ఏపీలో వారందరికీ ట్యాబ్‌లు పంపిణీ

మహిళా సాధికారతకు, సంక్షేమానికి ఆంధ్రప్రదేశ్ ప్రభుత్వం ప్రత్యేక చర్యలు తీసుకుంటోంది. మహిళలు ఆర్థికంగా నిలదొక్కుకునేందుకు సహకారం అందిస్తోంది. ఈ క్రమంలోనే స్వయం సహాయక సంఘాలలోని మహిళలకు రుణాలు అందిస్తూ వారు ఆర్థికంగా బలపడేలా చర్యలు తీసుకుంటోంది. స్త్రీనిధి, ఉన్నతి పథకాలతో పాటుగా బ్యాంకు లింకేజీ రుణాలు అందిస్తోంది. అయితే స్వయం సహాయక సంఘాల విషయంలో ఏపీ ప్రభుత్వం మరో కీలక నిర్ణయం తీసుకుంది. స్వయం సహాయక సంఘాలలోని సభ్యులకు ట్యాబ్‌లు అందించాలని నిర్ణయం తీసుకుంది.ఈ విషయాన్ని ఏపీ పురపాలక శాఖ మంత్రి పొంగూరు నారాయణ వెల్లడించారు.

నెల్లూరు నగరపాలక సంస్థ కార్యాలయంలో మెప్మా మహిళలు, టిడ్కో ఇళ్లపై అధికారులతో మంత్రి నారాయణ సమీక్ష నిర్వహించారు. ఈ సందర్భంగా నెల్లూరు నగర పరిధిలోని 160 మంది మెప్మా రిసోర్స్ పర్సన్‌కు మంత్రి నారాయణ ట్యాబ్‌లు పంపిణీ చేశారు. డిజిటల్ సేవలు అందుబాటులోకి తెచ్చి పనితీరుని మెరుగుపరిచేందుకు ఈ ట్యాబ్స్ పంపిణీ చేస్తున్నట్లు తెలిపారు. మెప్మా మహిళలను స్వయం ఉపాధి, వ్యాపార రంగాల్లోకి తీసుకురావడమే సీఎం నారా చంద్రబాబు నాయుడు లక్ష్యమని మంత్రి నారాయణ వివరించారు. డ్వాక్రా మహిళల సాధికారతే లక్ష్యంగా పనిచేస్తున్నట్లు వివరించారు. అన్ని రంగాలలో టెక్నాలజీ వాడకం పెరిగిందన్న నారాయణ.. స్వయం సహాయక సంఘాల సభ్యులకు సాంకేతికతను చేరువ చేసేందుకు ట్యాబ్‌లు ఇస్తున్నట్లు వెల్లడించారు.

రాష్ట్రవ్యాప్తంగా 9 వేల ట్యాబ్స్ పంపిణీ చేస్తున్నామని.. అలాగే 60 డిజి లక్ష్మి సెంటర్ల ద్వారా సేవలు అందిస్తున్నట్లు నారాయణ తెలిపారు, రాష్ట్రవ్యాప్తంగా ఉన్న 175 నియోజకవర్గాల్లో ఎంఎస్ఎంఈ పార్కులను ఏర్పాటు చేస్తున్నట్లు తెలిపారు. నెల్లూరులో వేయి మంది మెప్మా మహిళలను వ్యాపారవేత్తలుగా తీర్చిదిద్దుతామని అన్నారు.

అలాగే విజయదశమి నాటికి అన్ని మున్సిపాలిటీలలో ఉన్న టిడ్కో ఇళ్లను పూర్తి చేస్తామని.. లబ్ధిదారులకు అందిస్తామని మంత్రి నారాయణ స్పష్టం చేశారు.మరోవైపు ఆదివారం నెల్లూరు నగరంలో మంత్రి నారాయణ పర్యటించారు.9వ డివిజన్ పరిధిలోని ఎఫ్‌సీఐ కాలనీలో గాంధీ పార్కును ప్రారంభించారు. పార్కులో గాంధీ విగ్రహాన్ని ఆవిష్కరించారు. అనంతరం పక్కనే ఉన్న సాయిబాబా ఆలయంలో ప్రత్యేక పూజలు నిర్వహించారు.