ఏపీ, ఓడిశా, లక్నో మెట్రోలకు నిధులు.. హైదరాబాద్‌ మెట్రోకు మొండిచేయి

ప్రధాన మంత్రి నరేంద్ర మోదీ అధ్యక్షత మంగళవారం జరిగిన కేంద్ర మంత్రివర్గ సమావేశంలో పలు కీలక నిర్ణయాలు తీసుకున్నారు. పలు రాష్ట్రాల్లో ప్రాజెక్ట్‌లకు కేంద్ర క్యాబినెట్ ఆమోదం తెలిపింది. ఆంధ్రప్రదేశ్‌‌కు కొత్తగా సెమీ కండక్టర్ తయారీ యూనిట్‌‌ను కేటాయించింది. అలాగే ఒడిశా, పంజాబ్‌లలోనూ ఈ యూనిట్‌లను ఏర్పాటు చేయాలని నిర్ణయించింది. ఈ మూడు రాష్ట్రాల్లో ప్రాజెక్ట్‌‌ల కోసం మొత్తం రూ.4,594 కోట్ల నిధులను కేటాయించింది. అలాగే, ఉత్తర్ ప్రదేశ్ రాజధాని నగరం లక్నోలో మెట్రో రైలు విస్తరణకు క్యాబినెట్ గ్రీన్ సిగ్నల్ ఇచ్చింది. లక్నో మెట్రో ఫేజ్ 1బికి క్యాబినెట్ ఆమోదం తెలిపింది. ఇందుకోసం రూ. 5,801 కోట్లను మంజూరు చేసింది. ఈ దశలో మొత్తం 11.65 కిలోమీటర్ల మేర మెట్రో రైలు నిర్మాణం చేపట్టనున్నారు.

అలాగే ఈశాన్య రాష్ట్రమైన అరుణాచల్‌ ప్రదేశ్‌లో కొత్తగా హైడ్రో ఎలక్ట్రికల్ ప్రాజెక్ట్ ఏర్పాటుచేయాలని నిర్ణయించారు. 700 మెగావాట్ల విద్యుత్ ఉత్పత్తి సామర్థ్యం కలిగిన ఈ ప్రాజెక్టు కోసం రూ. 8,146 కోట్లు కేటాయించారు. ఈ ప్రాజెక్ట్‌ను ఆరేళ్లలో పూర్తి చేయాలని గడువు నిర్దేశించారు. అయితే, ఉత్తర్ ప్రదేశ్, ఏపీ, ఒడిశా, పంజాబ్‌లో కొత్త ప్రాజెక్ట్‌లు, వాటిని నిధులను కేటాయిస్తూ నిర్ణయం తీసుకున్న కేంద్ర క్యాబినెట్.. తెలంగాణకు మాత్రం మొండిచెయి చూపింది. క్యాబినెట్‌లో హైదరాబాద్ మెట్రో విస్తరణ ఊసే ఎత్తకపోవడం గమనార్హం. దీని గురించి తెలంగాణ ప్రభుత్వం పలుసార్లు కేంద్రానికి విజ్ఞ‌ప్తి చేసింది. అయినా కూడా మోదీ సర్కారు పట్టించుకోలేదు.

దీనిపై సోషల్ మీడియాలో పలువురు నెటిజన్లు తీవ్ర విమర్శలు చేస్తున్నారు. తెలంగాణపై కేంద్రం సవతి తల్లి ప్రేమ ఒలకబోస్తోందని, బీజేపీకి రాష్ట్రం నుంచి 8 మంది ఎంపీలు ఉన్నా పార్లమెంట్‌లో కనీసం తెలంగాణ గురించి మాట్లాడటం లేదని మండిపడుతున్నారు. హైదరాబాద్ మెట్రో రైలు విస్తరణ గురించి కేంద్రం పట్టించుకోకపోవడం విచారకరమని విమర్శిస్తున్నారు. పొరుగు రాష్ట్రం ఏపీకి కొత్తగా ప్రాజెక్ట్ ఏర్పాటు కోసం నిధులు ఇచ్చిన కేంద్రం.. తెలంగాణను చిన్న చూపు చూస్తోందని ఆరోపణలు చేస్తున్నారు. ప్రస్తుతం పార్లమెంట్ వర్షాకాల సమావేశాలు జరుగుతున్న నేపథ్యంలో.. ఇప్పటికైనా తెలంగాణ ఎంపీలు హైదరాబాద్ మెట్రో విస్తరణ గురించి నిలదీయాలని కోరుతున్నారు.