తల్లిని, సోదరిని వదిలేయమని భర్తను హింసించిన భార్య.. దిమ్మదిరిగే షాకిచ్చిన హైకోర్టు

తల్లిని, సోదరిని వదిలేయాలని భర్తను మానసికంగా హింసిస్తోన్న ఓ ఇల్లాలకు న్యాయస్థానం దిమ్మదిరిగే షాకిచ్చింది. కుటుంబాన్ని వదిలేయాలని, వారితో బంధాలను తెంచుకోవాలని ఒత్తిడిచేయడం క్రూరత్వమేనని తేల్చిచెప్పింది. ఈ మేరకు సదరు భర్త పెట్టుకున్న విడాకుల అర్జీ సమంజమైందేనని సమర్దించింది. భార్య మానసిక వేధింపులను పరిగణనలోకి తీసుకుని.. విడాకులు మంజూరు చేసింది. వివరాల్లోకి వెళ్తే ఢిల్లీకి చెందిన ఓ వ్యక్తికి వివాహం కాగా... భార్య, తన తల్లి, విబేధాలు కారణంగా భర్త నుంచి విడిపోయి సోదరితో కలిసి ఉంటున్నాడు. కానీ, భార్యకు అత్త, ఆడపడుచు ఇంట్లో ఉండటం నచ్చలేదు. అందుకే వాళ్లను ఇంటి నుంచి వెళ్లగొట్టాలని భర్తపై ఒత్తిడి చేయడం మొదలు పెట్టింది.

పెళ్లైన కొద్ది రోజుల నుంచే నస మొదలుపెట్టిన ఆమె.. చివరకు మానసిక వేధింపులకు గురిచేసింది. ఆమె ఒత్తిడి భరింపలేనిదిగా మారడంతో ఒంటరి తల్లిని, సోదరిని చూసుకోవాల్సిన బాధ్యత తనదేనని భావించాడు. భార్యకు నచ్చజెప్పే ప్రయత్నం చేసి చివరకు విడాకుల కోసం కుటుంబ న్యాయస్థానాన్ని ఆశ్రయించాడు. అతడి పిటిషన్‌న విచారించిన ఫ్యామిలీ కోర్టు.. విడాకులు మంజూరు చేసింది. దీంతో సదరు భార్య ఈ తీర్పును ఢిల్లీ హైకోర్టులో సవాల్ చేసింది. ఈ పిటిషన్‌పై విచారణ చేపట్టిన న్యాయస్థానం.. భార్య ప్రవర్తనను మానసిక హింసగా పరిగణించింది. ‘ఇటువంటి ప్రవర్తన, అదేపనిగా కుటుంబాన్ని బహిరంగంగా అవమానించడం, వ్యక్తిగత దూషణలకు దిగడం, పోలీసు కేసులు పెట్టి వేధించడం మానసిక హింసతో సమానం’ అని న్యాయస్థానం స్పష్టం చేసింది.

‘‘ఏ జయచంద్ర Vs అనిల్ కౌర్ కేసులో సుప్రీంకోర్టు పేర్కొన్నట్టు క్రూరత్వం ఒక విధానాన్ని కలిగి ఉంటుంది.. ఇది ‘అపరమితైన మానసిక ఒత్తిడి, వేధింపులకు’ గురిచేస్తుంది.. శారీరక హింస క్రూరత్వాన్ని నిరూపించాల్సిన అవసరం లేదు.. ఒక స్థిరమైన విధానం జీవిత భాగస్వామికి తీవ్రమైన మానసిక వేదనను కలిగిస్తుంది’ అని న్యాయమూర్తి వ్యాఖ్యానించారు.

‘ఉమ్మడి కుటుంబంలో తాను ఉండకూడదని భార్య అనుకోవడం తప్పుకాదు.. కానీ భర్తను తన కుటుంబంతో బంధాలను తెంచుకోమని ఒత్తిడి చేసే ప్రవర్తన కచ్చితంగా క్రూరత్వమే’ అని న్యాయస్థానం తేల్చిచెప్పింది. అలాగే, 2016లో వి నరేంద్ర Vs వీకే మీనా ( 9 SCC 455) కేసులో సుప్రీంకోర్టు.. భర్తను తల్లిదండ్రుల నుంచి విడిపోయేలా భార్య చేయడం మానసిక క్రూరత్వానికి సమానం’ అని పేర్కొంది. మొత్తం మీద ఈ చర్యలు వైవాహిక జీవితంలోని సాధారణ కష్టాలను దాటి వెళ్తాయని, విడాకులు మంజూరు చేయాలనే కుటుంబ కోర్టు నిర్ణయాన్ని సమర్థిస్తున్నాయని కోర్టు అభిప్రాయపడింది.