శ్రీవారి సేవకులకు సూపర్ న్యూస్ చెప్పిన టీటీడీ

తిరుమల శ్రీవారి సేవకులకు టీటీడీ గుడ్ న్యూస్ వినిపించింది. శ్రీవారి సేవకులకు మరింత మెరుగైన శ్రీవారి దర్శనం కోసం ఏర్పాట్లు చేయాలని తిరుమల తిరుపతి దేవస్థానం నిర్ణయించింది. శ్రీవారి సేవకులు భగవద్భంధువులు అని టీటీడీ ఛైర్మన్ బీఆర్ నాయుడు అభివర్ణించారు. తిరుమల ఆస్థాన మండపంలో వివిధ రాష్ట్రాల నుంచి వచ్చిన శ్రీవారి సేవకులతో టీటీడీ ఛైర్మన్ బీఆర్ నాయుడు ఆత్మీయ సమావేశం నిర్వహించారు. తిరుమల శ్రీవారి సాలకట్ల బ్రహ్మోత్సవాలు సెప్టెంబర్ 24 నుంచి ప్రారంభం కానున్న సంగతి తెలిసిందే. బ్రహ్మోత్సవాల సందర్భంగా భక్తులకు సేవలందించేందుకు వివిధ రాష్ట్రాల నుంచి శ్రీవారి సేవకులను టీటీడీ ఎంపిక చేసింది. స్వచ్ఛందంగా సేవలు అందించేందుకు ముందుకు వచ్చినవారిని శ్రీవారి సేవకులుగా నియమించింది.

ఈ క్రమంలోనే వివిధ రాష్ట్రాల నుంచి వచ్చిన శ్రీవారి సేవకులతో టీటీడీ ఛైర్మన్ సమావేశమయ్యారు. ఈ సందర్బంగా శ్రీవారి సేవకులంటే తనకు ఎంతో గౌరవమని టీటీడీ ఛైర్మన్ బీఆర్ నాయుడు అన్నారు. తాను ముఖ్యమంత్రి చంద్రబాబును కలిసిన ప్రతిసారి శ్రీవారి సేవకుల గురించే ప్రస్తావిస్తానని వివరించారు. దేశంలోని ఎంతోమంది ప్రముఖులు తిరుమల శ్రీవారి సేవ చేసేందుకు ఉత్సాహం చూపిస్తున్నారని టీటీడీ ఛైర్మన్ అన్నారు. తిరుమలకు వచ్చే భక్తుల్లోనే భగవంతుడు ఉన్నాడని, వారికి సేవ చేస్తే ఆ దేవదేవుడికి సేవ చేసినట్లేనని అన్నారు. సీఎం చంద్రబాబు ఆదేశాలతో శ్రీవారి సేవను మరింత బలోపేతం చేయనున్నట్లు టీటీడీ ఛైర్మన్ వెల్లడించారు. శ్రీవారి సేవా విభాగం పదింతలు అభివృద్ధి చెందాలని బీఆర్ నాయుడు ఆకాంక్షించారు.

మరోవైపు శ్రీవారి సేవకులకు.. వారి సేవాకాలం పూర్తైన తర్వాత శ్రీవారి దర్శనం కల్పిస్తున్న సంగతి తెలిసిందే. అయితే వారు అందిస్తున్న విశేష సేవలకు గానూ మరింత మెరుగైన స్వామివారి దర్శనానికి ఏర్పాట్లు చేయాలని టీటీడీ ఛైర్మన్ బీఆర్ నాయుడు అధికారులను ఆదేశించారు. త్వరలోనే ఈ అంశం మీద బోర్డు సమావేశంలో చర్చించి నిర్ణయం తీసుకుంటామన్నారు. మరోవైపు భగవంతునికి, భక్తునికి మధ్య శ్రీవారి సేవకులు అనుసంధానకర్తలుగా సేవలు అందిస్తున్నారని టీటీడీ ఏఈవో వెంకయ్య చౌదరి అన్నారు. పని వేళలతో సంబంధం లేకుండా భక్తుల సేవలో అహర్నిశలు శ్రమిస్తు్న్న టీటీడీ ఉద్యోగులకు శ్రీవారి సేవకులు వెన్నుదన్నుగా ఉంటూ భక్తుల సేవలో పాల్గొంటున్నారని కొనియాడారు.