రాష్ట్రంలో కూటమి లేదు, కేవలం టీడీపీ మాత్రమే ఉంది
Andhra Pradesh Telugu | Suryaa Desk | Published : Thu, Sep 18, 2025, 03:58 PM
రాష్ట్రంలో ప్రస్తుతం సాగుతున్నది కూటమి పాలన కాదని, అది కేవలం తెలుగుదేశం పార్టీ పాలన మాత్రమేనని వైసీపీ సీనియర్ నేత, మాజీ మంత్రి ధర్మాన ప్రసాదరావు విమర్శించారు. పాపం అందరికీ పంచాలనే ఉద్దేశంతోనే వారు దీనికి 'కూటమి' అని పేరు పెట్టుకున్నారని ఆయన ఎద్దేవా చేశారు. రాష్ట్రంలో రాజ్యాంగబద్ధమైన పాలన జరగడం లేదని ఆరోపించారు."ఒక రాజధాని నిర్మాణం కోసం లక్ష కోట్ల రూపాయలు అప్పు చేసి ఖర్చు పెట్టడం రాజ్యాంగబద్ధ పాలన ఎలా అవుతుంది? ఆ భారాన్ని రాష్ట్రంలోని మిగతా ప్రాంతాల ప్రజలు ఏళ్ల తరబడి మోయాల్సి వస్తుంది" అని విమర్శించారు. సంపదను అన్ని వర్గాలకు సమానంగా పంచినప్పుడే అది నిజమైన రాజ్యాంగ పాలన అవుతుందని ఆయన అభిప్రాయపడ్డారు. చెరువులా మారిన రాజధాని ప్రాంతాన్ని ప్రజలకు చూపించకుండా ప్రభుత్వం ప్రయత్నిస్తోందని ధర్మాన ఆరోపించారు.గత ఐదేళ్లలో ఎన్నడూ రైతులు ఘర్షణ పడిన సంఘటనలు లేవని గుర్తుచేశారు. పేదరికాన్ని రూపుమాపడానికి విద్య ఒక్కటే మార్గమని నమ్మిన దివంగత ముఖ్యమంత్రి వైఎస్ రాజశేఖరరెడ్డి ఆశయాలను ప్రస్తుత ప్రభుత్వం నీరుగారుస్తోందని విమర్శించారు. పేద విద్యార్థులకు లబ్ధి చేకూర్చే విద్యా సంస్కరణలను నిర్వీర్యం చేస్తున్నారని, దీనిపై అందరూ కలిసి పోరాడాలని పిలుపునిచ్చారు.
|
|