ఎట్టకేలకు ఇన్‌కమ్ ట్యాక్స్ రిటర్న్స్-1, 4 ఫామ్స్ విడుదల

ఆదాయపు పన్ను చెల్లింపుదారుల ఎదురుచూపులకు తెరపడింది. ఎట్టకేలకు ఐటీ రిటర్న్స్ ఫామ్స్ వచ్చేశాయి. కేంద్ర ప్రత్యక్ష పన్నుల బోర్డు తాజాగా ప్రకటన చేసింది. ఇన్‌కమ్ ట్యాక్స్ రిటర్న్ ఫామ్స్ 1, 4 నోటిఫై చేసింది. సాధారణంగా ఎప్పుడైనా ఏప్రిల్ నెల ప్రారంభంలోనే ఈ ఫామ్స్ విడుదల చేస్తారు. కానీ, ఈసారి నెలాఖరు వరకు వేచి చూడాల్సి వచ్చింది. తాజాగా విడుదల చేసిన ఐటీఆర్ ఫామ్స్ గత ఆర్థిక సంవత్సరం 2024-25 (అసెస్మెంట్ ఇయర్ 2025-26)కి వర్తిస్తాయని ఐటీ శాఖ తెలిపింది. అంటే ఏప్రిల్ 1, 2024 నుంచి మార్చి 31, 2025 మధ్య వచ్చిన ఆదాయానికి సంబంధించిన రిటర్న్స్ ఫైల్ చేయాల్సి ఉంటుంది.

ప్రస్తుతం నోటిఫై చేసిన ఐటీఆర్ ఫామ్ -1, 4 ద్వారా ట్యాక్స్ పేయర్లందరూ రిటర్న్స్ ఫైల్ చేయలేరు. ఈ రెండు ఫామ్స్ వారి ఆదాయాన్ని బట్టి కొందరికి మాత్రమే వర్తిస్తాయి. మరిన్ని ఐటీఆర్ ఫామ్స్ నోటిఫై చేయాల్సి ఉంది. ఈసారి ఐటీఆర్ ఫామ్స్‌లో కీలక మార్పులు చేశారు. గతంలో ఐటీఆర్-1 ఫామ్‌లో క్యాపిటల్ గెయిన్ ట్యాక్స్ సంబంధించిన నిబంధనలు లేవు. కానీ, ఈసారి మార్పులు చేశారు. మీకు ఈక్విటీ షేర్లు, ఈక్విటీ సంబంధించిన మ్యూచువల్ ఫండ్స్ విక్రయించడం ద్వారా రూ.1.25 లక్షల వరకు లాంగ్ టర్మ్ క్యాపిటల్ గెయిన్స్ ఉన్నట్లయితే మీరు ఇకపై ఐటీఆర్ ఫామ్ -1 ఉపయోగించి రిటర్న్స్ ఫైల్ చేయాల్సి ఉంటుంది. గతేడాది వరకు క్యాపిటల్ గెయిన్స్ ఉన్న వారు ఐటీఆర్- 1 ఫైల్ చేసేందుకు వీలు లేదు. వారు ఐటీఆర్-2 ఉపయోగించాల్సి వచ్చేది.

 ప్రభుత్వం బుధవారం ఐటీఆర్-1, ఐటీఆర్- 4 ఫామ్స్ విడుదల చేసిన క్రమంలో మిగిలిన ఫామ్స్ సైతం త్వరగానే నోటిఫై చేస్తారని పన్ను నిపుణులు అంచనా వేస్తున్నారు. గత ఆర్థిక సంవత్సరం 2024-25కి సంబంధించి ఐటీఆర్-1 ఫామ్ అనేది రూ.50 లక్షల లోపు ఆదాయం ఉన్న వారు ఉపయోగించాలి. శాలరీ, ఒకే ఇంటి ప్రాపర్టీ ఉన్న వారు ఈ ఫామ్ తీసుకోవాలి. సెక్షన్ 112ఏ కింద రూ.1.25 లక్షల వరకు దీర్ఘకాలిక మూల ధన లాభాలు ఉన్న వారు సైతం ఇక ఫామ్-1 ఉపయోగించాల్సి ఉంటుంది. కానీ, ఇంటి విక్రయం, షార్ట్ టర్మ్ క్యాపిటల్ గెయిన్స్ వంటివి ఉంటే మాత్రం ఐటీఆర్- 1 ఉపయోగించేందుకు లేదు.

ఐటీఆర్-4 ఎవరి కోసం?

వ్యక్తిగత ఆదాయపు పన్ను చెల్లింపుదారులు, హిందూ అవిభాజ్య కుటుంబాలు రూ.50 లక్షల లోపు ఆదాయం ఉండడంతో పాటు బిజినెస్, ప్రోఫొషనల్ ఆదాయు ఉన్న వారు ఫామ్-4 ఉపయోగించాల్సి ఉంటుంది. సెక్షన్ 44ఏడీ, 44ఏడీఏ, 44ఏఈ కింద ఆదాయం వచ్చే వారు ఐటీఆర్-4 ఉపయోగించాలి. అయితే ఏదైనా కంపెనీలో డైరెక్టర్‌గా ఉన్న వారు, అన్‌లిస్టెడ్ కంపెనీ షేర్లలో ఇన్వెస్ట్ చేసిన వారు, వ్యవసాయ ఆదాయం రూ.5 వేలకుపైగా ఉన్నవారు, ఈఎస్ఓపీ ఆదాయం ఉన్నవారు ఈ ఫామ్-4 ఉపయోగించకూడదు.