ప్రకృతి ప్రకోపానికి విలవిలలాడిన మయన్మార్.. 181 మంది మృతి

వరుస భూకంపాలు మయన్మార్‌ను శుక్రవారం వణికించాయి. 12 నిమిషాల వ్యవధిలోనే రెండు సార్లు మయన్మార్‌లో భారీ భూకంపాలు సంభవించాయి. భూకంప తీవ్తత రిక్టర్‌ స్కేలుపై 7.7గా నమోదైంది. భూకంప కేంద్రం సెంట్రల్‌ మయన్మార్‌లోని మోనివా పట్టణానికి తూర్పు వైపున 50 కిలోమీటర్ల దూరంలో.. 10 కిలోమీటర్ల లోతులో ఉన్నట్లు యూఎస్‌ జియోలాజికల్‌ సర్వే గుర్తించింది. మరోవైపు భూ ప్రకంపనలతో ప్రజలు భయపడిపోయారు. ఇళ్ల నుంచి బయటకు పరుగులు తీశారు. మయన్మార్ ప్రభుత్వం సైతం ఎమర్జెన్సీ ప్రకటించదంటే పరిస్థితి అర్థం చేసుకోవచ్చు. అటు మయన్మార్ భూకంపం కారణంగా థాయ్‌లాండ్‌ రాజధాని బ్యాంకాక్‌లోనూ భూ ప్రకంపనలు వచ్చాయి. బ్యాంకాక్‌లో భూకంపం తీవ్రత రిక్టర్ స్కేలుపై 6.4, 7.3గా నమోదైంది. మయన్మార్ భూకంపం ప్రభావం భారత్‌ సహా ఆగ్నేయాసియా దేశాల్లోనూ కనిపించింది. పలుచోట్ల భూమి కంపించింది.

భూకంపం కారణంగా మయన్మార్‌ రాజధాని నేపిడాలోని వెయ్యి పడకల ఆస్పత్రితో పాటు మాండలే నగరంలోని ఐకానిక్‌ వంతెన కుప్పకూలింది. పలుచోట్ల ఆలయాలు, గోపురాలు నేలమట్టమయ్యాయి. ఇళ్లు, భవనాలు నేలమట్టమయ్యాయి. మయన్మార్ భూకంపంలో ఇప్పటి వరకూ 181 మంది చనిపోయినట్లు తెలిసింది. థాయిలాండ్‌లో ఐదుగురు చనిపోయినట్లు సమాచారం. మయన్మార్‌లో ఈ సంఖ్య మరింత పెరిగే అవకాశం ఉందని అధికారులు చెప్తున్నారు. శిథిలాల కింద చిక్కుకొని వందలాది మంది గాయపడ్డారు. శిథిలాల కింద చిక్కుకున్న వారిని రక్షించేందుకు సహాయక చర్యలను వేగవంతం చేశారు.

మరోవైపు బ్యాంకాక్‌లో నిర్మాణంలో ఉన్న వంతెన కూలిపోయింది. దీంతో 90 మంది గల్లంతైనట్లు థాయ్‌లాండ్‌ రక్షణ మంత్రి ప్రకటించారు. భూకంపం నేపథ్యంలో థాయ్‌లాండ్‌లో అత్యవసర పరిస్థితిని ప్రకటించారు. బ్యాంకాక్‌లో మెట్రో, రైలు సేవలను నిలిపివేశారు. అలాగే బ్యాంకాక్‌లోని ప్రతి భవనాన్ని తనిఖీ చేయాలని అక్కడి ప్రభుత్వం నిర్ణయించింది. భద్రత దృష్ట్యా తనిఖీ చేయాలని థాయ్‌లాండ్‌ ప్రధాని షినవత్ర ఆదేశించారు.

భూకంపంలో గాయపడిన వారికి చికిత్స అందించేందుకు ప్రపంచ ఆరోగ్య సంస్థ ముందుకొచ్చింది. దుబాయిలోని తన లాజిస్టిక్స్‌ హబ్‌ను సిద్ధం చేస్తున్నట్లు డబ్ల్యూహెచ్‌ఓ ప్రకటించింది. ఇక భూకంప ప్రభావిత ప్రాంతాల్లోని దృశ్యాలు కలిచివేస్తున్నాయి. ముఖ్యంగా మయన్మార్‌లోని పలు ప్రాంతాలు మరుభూమిని తలపిస్తున్నాయి. భూకంపంలో సర్వస్వం కోల్పోవటంతో పాటుగా తమ కుటుంబ సభ్యులతోపాటు కోల్పోయి స్థానికులు రోదిస్తున్న దృశ్యాలు అందరినీ కలచివేస్తున్నాయి.