ట్రంప్‌తో భేటీకి పుతిన్ బాడీగార్డులు ‘పూప్ సూట్‌కేస్’ తీసుకెళ్లారా? సంచలన నివేదిక

అలస్కా వేదికగా అమెరికా, రష్యా అధ్యక్షులు డొనాల్డ్ ట్రంప్‌, వ్లాదిమిర్ పుతిన్ మధ్య గతవారం శిఖరాగ్ర సమావేశం జరిగిన విషయం తెలిసిందే. అయితే, రష్యా అధ్యక్షుడు పుతిన్ అంగరక్షకులు ఆయన మల వ్యర్థాలను సేకరించడానికి ‘ పూప్ సూట్‌కేస్ ’ను తీసుకెళ్లినట్టు అమెరికాకు చెందిన ది ఎక్స్‌ప్రెస్ యుఎస్ పత్రిక నివేదించింది. పుతిన్ ఆరోగ్యం గురించి విదేశీ శక్తులు ఎటువంటి సమాచారం పొందకుండా నిరోధించడమే ఈ అసాధారణ భద్రతా చర్య లక్ష్యమని పేర్కొంది.‘ రష్యా అధినేత విదేశీ పర్యటనకు వెళ్లినప్పుడు ఆయన బాడీగార్డులు మలవ్యర్థాలను సేకరించి మాస్కోకు తీసుకొస్తారు’ ఆ కథనం పేర్కొంది.

సమావేశం సందర్భంగా పుతిన్‌ రక్షణ కోసం కఠినమైన భద్రతా చర్యలు తీసుకున్నారు. పుతిన్‌ను అంగరక్షకులు చుట్టిముట్టి, ఆయనను, రష్యన్ ఇంటెల్‌ను రక్షించడానికి అనేక చర్యలు తీసుకున్నారు. ఫ్రెంచ్ పత్రిక పారిస్ మ్యాచ్‌‌కు చెందిన ఇన్వెస్టిగేటివ్ జర్నలిస్ట్‌లు రెగిస్ జెంటే, మిఖాయిల్ రూబిన్‌లను ఉటంకిస్తూ.. రష్యా అధ్యక్షుడి ఫెడరల్ ప్రొటెక్షన్ సర్వీస్ (FPS) సిబ్బంది ఆయన మల,మూత్రాలను సేకరించి, ప్రత్యేక సంచులలో నిల్వ చేసి, ప్రత్యేక బ్రీఫ్‌కేసులలో తీసుకువెళతారని ది ఎక్స్‌ప్రెస్ యూఎస్ నివేదించింది. గత కొన్నేళ్లుగా ఇలాంటి భద్రతా చర్యలు తీసుకుంటున్నారని, 2017లో పుతిన్ ఫ్రాన్స్ పర్యటనకు వెళ్లినప్పుడు ఈ విధంగానే జరిగిందని తెలిపింది. రష్యా, ఉక్రెయిన్ యుద్ధం ముగించి, శాంతి ఒప్పందానికి అంగీకరించేలా డొనాల్డ్ ట్రంప్ ప్రయత్నాలు చేస్తోన్న విషయం తెలిసిందే.

విదేశీ శక్తులు పుతిన్ మలవ్యర్థాల నమూనాలను సేకరించకుండా నిరోధించి, తద్వారా తమ అధ్యక్షుడు ఆరోగ్యం గురించి సమాచారాన్ని పొందకుండా అడ్డుకోడానికే ఈ ఆశ్చర్యకరమైన భద్రతా చర్య తీసుకున్నట్లు భావిస్తున్నారు. పుతిన్ వియన్నా పర్యటన సందర్భంగా కూడా ఇలాంటి సంఘటన జరిగిందని, అక్కడ ఆయన పోర్టబుల్ టాయిలెట్‌ను ఉపయోగించారని ప్రముఖ అంతర్జాతీయ జర్నలిస్ట్ ఫరీదా రుస్తమోవా నివేదించారు. ‘‘1999లో పుతిన్ అధ్యక్షపీఠం అధిరోహించినప్పటి నుంచి ఇలాగే జరుగుతోందని విశ్వసనీయ మూలాలు వెల్లడించాయని ఆమె చెప్పారు’’ అని ది ఎక్స్‌ప్రెస్ యుఎస్ కథనం వివరించింది. వ్లాదిమిర్ పుతిన్ ఆరోగ్యం గురించి వదంతలు, ఊహగానాలు వ్యాప్తిచెందుతోన్న వేళ.. ఈ నివేదిక వెలుగులోకి రావడం గమానార్హం.

గత నవంబర్‌లో కజకిస్థాన్‌లోని అస్థానాలో జరిగిన మీడియా సమావేశంలో పుతిన్ కాళ్లు వణుకుతూ కనిపించిన తర్వాత ఆయన ఆరోగ్యం గురించి అనేక పుకార్లు బయటకు వచ్చాయి. ది ఎక్స్‌ప్రెస్ యుఎస్ ప్రకారం.. ఇది పార్కిన్సన్స్ వంటి నాడీ సంబంధిత వ్యాధి కావచ్చునని డాక్టర్ బాబ్ బెరూఖిమ్ అనుమానించారు. 2023లో బెలారస్ అధ్యక్షుడు అలెగ్జాండర్ లుకషెంకోను కలిసినప్పుడు పుతిన్ వణుకుతూ కనిపించారు. కాగా, 2022లో పుతిన్ కాలిజారి కిందపడిన తర్వాత ఆయన తీవ్ర అస్వస్థతకు గురయ్యారంటూ పెద్దఎత్తున వ్యాపించిన పుకార్లను రష్యా ఖండించిందని ఎక్స్‌ప్రెస్ యుఎస్ నివేదించింది.