వాహనదారులకు బిగ్ అలర్ట్.... పోలీసుల వార్నింగ్

ట్రాఫిక్ చలాన్లు పడకుండా కొందరు అనేక రకాల ప్రయత్నాలు చేస్తారు. బండికి నంబర్ ప్లేటు లేకుండా రోడ్లపై ప్రయాణించడం, ఉన్న నంబర్ ప్లేట్ కనిపించకుండా ఉండేందుకు వాటికి మాస్క్‌లు ఉంచడం, ఏదైనా ఒక గుడ్డ ముక్కను కట్టడం, బాగా దుమ్ము పట్టి కనిపించకుండా ఉండేలా జాగ్రత్తలు పడతారు. హెల్మెట్, బండి పత్రాలు, రాంగ్ రూట్, ట్రిపుల్ రైడింగ్ వంటి ట్రాఫిక్ ఉల్లంఘనలకు పాల్పడుతూ.. ట్రాఫిక్ పోలీసులు ఫోటోలు తీయకుండా ఉండేందుకు.. నంబర్ ప్లేట్లకు అడ్డుగా చేతులు, కాళ్లు పెట్టి రయ్యిమని దూసుకెళ్తూ ఉంటారు. అయితే ట్రాఫిక్ రూల్స్ ఉల్లంఘించడం ఒక తప్పు అయితే.. వాటిని దాచేందుకు చేసేది మరింత పెద్ద తప్పు అని ఎప్పటికప్పుడు ట్రాఫిక్ పోలీసులు వార్నింగ్‌లు ఇస్తూనే ఉంటారు. ఈ నేపథ్యంలోనే తాజాగా ఓ సంఘటన జరగ్గా.. పోలీసులు మరోసారి వాహనదారులను అలర్ట్ చేశారు.

హైదరాబాద్ నగరంలో వాహనాలు నడిపే వ్యక్తులు ఎవరైనా ట్రాఫిక్ రూల్స్ పాటించకపోతే.. వారిపై మోటార్ వాహనాల చట్టం ప్రకారం కేసులు నమోదు చేస్తామని.. హైదరాబాద్ సిటీ ట్రాఫిక్ పోలీస్ జాయింట్ కమిషనర్ జోయల్ డేవిస్ వార్నింగ్ ఇచ్చారు. అదే సమయంలో నంబర్ ప్లేట్లను ట్యాంపరింగ్ చేసే వారి పైన కఠిన చర్యలకు ఉపక్రమిస్తామని వెల్లడించారు. నంబర్ ప్లేట్లను మార్చేయడం, ట్యాంపరింగ్ చేయడం వంటివి చాలా తీవ్ర నేరాలు అని అలాంటి వాహనదారులపై క్రిమినల్ కేసులు పెడతామని పేర్కొన్నారు.

అయితే ఇటీవల ఓ వ్యక్తి నంబర్ ప్లేట్‌ను మార్చేసి హైదరాబాద్ నగరంలో దర్జాగా తిరుగుతున్న ఓ వ్యక్తిని పట్టుకున్న ఘటన తీవ్ర చర్చనీయాంశంగా మారింది. ఆ వ్యక్తి తన బండికి తన నంబర్ ప్లేట్ కాకుండా.. వేరే బండికి సంబంధించిన నంబర్ ప్లేట్ పెట్టుకుని తిరుగుతుండగా చాదర్‌ఘాట్ పోలీసులు అరెస్ట్ చేశారు. ఇలాంటి ఘటనలకు పాల్పడితే వారిపై క్రిమినల్ కేసులు తప్పవని జోయల్ డేవిస్ హెచ్చరించారు. మలక్‌పేటకు చెందిన సయ్యద్ అలీ ఉద్దీన్ అనే వ్యక్తి తన స్కూటీకి తన నంబర్ ప్లేట్ కాకుండా.. వేరే స్కూటీ నంబర్ ప్లేట్ వేసుకుని తిరుగుతున్నట్లు గుర్తించినట్లు చెప్పారు.

TS 11 EZ 2936 బండి నంబర్ కలిగిన వ్యక్తి.. దానికి బదులు TS 11 EZ 2836 నంబర్ ప్లేట్ తగిలించుకుని తిరుగుతున్నట్లు సీపీ తెలిపారు. అయితే TS 11 EZ 2936 నంబర్ ప్లేట్ కలిగిన అసలైన ఓనర్ ఫహీమ్ అలీ.. తాను ఎలాంటి ట్రాఫిక్ ఉల్లంఘనలకు పాల్పడకపోయినా.. తన బండిపై వరుసగా ట్రాఫిక్ చలాన్లు పడుతున్నాయని గుర్తించాడు. దీంతో వెంటనే అతడు ట్రాఫిక్ పోలీసులకు ఫిర్యాదు చేశాడు. అది చెక్ చేయగా.. అసలు మోసం వెలుగులోకి వచ్చింది.

ఇక ఆ నకిలీ నంబర్ ప్లేట్ వేసుకున్న వ్యక్తి చేసిన పనికి దాని అసలు ఓనర్ అయిన ఫహీమ్ అలీ బండిపై ఏకంగా 23 ట్రాఫిక్ చలాన్లు పడినట్లు పోలీసులు గుర్తించారు. ఇలా నంబర్ ప్లేట్ ట్యాంపరింగ్‌కు పాల్పడిన వ్యక్తిపై కేసు నమోదు చేసినట్లు పోలీసులు వెల్లడించారు. ఇలా నంబర్ ప్లేట్ ట్యాంపరింగ్ చేసే వారిని టెక్నాలజీ ఉపయోగించి సులభంగా గుర్తిస్తున్నట్లు సీపీ జోయల్ డేవిస్ స్పష్టం చేశారు.