ప్రభుత్వ పథకంలో లూప్‌హోల్ పట్టుకున్న జంట.. 43 ఏళ్లలో 12 సార్లు పెళ్లి-విడాకులు, కోర్టు షాక్!

సాధారణంగా పెళ్లిళ్లు చేసుకున్న వారు.. వివిధ రకాల కారణాలతో విడాకులు తీసుకోవడం మనం చూస్తూనే ఉన్నాం. అయితే ఈ జంట మాత్రం చాలా కన్నింగ్‌గా ఆలోచించింది. పెళ్లి చేసుకోవడం, విడాకులు తీసుకోవడం.. వారిద్దరికీ అలా అలవాటు అయిపోయింది. ఇలాగే గత 43 ఏళ్లుగా 12 సార్లు పెళ్లిళ్లు చేసుకుని ఆ తర్వాత విడాకులు తీసుకున్నారు. అయితే వీళ్లు ఇలా పెళ్లిళ్లు చేసుకుని.. విడాకులు తీసుకోవడానికి కారణం ఓ ప్రభుత్వ పథకం. ఆ పథకంలో ఉన్న లూప్‌హోల్‌ను ఆధారంగా చేసుకుని.. ఈ భారీ స్కామ్‌కు తెగబడ్డారు. చివరికి అధికారుల చేతికి చిక్కడంతో వారిపై ఫిర్యాదు చేసి అరెస్ట్ చేశారు. ఆస్ట్రియా దేశంలో జరిగిన ఈ సంఘటన ఇప్పుడు తీవ్ర చర్చనీయాంశంగా మారింది.

ఆస్ట్రియా రాజధాని వియన్నాలో జరిగిన ఘటన ఇప్పుడు ఆ దేశంలో సంచలనంగా మారింది. పెళ్లి చేసుకున్న తర్వాత ఏదైనా కారణం వల్ల భార్యాభర్తలు విడాకులు తీసుకుంటే.. అందులో భార్యకు ఆస్ట్రియా ప్రభుత్వం ఏటా 28,300 డాలర్లు.. అంటే మన భారత కరెన్సీలో దాదాపు రూ.24 లక్షల భరణం చెల్లిస్తుంది. అయితే ఇదే వారి స్కామ్‌కు లొసుగు అయింది. ఇలా ఆ 73 ఏళ్ల వృద్ధురాలు.. గత 43 ఏళ్లలో 12 సార్లు తన భర్తను పెళ్లి చేసుకుని.. విడాకులు ఇచ్చి ఏకంగా 3.42 లక్షల డాలర్లు అంటే మన భారత కరెన్సీలో ఏకంగా రూ.3 కోట్ల వరకు అక్రమంగా సంపాదించింది.

ఆ మహిళకు మొదట ఒక పెళ్లి కాగా.. ఆమె భర్త 1981లో చనిపోయాడు. అయితే తన భర్త చనిపోవడంతో ప్రభుత్వం నుంచి ఆర్థిక సహాయం అందుకుంది. ఆ తర్వాత తన కంటే చిన్న వయసు ఉన్న ఓ లారీ డ్రైవర్‌ను రెండో పెళ్లి చేసుకుంది. ఆ తర్వాత.. వారిద్దరి మధ్య మనస్పర్థల వల్ల వారు 6 ఏళ్ల తర్వాత.. 1988లో విడాకులు తీసుకున్నారు. అయితే అప్పుడు ఆమెకు మరోసారి ప్రభుత్వం నుంచి ఆర్థిక సహాయం అందుకుంది. ఈ క్రమంలోనే ఆ తర్వాత వాళ్లు పెళ్లిళ్లు చేసుకోవడం.. కొన్నేళ్లు కాగానే విడాకులు తీసుకోవడం.. మరికొన్ని రోజుల తర్వాత వాళ్లు మళ్లీ పెళ్లిళ్లు చేసుకోవడం పరిపాటిగా మారింది.

అయితే ఈ ప్రభుత్వ సొమ్ము దుర్వినియోగం 2022 మే నెలలో బయటికి వచ్చింది. అప్పటికీ వారు 12వ సార్లు విడాకులు తీసుకున్నారు. ఆ తర్వాత ఆర్థిక సహాయం కోసం పెన్షన్ ఇన్సూరెన్స్ ఇన్‌స్టిట్యూట్‌కు వెళ్లగా.. అధికారులు విచారణ జరపగా.. మొత్తం వ్యవహారం బయటికి వచ్చింది. దీనిపై కేసు నమోదు చేసుకున్న పోలీసులు.. విచారణ జరపగా.. ఆ జంట 3 ఏళ్లకు ఒకసారి విడాకులు తీసుకోవడం.. ఆ వెంటనే మళ్లీ పెళ్లి చేసుకోవడం ఒక అలవాటుగా చేసుకున్నట్లు తేలింది. పదే పదే విడాకులు తీసుకున్నా.. మళ్లీ పెళ్లి చేసుకున్నా వాళ్లు ఒకే ఇంట్లో కలిసి జీవించే వాళ్లని అధికారులు గుర్తించారు. ఈ ఘటనతో అలర్ట్ అయిన ఆస్ట్రియా ప్రభుత్వం.. ఆ లొసుగును గుర్తించి.. కొత్త నిబంధనలు తీసుకువచ్చి పాత చట్టానికి సవరణలు చేసింది.