ఏకంగా 25 లక్షల మందికి ఉచితంగా ఎల్పీజీ కనెక్షన్లు

కేంద్రంలోని నరేంద్ర మోదీ ప్రభుత్వం.. దసరా, నవరాత్రోత్సవాల సందర్భంగా దేశ ప్రజలకు భారీ శుభవార్తను ప్రకటించింది. ప్రధానమంత్రి ఉజ్వల యోజన కింద.. మరో 25 లక్షల మందికి లబ్ధి కలిగించాలని నిర్ణయం తీసుకుంది. ఈ విషయాన్ని కేంద్ర పెట్రోలియం శాఖ మంత్రి హర్దీప్ సింగ్ పూరీ ఎక్స్ వేదికగా ఈ విషయాన్ని దేశ ప్రజలతో పంచుకున్నారు. ప్రధానమంత్రి నరేంద్ర మోదీ.. దేశంలో ఉన్న మహిళలను దుర్గాదేవిలా గౌరవిస్తారని.. ఈ నిర్ణయం దేశంలోని మహిళల గౌరవం, సాధికారతకు మరో నిదర్శనమని హర్దీప్ సింగ్ పూరీ తెలిపారు. ఈ పథకం భారతీయ సంస్కృతిలో మహిళలను శక్తి స్వరూపంగా చూడటాన్ని ప్రతిబింబిస్తుందని పేర్కొన్నారు.

ఇక కేంద్ర ప్రభుత్వం.. ఒక్కో కొత్త ఎల్పీజీ కనెక్షన్ కోసం రూ.2,050 ఖర్చు చేస్తున్నట్లు కేంద్రమంత్రి హర్దీప్ సింగ్ పూరీ వెల్లడించారు. ఈ మొత్తంలో గ్యాస్ సిలిండర్‌తోపాటు.. స్టవ్, రెగ్యులేటర్, సురక్షా హోస్ పైపు, డీజీసీసీ బుక్‌లెట్, ఇన్‌స్టాలేషన్ ఛార్జీలు ఉంటాయని స్పష్టం చేశారు. ఉజ్వల 2.0 పథకం ప్రకారం.. లబ్ధిదారులకు మొదటి సిలిండర్ రీఫిల్, స్టవ్ కూడా ఫ్రీగా అందించనున్నట్లు పేర్కొన్నారు.

మరోవైపు.. గత నెలలో కేంద్ర మంత్రి వర్గం తీసుకున్న నిర్ణయాన్ని ఈ సందర్భంగా హర్దీప్ సింగ్ పూరీ ప్రస్తావించారు. ప్రస్తుతం 10.33 కోట్ల ఉజ్వల కుటుంబాలకు ఒక్కో సిలిండర్‌పై కేంద్ర ప్రభుత్వం రూ.300 సబ్సిడీ లభిస్తోందని ఆయన తెలిపారు. దీంతో ఈ లబ్ధిదారులకు సిలిండర్ కేవలం రూ.553కే లభిస్తోందని వెల్లడించారు. ఇది ప్రపంచంలోని అనేక ఎల్‌పీజీ ఉత్పత్తి చేసే దేశాల కంటే భారత్‌లోనే చాలా తక్కువ అని వివరించారు.

ప్రధానమంత్రి ఉజ్వల యోజన 2016 మేలో కేంద్ర ప్రభుత్వం ప్రారంభించింది. దేశంలో ఉన్న పేద కుటుంబాలకు.. ఇంట్లో పొగలేకుండా వంట గ్యాస్ కనెక్షన్లను ఉచితంగా అందించే లక్ష్యంతో కేంద్ర ప్రభుత్వం ప్రారంభించింది. ఈ పథకం మహిళల ఆరోగ్యంతో పాటు.. వారి జీవితాలను కూడా ప్రకాశవంతం చేసిందని హర్దీప్ సింగ్ పూరీ అభివర్ణించారు. ఇది కేవలం ఒక పథకం మాత్రమే కాదని.. దేశంలో ఒక గొప్ప సామాజిక విప్లవాన్ని ప్రారంభించిందని పేర్కొన్నారు. పొగతో నిండిన వంటగది నుంచి మహిళలకు విముక్తి లభించిందని.. ఇందుకు ప్రధానమంత్రి నరేంద్ర మోదీకి కృతజ్ఞతలు తెలియజేస్తూ.. వారి ముఖాలపై ఆనందం, ఆరోగ్యం కనిపిస్తోందని వెల్లడించారు.