వక్ఫ్ దావా వేస్తే.. అయ్యప్ప శబరిగిరి వదిలి వెళ్లాల్సిందే.. బీజేపీ నేత వివాదాస్పద వ్యాఖ్యలు

కేరళలోని శబరిమల అయ్యప్ప ఆలయ భూములపై బీజేపీ సీనియర్ నేత వివాదాస్పద వ్యాఖ్యలు చేశారు. వావర్‌ స్వామి భూముల మీద ‘వక్ఫ్‌’ దావా వేస్తే, అయ్యప్పస్వామి పవిత్రమైన శబరిగిరిని వదిలి వెళ్లాల్సి వస్తుందని బీజేపీ కె. గోపాలకృష్ణన్‌ అన్నారు. స్థలపురాణం ప్రకారం.. ముస్లిం అయిన ‘వావర్‌’.. అయ్యప్పస్వామికి స్నేహితుడు. అందుకే శబరిమలకు వెళ్లే అయ్యప్ప భక్తులు.. మార్గమధ్యంలోని ఏరుమేలిలో ఆగి అక్కడ డప్పు వాయిద్యాలతో డ్యాన్సులు చేస్తూ వావర్‌ స్వామి మందిరాన్ని దర్శించుకుంటారు.

వయనాడ్‌ లోక్‌సభ ఉప ఎన్నికల్లో బీజేపీ అభ్యర్థిగా పోటీచేస్తోన్న నవ్య హరిదాసుకు మద్దతుగా గోపాలకృష్ణన్‌ శనివారం ప్రచారం నిర్వహించారు. ఈ సందర్భంగా ఆయన ప్రసంగిస్తూ కేంద్రం తెచ్చిన వక్ఫ్‌ సవరణ బిల్లును ప్రస్తావించారు. శబరిమల భూముల గురించి ఆయన అర్దంలేని ఉదాహరణ ఇస్తూ... అయ్యప్ప భూములు తనవేనంటూ రేపటిరోజు ‘వావర్‌’ కూడా చెప్పవచ్చని, దీన్ని అనుమతిద్దామా? అని ప్రశ్నించారు.

‘శబరిమల అయ్యప్పస్వామి పావన పదునెట్టాంబడి కింద కూర్చున్న వ్యక్తి వావర్.. రేపొద్దున్న ఆ భూములు వావర్ అని అని దావా వేస్తే వక్ఫ్ పరిధిలోకి శబరిమల వెళ్తుంది.. దీంతో అయ్యప్పస్వామి తప్పనిసరి పరిస్థితుల్లో శబరిగిరి దిగిపోవాల్సిందే.. దీన్ని మనం అనుమతిస్తామా’ అని గోపాలకృష్ణన్‌ చేసిన వ్యాఖ్యలపై దుమారం రేగుతోంది. అలాగే, తమిళనాడులోని ప్రముఖ క్రైస్తవ స్థలం వేళాంగిణి మాత చర్చి గురించి కూడా ఆయన మాట్లాడారు. రేప్పొద్దున్న అది కూడా వక్ఫ్ ఆస్తిని అంటే దాన్ని అంగీకరిస్తామా? అని ప్రశ్నించారు. ఇటువంటివి నిరోధించడానికి వక్ఫ్ సవరణ బిల్లును కేంద్రంలోని మోదీ సర్కారు తీసుకొచ్చిందని చెప్పారు.

వక్ఫ్ (సవరణ) బిల్లు, 2024పై అధికార ఎల్‌డిఎఫ్, ప్రతిపక్ష యుడిఎఫ్ వైఖరిపై కేరళలో గణనీయమైన సంఖ్యలో క్రైస్తవ జనాభాలో వ్యక్తమవుతోన్న వ్యతిరేకత మధ్య బీజేపీ నేత వివాదాస్పద వ్యాఖ్యలు చేయడం గమనార్హం. ప్రస్తుత వక్ఫ్ చట్టంలోని సవరణ బిల్లును వ్యతిరేకిస్తూ కాంగ్రెస్ నేతృత్వంలోని యూడిఎఫ్, సీపీఐ (ఎం) నేతృత్వంలోని అధికార ఎల్‌డిఎఫ్ ఇటీవల రాష్ట్ర అసెంబ్లీలో ఏకగ్రీవంగా తీర్మానం చేశాయి.

ఎర్నాకుళం జిల్లాలోని చెరై, మునంబమ్ గ్రామాలలో తరతరాలుగా క్రైస్తవ కుటుంబాలకు చెందిన అనేక ఆస్తులను ప్రస్తుత చట్టం నిబంధనలతో అడ్డగోలుగా వక్ఫ్ బోర్డు స్వాధీనం చేసుకుందని చర్చి ఆరోపించింది. ఎర్నాకుళం జిల్లాలోని చెరై, మునంబం గ్రామాల్లోని ప్రజల వద్ద ఆస్తికి సంబంధించిన పత్రాలు, భూమి పన్ను చెల్లింపుల రశీదులు ఉన్నప్పటికీ, వక్ఫ్ బోర్డు మాత్రం ఆ భూమి తమదేనంటూ వాదిస్తోందని ఆరోపణలు ఉన్నాయి. దీంతో క్రైస్తవులు ఆగ్రహం వ్యక్తం చేస్తున్నారు.