నిరుద్యోగ యువతకు ఏడాది ట్రైనింగ్, ప్రతి నెలా డబ్బులు

తాము అధికారంలోకి వస్తే నిరుద్యోగ యువతకు 20 లక్షల ఉద్యోగాలు కల్పిస్తామని టీడీపీ కూటమి ఎన్నికల సమయంలో హామీ ఇచ్చిన సంగతి తెలిసిందే. ఈ నేపథ్యంలో రాష్ట్రానికి పెట్టుబడుల ఆకర్షణ ద్వారా నిరుద్యోగులకు ఉద్యోగ అవకాశాలు కల్పించేందుకు ఏపీ ప్రభుత్వం ఓ వైపు చర్యలు తీసుకుంటోంది. మరోవైపు నిరుద్యోగ యువతకు నైపుణ్య శిక్షణ అందించి ఉపాధి, ఉద్యోగ అవకాశాలు కల్పించేందుకు ప్రయత్నాలు మొదలుపెట్టింది. ప్రస్తుత పరిస్థితుల్లో అదనపు నైపుణ్యాలు ఉంటే తప్ప ఉద్యోగాలకు పోటీ పడే అవకాశాలు తక్కువగా ఉన్న నేపథ్యంలో యువతకు ఏపీ ప్రభుత్వం నైపుణ్య శిక్షణ అందిస్తోంది. అందులో భాగంగా అనంతపురం జిల్లాలోని యువతకు నైపుణ్యాలపై శిక్షణ ఇవ్వనున్నారు.

అనంతపురం పట్టణం సహా పురపాలికల్లో పట్టణ పేదరిక నిర్మూలన సంస్థ ద్వారా యువత దరఖాస్తు చేసుకోవడానికి అవకాశం కల్పించారు. ఈ శిక్షణ పొందిన వారికి ఉద్యోగాల దరఖాస్తు, ఇతరత్రా ఖర్చులకు సైతం డబ్బులు అందించనున్నారు. అయితే దరఖాస్తు చేసుకోవడానికి 2021 తర్వాత రెగ్యులర్ విధానంలో డిగ్రీ పూర్తి చేసిన వారు అర్హులు. డ్వాక్రా సంఘాల మహిళల పిల్లలకు ప్రాధాన్యం ఇవ్వనున్నారు. మెప్మా, ఆశా సొసైటీ సహకారంతో దరఖాస్తు చేసుకున్న వారికి ట్రైనింగ్ ఇస్తారు. నేషనల్ అప్రెంటీస్‌షిప్ ట్రైనింగ్ స్కీమ్ (ఎన్‌ఏటీఎస్‌) ద్వారా అభ్యర్థులకు వృత్తి, జీవన నైపుణ్యాలపై ట్రైనింగ్ అందిస్తారు.

అలాగే దరఖాస్తు చేసుకున్న అనంతరం ఎంపికైన యువతకు వారానికి మూడు గంటలు చొప్పున ఏడాది మొత్తంలో 150 గంటలు ఆన్‌లైన్‌లో శిక్షణ అందిస్తారు. అలాగే ఈ ఏడాదిపాటు ప్రతి నెలా రూ.4,500 వారి బ్యాంకు ఖాతాలో జమ చేస్తారు. వీటిలో వేయి రూపాయలు నిర్వహణ ఖర్చుల కింద ఆశా సొసైటీకి చెల్లించాల్సి ఉంటుంది. ట్రైనింగ్ పూర్తి చేసేవారికి కేంద్ర మంత్రిత్వశాఖ, ఎన్‌ఎస్‌డీసీ నుంచి సర్టిఫికేట్లు అందజేస్తారు. మార్చి 20వ తేదీ వరకు నమోదు చేసుకునేందుకు అవకాశం ఉంది. ఆసక్తి, అర్హతలు ఉన్న యువత పదో తరగతి, ఇంటర్మీడియట్, డిగ్రీ సర్టిఫికెట్లతో పాటుగా ఆధార్‌ కార్డు, బ్యాంక్ అకౌంట్, ఫోన్‌ నంబరు, ఈమెయిల్‌ వివరాలతో మెప్మా అధికారులను సంప్రదించాల్సి ఉంటుంది.