ఏపీ విద్యార్థులకు గుడ్ న్యూస్.. తల్లికి వందనం మాత్రమే కాదు

ఆంధ్రప్రదేశ్ ప్రభుత్వం విద్యార్థుల కోసం మరో కీలక నిర్ణయం తీసుకుంది. విద్యార్థుల చదువుకు ఎలాంటి ఇబ్బందులు ఉండకూడదనే ఉద్దేశంతో విద్యా సంవత్సరం ప్రారంభం రోజునే.. విద్యార్థులకు కిట్లు, తల్లికి వందనం పథకం కింద నగదు అందజేసిన ఏపీ ప్రభుత్వం మరో కీలక నిర్ణయం తీసుకుంది. పాఠశాల విద్యార్థులలో నైతిక విలువలు పెంపొందించాలనే ఉద్దేశంతో.. విద్యార్థులకు విలువల విద్య పుస్తకాలను అందించనుంది. ప్రభుత్వ పాఠశాలల్లో 6వ తరగతి నుంచి 10వ తరగతి వరకూ చదివే విద్యార్థులకు విలువల విద్య పుస్తకాలను ఆంధ్రప్రదేశ్ ప్రభుత్వం అందించనుంది. ఈ విద్యా సంవత్సరం నుంచే ఈ కార్యక్రమాన్ని ప్రారంభించనున్నారు.

మరోవైపు ప్రముఖ ప్రవచనకర్త చాగంటి కోటేశ్వరరావును ఏపీ ప్రభుత్వం విద్యారంగ సలహాదారుగా నియమించుకున్న సంగతి తెలిసిందే . చాగంటి సూచనలతో రాష్ట్ర విద్య పరిశోధన, శిక్షణ మండలి.. ఈ విలువల విద్య పుస్తకాలను రూపొందించింది. ఒక్కో తరగతికి ఒక్కో పేరుతో ఈ విలువల విద్య పుస్తకాలను అందించనున్నారు. 6వ తరగతి చదివే విద్యార్థులకు ‘తోరణాలు’ పేరుతో.. 7వ తరగతి విద్యార్థులకు మనోవికాసం పేరిట, 8వ, 9వ తరగతి విద్యార్థులకు సూక్తి బోధ పేరుతో.. అలాగే పదో తరగతి విద్యార్థులకు అమృతధార పేరుతో ఈ విలువల విద్య పుస్తకాలను అందించనున్నారు.

39 పేజీల వరకు ఉండే ఈ విలువల విద్య పుస్తకాల్లో.. అధికారులు క్యూఆర్‌ కోడ్‌ కూడా ఏర్పాటు చేశారు. ఈ క్యూఆర్ కోడ్ స్కాన్ చేయడం ద్వారా ఆయా పాఠ్యాంశాల వీడియోలు చూడొచ్చు. అలాగే ప్రముఖ క్యాన్సర్‌ వైద్యుడు నోరి దత్తాత్రేయుడు, ప్రముఖ చిత్రకారులు బాపు గురించి ఈ పుస్తకాల ద్వారా విద్యార్థులకు అవగాహన కల్పించారు. మరోవైపు విలువల విద్య పుస్తకాలతో పాటుగా.. 6వ తరగతి నుంచి 10వ తరగతి విద్యార్థుల వరకూ రాజ్యాంగం, లింగ సమానత్వంపైనా పుస్తకాలు అందిస్తారు.

రాజ్యాంగం పౌరులకు కల్పించిన ప్రాథమిక హక్కులతో పాటుగా రాజ్యాంగం నిర్దేశించిన విధులు వంటి అంశాలను రాజ్యాంగం పుస్తకంలో వివరించనున్నారు. అలాగే వ్యవసాయ సంబంధిత పనుల్లో మహిళల భాగస్వామ్యం, ఇంటి పనులలో మహిళలకు పురుషులు సహాయం చేయాలనే వివరాలను లింగసమానత్వం పుస్తకంలో విద్యార్థులకు అర్థమయ్యేలా వివరించనున్నారు. బాల్య వివాహాలు, వాటి వలన కలిగే అనర్థాలు వంటి అంశాలపైనా ఈ పుస్తకాల్లో విద్యార్థులకు వివరించనున్నారు.