భారత ఎస్-400పై పాకిస్తాన్ వ్యాఖ్యలు, నెటిజన్ల ఫన్నీ కామెంట్లు

ఇటీవల ఆపరేషన్ సిందూర్ తర్వాత.. భారత్‌పై పాకిస్తాన్ డ్రోన్లు, క్షిపణి దాడులతో విరుచుకుపడింది. అయితే అత్యంత శక్తివంతమైన వైమానిక రక్షణ వ్యవస్థ కలిగిన భారత్.. వాటన్నింటినీ గాల్లోనే పేల్చేసి.. ఎలాంటి నష్టం కలగకుండా చూసుకుంది. ఇందుకోసం రష్యా నుంచి దిగుమతి చేసుకున్న అత్యాధునిక ఎయిర్ డిఫెన్స్ సిస్టమ్ ఎస్-400 కీలక పాత్ర పోషించింది. పాక్ చేసిన అన్ని దాడులను తిప్పికొట్టడంలో ఈ ఎస్-400 మిసైల్ సిస్టమ్ ఎంత కీలకంగా వ్యవహరించిందో చూసి ప్రపంచ దేశాలు కూడా ఆశ్చర్యం వ్యక్తం చేశాయి. అయితే అలాంటి ఎస్-400 క్షిపణి వ్యవస్థ గురించి మాట్లాడి పాకిస్తాన్ పరువు తీసుకుంది. దీంతో ఆ వీడియో సోషల్ మీడియాలో వైరల్ కావడంతో నెటిజన్లు.. ఫన్నీగా కామెంట్లు పెడుతూ పాకిస్తాన్‌ను ఆటాడుకుంటున్నారు.

పాకిస్తాన్ ఎయిర్ ఫోర్స్ ప్రతినిధి ఒకరు.. భారత్‌కు చెందిన ఎస్-400 క్షిపణి రక్షణ వ్యవస్థ గురించి వివరిస్తున్న వీడియో ఇప్పుడు సోషల్ మీడియాలో వైరల్ అవుతోంది. అయితే ఆ వీడియోలో ఎస్-400 మిసైల్ సిస్టమ్‌ను ఆ అధికారి.. సెంటర్ ఆఫ్ గ్రావిటీ (గురుత్వాకర్షణ శక్తి) అని పేర్కొన్నట్లు ఉన్న వీడియో నెట్టింట హల్‌చల్ చేస్తోంది. భారత ఎస్-400 వైమానిక రక్షణ వ్యవస్థను గుర్తించడం సులభం కాదు అని వివరించేందుకు ప్రయత్నించిన ఆ అధికారి నవ్వులపాలయ్యారు. ఎస్-400ను గుర్తించడం కంటే.. వాటిపై దాడి చేయడం సులభం అని పేర్కొన్నారు. ఎందుకంటే అది మొబైల్, చాలా విలువైనదని, దాన్ని భారత్ కాపాడుతుందని, అది ఒక రకమైన గురుత్వాకర్షణ శక్తి అని తెలిపారు.

ఇక ఆ వీడియో నెట్టింట వైరల్ కావడంతో నెటిజన్లు రకరకాలుగా కామెంట్లతో విరుచుకుపడుతున్నారు. ఎస్-400 గురించి ఆ అధికారి చెప్పిన వ్యాఖ్యలు తీవ్ర గందరగోళంగా ఉండటంతో ఫన్నీ కామెంట్లు వస్తున్నాయి. అతడు అసలు ఎయిర్‌ఫోర్స్ అధికారేనా అని ప్రశ్నిస్తున్నారు. సెంటర్ ఆఫ్ గ్రావిటీ అనే పదాన్ని ఆయన ఏ అర్థంలో ఉపయోగించారో అర్థం కాక నెటిజన్లు అయోమయానికి గురవుతున్నారు. అయితే @thephukdi అనే ఒక నెటిజన్ ఈ వీడియోను ఎక్స్‌లో షేర్ చేస్తూ.. మదర్సాలో సైన్స్, ఇంగ్లీష్ నేర్పించడం మొదలుపెట్టినప్పుడు ఇలా ఉంటుందని సెటైరికల్ క్యాప్షన్ ఇచ్చాడు.

అయితే ఇది ఒక్కటి మాత్రమే కాకుండా ఇంతకుముందు కూడా పాకిస్తాన్ సైనిక అధికారులు.. చేసిన వ్యాఖ్యలు చాలా కామెడీగా ఉన్నాయి. పాకిస్తాన్ విమానాలను హై-టెక్ అని ఇటీవల ఇంకో అధికారి చెప్పడం కూడా తీవ్ర చర్చనీయాంశంగా మారింది. దీంతో నెటిజన్లు.. అసలు పాక్ సైనిక అధికారులకు ఆయుధాలు, రక్షణ వ్యవస్థలపై నాలెడ్జ్ ఉందా లేదా అనే అనుమానాన్ని వ్యక్తం చేస్తున్నారు. ఒక ముఖ్యమైన రక్షణ వ్యవస్థ గురించి మాట్లాడేటపుడు సరైన విధంగా చెప్పకపోవడం ఏంటని ట్రోల్ చేస్తున్నారు.