అంగన్వాడీలకు శుభవార్త.. ప్రభుత్వ ఉద్యోగులుగా వర్కర్లు, ఆయాలు

అంగన్వాడీ సిబ్బంది శాశ్వత ప్రభుత్వ ఉద్యోగులుగా గుర్తింపునకు సంబంధించి గుజరాత్ హైకోర్టు చరిత్రాత్మక తీర్పు వెలువరించింది. వారిని శాశ్వత ప్రభుత్వ ఉద్యోగులుగా పరిగణించాలని కేంద్ర, రాష్ట్ర ప్రభుత్వాలను ఆదేశించింది. వారిని ప్రభుత్వ సర్వీసులోకి తీసుకుని, రెగ్యులరైజేషన్‌ ప్రయోజనాలు అందించడానికి ఒక విధానం రూపొందించాలని స్పష్టం చేసింది. గుజరాత్ హైకోర్టు తీర్పుతో దేశవ్యాప్తంగా లక్షల మంది అంగన్వాడీ సిబ్బందికి ప్రయోజనం కలగనుంది. 1983-2010 మధ్య కేంద్ర ప్రభుత్వ సమగ్ర బాలల అభివృద్ధి సేవల (ఐసీడీసీ) పథకం కింద నియమితులైన అంగన్వాడీలు దాఖలు చేసిన పిటిషన్లపై గుజరాత్‌ హైకోర్టు పైవిధంగా తీర్పు ఇచ్చింది.

దేశంలో పౌష్ఠికాహారలోపాన్ని నివారించే చర్యల్లో భాగంగా ఐసీడీసీ పథకం తీసుకొచ్చారు. దీని ద్వారా అంగన్వాడీ కేంద్రాల్లో ఆరేళ్ల లోపు పిల్లలు, గర్భిణీలు, బాలింతలకు పౌష్ఠికాహారం అందజేస్తున్నారు. ఈ కేంద్రాల్లో రోజుకు ఆరు గంటల చొప్పున పదేళ్ల నుంచి పనిచేస్తున్న అంగన్వాడీ కార్యకర్తలు, సహాయకులకు నెలకు రూ.5,000- రూ.10,000 గౌరవ వేతనం ఇచ్చి సరిపెడుతున్న విషయాన్ని పిటిషనర్లు కోర్టు దృష్టికి తీసుకొచ్చారు. కాంట్రాక్ట్ పద్దతిలో నియమితులయ్యే నాలుగో తరగతి ఉద్యోగులకు సైతం రూ.15,000 కనీస వేతన స్కేలును వర్తింపజేస్తున్నారని, వారికన్నా తమకు చాలా తక్కువ జీతాలిస్తున్నారని ఫిర్యాదు చేశారు. రెగ్యులర్ విధానంలో ఎంపిక చేసినా.. తమను ప్రభుత్వ ఉద్యోగులుగా గుర్తించడం లేదని వాపోయారు.

దీనిపై విచారణ చేపట్టిన గుజరాత్‌ హైకోర్టు న్యాయమూర్తి జస్టిస్ నిఖిల్ ఎస్ కరియల్.. అంగన్వాడీ సిబ్బందికి అనుకూలంగా తీర్పు వెలువరించారు. హైకోర్టు వెబ్‌సైట్‌లో తీర్పు ప్రచురితమైన తేదీ నుంచి ఆరు నెలల్లోగా అంగన్వాడీ కార్యకర్తలు, సహాయకులను ప్రభుత్వ సర్వీసులోకి తీసుకునేలా కేంద్ర, రాష్ట్ర ప్రభుత్వాలు సంయుక్తంగా ఒక విధానం రూపొందించాలని ఆదేశించారు. ఆ విధానంలో వేతన స్కేలు, బకాయిల చెల్లింపు గురించి స్పష్టంగా వివరించాలని పేర్కొన్నారు. అంతేకాదు, ఈలోపుగా అంగన్వాడీ కార్యకర్తలను మూడో తరగతి ప్రభుత్వ ఉద్యోగులుగా, అంగన్వాడీ సహాయకులను నాలుగో తరగతి ఉద్యోగులుగా పరిగణించి కనీస వేతన స్కేలు ప్రకారం వారికి జీతభత్యాలు చెల్లించాలని న్యాయమూర్తి ఆదేశించారు.