ఐటీఆర్-3 ఫామ్ ఎవరు ఫైల్ చేయాలి? కొత్త మార్పులు ఏమున్నాయి

 కేంద్ర ప్రత్యక్ష పన్నుల బోర్డు (సీబీడీటీ) మరోసారి కీలక ప్రకటన చేసింది. ఆదాయపు పన్ను రిటర్నులకు సంబంధించిన ఐటీఆర్-3 ఫామ్  నోటిఫై చేసింది. ఇప్పటికే ఐటీఆర్ 1, ఐటీఆర్ 4 ఫామ్స్ ఏప్రిల్ 30వ తేదీనే విడుదల చేసిన సంగతి తెలిసిందే. రెండు రోజుల తర్వాత ఐటీఆర్ 3 ఫామ్ విడుదల చేయడం గమనార్హం. వ్యక్తిగత ఆదాయపు పన్ను చెల్లింపుదారులు తమ ఆదాయాలను బట్టి తమకు ఏ ఫామ్ సరిపోతుందో కచ్చితంగా తెలుసుకోవాలి. మరి తాజాగా నోటిఫై చేసిన ఐటీఆర్-3 ఫామ్ ఫైల్ చేసేందుకు అర్హులు ఎవరు? ఎలాంటి కొత్త మార్పులు ఉన్నాయి అనేది ఈ కథనం ద్వారా తెలుసుకుందాం.

ఐటీఆర్-3 ఫామ్ సాధారణంగా బిజినెస్, ప్రొఫెషన్ ద్వారా ఆదాయం, లాభాలు అందుకునే వ్యక్తిగత ఆదాయపు పన్ను చెల్లింపుదారులు, హిందూ అవిభాజ్య కుటుంబాలు ఉపయోగిస్తుంటారు. గత ఆర్థిక సంవత్సరం 2024-25లో ఏప్రిల్ 1, 2024 నుంచి మార్చి 31, 2025 మధ్య బిజినెస్, వృత్తి పరంగా పరిమితికి మించి ఆదాయాలు ఉన్న వారు ఐటీఆర్-3 ఫామ్ ఫైల్ చేయాల్సి ఉంటుంది. ఐటీఆర్ -3 ఫామ్ లో కీలక మార్పులు చేసినట్లు ఇన్‌కమ్ ట్యాక్స్ విభాగం ప్రకటన చేసింది. ఈ మేరకు సోషల్ మీడియా ఎక్స్ వేదికగా ఓ పోస్ట్ చేసింది.

' ట్యాక్స్ పేయర్లకు అలర్ట్. సీబీడీటీ ఐటీఆర్ ఫామ్ 3ని నోటిఫై చేసింది. ఏప్రిల్ 30వ తేదీనే నోటీఫికేషన్ జారీ చేసింది. కీలక అప్డేట్స్ చేసింది. అందులో క్యాపిటల్ గెయిన్స్ కోసం ఐటీఆర్-3 ఉపయోగించాలి. జులై 23, 2024కి ముందు, ఆ తర్వాత క్యాపిటల్ గెయిన్స్ ఏ విధంగా విభజించారో సూచించాలి. డివిడెండ్ ఆదాయాన్ని అదర్ సోర్స్ ఆదాయంగా చూపించినప్పుడు షేర్ల బైబ్యాక్ పై వచ్చిన క్యాపిటల్ నష్టాన్ని చూపించవచ్చు. అసెట్, లైయబిలిడీ లిమిట్‌ను రూ.1 కోటికి పెంచాం. సెభన్ 44బీబీసీని అదనంగా జత చేయడం జరిగింది. సెభన్ 80సీ, 10(13ఏ) ద్వారా డిడక్షన్లు అదనంగా పొందవచ్చు. షెడ్యూల్ టీడీఎస్‌లో టీడీఎస్ సెక్షన్ కోడ్ విలీనం చేయడం జరిగింది' అని సోషల్ మీడియా ఎక్స్ వేదికగా పోస్టు చేసింది.

ఐటీఆర్-3 ఫైల్ చేసేందుకు గడువు..

ట్యాక్స్ పేయర్లు తప్పనిసరిగా ఇన్‌కమ్ ట్యాక్స్ రిటర్నులు ఫైల్ చేసేటప్పుడు గడువు తేదీని తెలుసుకోవాలి. ఆడిటి రిపోర్ట్ సబ్మిట్ చేయాల్సిన అవసరాన్ని బట్టి ఐటీఆర్ గడువు అనేది మారుతుంటుంది. ఆడిట్ రిపోర్ట్ సమర్పించాల్సిన అవసరం లేని వారికి ఐటీఆర్ గడువు జులై 31, 2025 వరకు ఉంటుంది. ఒక వేళ ఆడిట్ రిపోర్ట్ అవసరమైన ట్యాక్స్ పేయర్లు ఉంటే వారు అక్టోబర్ 31, 2025 వరకు ఐటీఆర్ ఫైల్ చేయవచ్చు. అలాగే ఇంటర్నేషనల్ ట్రాన్సాక్షన్లు నిర్వస్తే వారు ఐటీఆర్-3 ఫైల్ చేసేందుకు నవంబర్ 30,2025 గడువు ఉంటుంది.