వైసీపీ బలోపేతంపై జగన్ ఫోకస్.. కొత్త కార్యక్రమానికి టైటిల్ కూడా ఫిక్స్

2024 ఆంధ్రప్రదేశ్ ఎన్నికల్లో ఘోర పరాజయంతో డీలా పడిన కార్యకర్తల్లో ధైర్యం నింపేలా.. వైసీపీ అధినేత వైఎస్ జగన్ మోహన్ రెడ్డి అడుగులు వేస్తున్నారు. నిరుత్సాహంలో ఉన్న కార్యకర్తల్లో భరోసా నింపేందుకు సరికొత్త కార్యక్రమం చేపట్టనున్నారు. పార్టీని గ్రామస్థాయి నుంచి తిరిగి బలోపేతం చేయాలని భావిస్తున్న వైఎస్ జగన్ మోహన్ రెడ్డి.. ఆ క్రమంలోనే సంక్రాంతి నుంచి కొత్త కార్యక్రమం చేపట్టాలని నిర్ణయించుకున్నారు. బుధవారం ప్రకాశం జిల్లా ప్రజాప్రతినిధులతో వైఎస్ జగన్ భేటీ అయ్యారు. ఈ సందర్భంగా పార్టీలో క్రియాశీలక మార్పులకు నాంది పలికినట్లు వైఎస్ జగన్ చెప్పారు. వైసీపీ గ్రామాల్లో బలంగా ఉందని.. అయితే పార్టీ వ్యవస్థీకృత నిర్మాణం కోసం సంక్రాంతి తర్వాత పార్లమెంట్ నియోజకవర్గాలలో పర్యటిస్తానని వైఎస్ జగన్ చెప్పారు,

సంక్రాంతి తర్వాత ప్రతి పార్లమెంట్ నియోజకవర్గంలో పర్యటిస్తానన్న వైఎస్ జగన్ .. కార్యకర్తలతో జగనన్న, పార్టీ బలోపేతానికి దిశానిర్దేశం పేరుతో కార్యక్రమాలు నిర్వహించనున్నట్లు చెప్పారు. సంక్రాంతి తర్వాత ప్రతి వారంలోనూ బుధ, గురువారాల్లో పార్లమెంట్ నియోజకవర్గాలలో పర్యటిస్తానన్న వైఎస్ జగన్.. కార్యకర్తలతో మమేకమై వారి అభిప్రాయాలను తెలుసుకుంటానని చెప్పారు. అవసరమైతే శుక్రవారం కూడా ఉంటానని చెప్పారు. టీడీపీ కూటమి సర్కారుపై ఆరు నెలల్లోనే ప్రజా వ్యతిరేకత మొదలైందన్న జగన్.. ప్రభుత్వ ప్రజా వ్యతిరేక విధానాలపై పోరాటం చేయాలని పార్టీ నేతలకు సూచించారు.

ముఖ్యమంత్రి నారా చంద్రబాబు నాయుడు అబద్ధాలు, కూటమి ప్రభుత్వం మోసాలపై ప్రజలు ఆగ్రహంతో ఉన్నారని... ప్రతి నెలా ఒక్కో అంశాన్ని ముందుకు తెస్తూ డైవర్షన్ పాలిటిక్స్ చేస్తున్నారని ఆరోపించారు. చంద్రబాబు అధికారంలోకి వచ్చిన తర్వాత బాదుడు మొదలైందన్న వైఎస్ జగన్.. కరెంట్ ఛార్జీల పెంచారని ఆరోపించారు. గ్రామీణ రోడ్లపై కూడా ట్యాక్స్‌లు వేసే పరిస్థితి వచ్చిందని మండిపడ్డారు. వైసీపీ హయాంలో నాలుగు పోర్టుల నిర్మాణాన్ని మొదలుపెట్టామని.. ఇప్పుటి సీఎం వాటిని శనక్కాయలకు, బెల్లాలకు అమ్మేస్తున్నారంటూ మండిపడ్డారు. ప్రభుత్వ విధానాల నేపథ్యంలో డిసెంబర్ 13న రైతు సమస్యలపై, డిసెంబర్ 27న కరెంటు ఛార్జీలపైన, అలాగే ఫీజు రియింబర్స్‌మెంట్‌ కోసం జనవరి 3న వైసీపీ కార్యక్రమాలు చేపడుతోందని.. వీటిలో పాల్గొనాలని పిలుపునిచ్చారు.