నగ్నంగా గ్రౌండ్‌లో తిరుగుతానని హేడెన్ ఛాలెంజ్.. రూట్‌కు కుమార్తె రిక్వెస్ట్!

ప్రపంచ క్రికెట్‌లో భారత్, పాకిస్థాన్ మ్యాచ్‌కు ఎంత క్రేజ్ ఉందో.. ఆస్ట్రేలియా, ఇంగ్లాండ్ మధ్య జరిగే యాషెస్‌కు కూడా అంతే ప్రాముఖ్యత ఉంది. ఇరు దేశాల ఆటగాళ్లు యాషెస్‌ను అత్యంత ప్రతిష్టాత్మకంగా భావిస్తారు. ఇలాంటి యాషెస్ త్వరలో ఆస్ట్రేలియా వేదికగా ప్రారంభం కానుంది. ఈ నేపథ్యంలో ఈ సిరీస్‌పై ఇప్పటికే చర్చలు మొదలయ్యాయి. ఇంగ్లాండ్, ఆస్ట్రేలియా మాజీల మధ్య మాటల యుద్ధం నడుస్తోంది. ఈ క్రమంలోనే ఆస్ట్రేలియా మాజీ ప్లేయర్ మాథ్యూ హేడెన్ యాషెస్‌పై సంచలన కామెంట్స్ చేశాడు.

 త్వరలో ప్రారంభం కానున్న యాషెస్ సిరీస్‌లో ఇంగ్లాండ్ స్టార్ ప్లేయర్ జో రూట్ సత్తాచాటుతాడని అతడు జోస్యం చెప్పాడు. ఓ డిబేడ్‌లో అతడు ఈ వ్యాఖ్యలు చేశాడు. అయితే రూట్.. ఆస్ట్రేలియాలో ఇప్పటివరకు 14 టెస్టులు ఆడాడని.. అందులో ఒక్కో సెంచరీ కూడా చేయలేదని వ్యాఖ్యాత గుర్తు చేశాడు. కానీ రూట్‌ ఖాతాలో 13,500 పైచిలుకు టెస్ట్ రన్స్ ఉన్నాయని.. ఆస్ట్రేలియాలో సగటు కూడా మెరుగ్గానే ఉందని హేడెన్ చెప్పుకొచ్చాడు. ఈ క్రమంలోనే ఓ సవాల్ చేశాడు.

ఈసారి జరిగే యాషెస్ టెస్ట్ సిరీస్‌లో జో రూట్ సెంచరీ చేయకపోతే.. తాను మెల్‌బోర్న్ క్రికెట్ గ్రౌండ్‌లో నగ్నంగా నడుస్తానని శపథం చేశాడు హేడెన్. ఇందుకు సంబంధించిన వీడియో సోషల్ మీడియాలో వెలుగులోకి వచ్చింది. అయితే ఈ దీనిపై మాథ్యూ హేడెన్ కుమార్తె.. క్రికెట్ ప్రజెంటర్ గ్రేస్ హేడెన్ స్పందించారు. "ప్లీజ్ రూట్.. ఒక్క సెంచరీ అయినా సాధించు. లేకపోతే మా నాన్న అన్నంత పని చేస్తాడు" అని సోషల్ మీడియాలో పోస్టు పెట్టారు.

కాగా టెస్ట్ క్రికెట్‌లో పరుగుల వరద పారిస్తున్న జో రూట్.. ఆస్ట్రేలియా గడ్డపై మాత్రం ఆశించిన మేర రన్స్ చేయలేదు. ఇప్పటివరకు ఆస్ట్రేలియాలో ఆడిన 14 టెస్ట్ మ్యాచ్‌లలో జో రూట్ 35.6 సగటుతో 892 పరుగులు చేశాడు. ఇందులో 9 అర్థశతకాలు ఉన్నప్పటికీ, ఒక్క సెంచరీ కూడా లేదు. ఇంగ్లాండ్ తరఫున 134 టెస్ట్ మ్యాచ్‌లు ఆడిన రూట్.. 13,543 పరుగులు చేశాడు. ఇందులో 30 సెంచరీలు ఉన్నాయి. టెస్ట్ క్రికెట్‌లో అత్యధిక పరుగులు చేసిన రెండో బ్యాటర్‌గా రూట్ నిలిచాడు. యాషెస్ సిరీస్ నవంబర్ 21 నుంచి వచ్చే ఏడాది జనవరి 8 వరకు జరగనుంది.