కొలికపూడి శ్రీనివాసరావుపై సెటైర్లు వేస్తూ కేశినేని నాని ఓ ట్వీట్

తిరువూరు ఎమ్మెల్యే కొలికపూడి శ్రీనివాసరావు మరోసారి వార్తల్లో నిలిచారు. ఎప్పుడూ వివాదాస్పద వ్యాఖ్యలు, చర్యలతో వార్తల్లో నిలిచే కొలికపూడి శ్రీనివాసరావు ఈసారి ఓ పొరబాటు కారణంగా వైసీపీకి చిక్కారు. ఈ క్రమంలోనే కొలికపూడి శ్రీనివాసరావుపై విజయవాడ మాజీ ఎంపీ, వైసీపీ నేత కేశినేని నాని (కేశినేని శ్రీనివాస్) సెటైర్లు గుప్పించారు. కొలికపూడి శ్రీనివాసరావు అసలు ఎమ్మెల్యేనా, ఎంపీనా.. ఇంతకీ ఈ మహానుభావుడు ఎవరని ఎద్దేవా చేస్తూ కేశినేని నాని ట్వీట్ చేశారు. ఇంత గొప్ప వ్యక్తులను తమ ప్రజాప్రతినిధులుగా ఎన్నుకునందుకు ప్రజలు తలపట్టుకుంటున్నారని విమర్శిస్తూ కేశినేని నాని ఎక్స్ వేదికగా ఓ ట్వీట్ చేశారు. ఇక తన ట్వీట్‌కు జతగా.. ఎమ్మెల్యే కొలికపూడి శ్రీనివాసరావు రాసిన ఓ లెటర్‌ను కేశినేని నాని షేర్ చేశారు.

విజయవాడ మాజీ ఎంపీ అయిన కేశినేని నానిపై సీబీఐ విచారణ చేయాలంటూ తిరువూరు ఎమ్మెల్యే కొలికపూడి శ్రీనివాసరావు సీబీఐ డైరెక్టర్‌కు మంగళవారం ఓ లేఖ రాశారు. కేశినేని నాని పదేళ్లు ఎంపీ పదవిని అడ్డం పెట్టుకుని అధికార దుర్వినియోగానికి పాల్పడ్డారని అందులో కొలికపూడి విమర్శించారు. కేశినేని నాని అక్రమాలపై సమగ్ర విచారణ చేయాలని సీబీఐ అధికారులను కోరారు. కేశినేని నాని ఉద్దేశ పూర్వకంగా బ్యాంకు రుణం ఎగ్గొట్టారని..ఆర్థిక నేరాలకు పాల్పడ్డారని కొలికపూడి శ్రీనివాసరావు ఆరోపించారు. ఎంపీ పదవిని అడ్డం పెట్టుకుని ఆర్థిక నేరాలకు పాల్పడిన కేశినేని నానిపై చర్యలు తీసుకోవాలని కేంద్ర దర్యాప్తు సంస్థ (సీబీఐ) డైరెక్టర్‌కు కొలికపూడి శ్రీనివాసరావు లేఖ రాశారు.

అయితే సీబీఐకు రాసిన లేఖలో తిరువూరు ఎమ్మెల్యే కొలికపూడి శ్రీనివాసరావు తనను తాను ఎంపీగా పేర్కొన్నారని కేశినేని నాని సెటైర్లు వేస్తున్నారు. పార్లమెంట్ సభ్యుడిగా, పార్లమెంట్ హోం కమిటీ సభ్యుడిగా తాను ఈ ఫిర్యాదు చేస్తున్నానని కొలికపూడి శ్రీనివాసరావు రాసినట్లు ఉన్న లెటర్‌ను కేశినేని నాని తన ఎక్స్ ఖాతా ద్వారా షేర్ చేశారు. కొలికపూడి శ్రీనివాసరావు అసలు ఎమ్మెల్యేనా, ఎంపీనా అంటూ సెటైర్లు వేశారు. ఇలాంటి వారిని ఓట్లు వేసి ప్రజాప్రతినిధులను చేశామా అని ప్రజలు తలలు పట్టుకుంటున్నారంటూ విమర్శించారు కేశినేని నాని.

మరోవైపు గత కొంతకాలంగా కేశినేని సోదరుల మధ్య వార్ జరుగుతున్న సంగతి తెలిసిందే. విజయవాడ ఎంపీ కేశినేని చిన్నిపై ముఖ్యమంత్రి నారా చంద్రబాబు నాయుడుకు కేశినేని నాని లేఖ రాయటంతో ఈ వ్యవహారం మొదలైంది. ఈ క్రమంలోనే కేశినేని నాని, కేశినేని చిన్ని మధ్య మాటల యుద్ధం నడుస్తోంది. ఈ క్రమంలోనే విజయవాడ ఎంపీ కేశినేని శివనాథ్‌కు మద్దతుగా వచ్చిన తిరువూరు ఎమ్మెల్యే కొలికపూడి శ్రీనివాసరావు.. సీబీఐకు రాసిన లేఖలో ఇలా తనను ఎంపీగా పేర్కొనడంపై సెటైర్లు వస్తున్నాయి.