతర్జాతీయ వేదికలపై భారతదేశానికి ప్రాతినిధ్యం వహిస్తారు. వైవాహిక జీవితం తర్వాత కూడా మహిళలు తమ కలలను ఎలా సాకారం చేసుకోవచ్చో చెప్పడానికి ఆమె ఒక ఉదాహరణగా నిలుస్తారు. మరోవైపు 'కన్జీనియాలిటీ' బిరుదు ఆమె వ్యక్తిత్వాన్ని ప్రతిబింబిస్తుంది. తోటి పోటీదారులతో స్నేహపూర్వకంగా ఉంటూ.. అందరినీ కలుపుకుపోయే గుణం ఉన్నవారికి ఈ గౌరవం దక్కుతుంది. ఒక వైపు వృత్తిని, మరోవైపు సామాజిక సేవను సమన్వయం చేసుకుంటూ సాగుతున్న మిథాలీ ప్రయాణం ఎంతో మంది మహిళలకు స్ఫూర్తిదాయకం.