అటార్నీ జనరల్‌గా సీనియర్ న్యాయవాది ఆర్. వెంకటరమణి.. మరో రెండేళ్లు కొనసాగింపు

భారత అత్యున్నత న్యాయాధికారి అయిన అటార్నీ జనరల్ (ఏజీ)గా సీనియర్ న్యాయవాది ఆర్. వెంకటరమణి పదవీకాలాన్ని కేంద్ర ప్రభుత్వం మరో రెండేళ్ల పాటు పొడిగించింది. సెప్టెంబర్ 30, 2025తో ఆయన ప్రస్తుత మూడేళ్ల పదవీకాలం ముగియనున్న నేపథ్యంలో ఈ నిర్ణయం తీసుకుంది. కొత్త పదవీకాలం అక్టోబర్ 1, 2025 నుంచి అమలులోకి రానుంది. ఈ మేరకు రాష్ట్రపతి ఆదేశాలు జారీ చేసినట్లు న్యాయశాఖ తన ప్రకటనలో పేర్కొంది.

"సీనియర్ న్యాయవాది ఆర్. వెంకటరమణిని అక్టోబర్ 1, 2025 నుండి మరో రెండేళ్ల కాలానికి భారత అటార్నీ జనరల్‌గా కొనసాగిస్తూ భారత రాష్ట్రపతి ఆదేశాలు జారీ చేశారు" అని ఆ ప్రకటన విడుదల చేసింది. దీంతో, ఆర్. వెంకటరమణి సెప్టెంబర్ 30, 2027 వరకు తన పదవిలో కొనసాగనున్నారు.

అటార్నీ జనరల్ అనేది భారత రాజ్యాంగంలోని ఆర్టికల్ 76(1) ప్రకారం రాష్ట్రపతి నియమించే అత్యున్నత రాజ్యాంగబద్ధమైన హోదా. కేంద్ర కేబినెట్ చేసే సిఫారసుల ఆధారంగా రాష్ట్రపతి ఈ నియామకాన్ని చేపడతారు. అటార్నీ జనరల్ కేంద్ర ప్రభుత్వానికి ప్రధాన న్యాయ సలహాదారుగా పనిచేస్తారు. దేశంలోని ఏ కోర్టులోనైనా హాజరయ్యే హక్కు ఏజీకి ఉంటుంది. సుప్రీంకోర్టు, హైకోర్టులతో పాటు రాష్ట్ర, కేంద్ర ప్రభుత్వాలకు ఆర్. వెంకటరమణి గతంలో న్యాయ సేవలు అందించారు. న్యాయపరమైన అంశాల్లో కేంద్ర ప్రభుత్వానికి సలహాలు ఇవ్వడం అటార్నీ జనరల్ ప్రధాన విధి.

75 ఏళ్ల వయస్సు ఉన్న ఆర్. వెంకటరమణికి న్యాయ రంగంలో 40 సంవత్సరాలకు పైగా అనుభవం ఉంది. పుదుచ్చేరిలో 1950వ ఏట ఏప్రిల్ 13న జన్మించిన ఈయన.. 1977లో తమిళనాడు బార్ కౌన్సిల్‌లో న్యాయవాదిగా తన పేరు నమోదు చేసుకున్నారు. 1979లో సుప్రీం కోర్టులో తన ప్రాక్టీస్‌ను ప్రారంభించారు. భారత రాజ్యాంగంపై నిష్ణాతులుగా పేరుగాంచిన వెంకట రమణిని 1997లోనే సుప్రీంకోర్టు సీనియర్ న్యాయవాదిగా నియమించింది. గతంలో లా కమిషన్‌లో సభ్యుడిగా కూడా ఆయన సేవలు అందించారు. సీనియర్ న్యాయవాది కేకే వేణుగోపాల్ పదవీ కాలం ముగిసిన తర్వాత.. 2022 సెప్టెంబర్ 30న ఆర్. వెంకట రమణి తొలిసారిగా అటార్నీ జనరల్‌గా బాధ్యతలు స్వీకరించారు. ఆయన విశేష అనుభవం దృష్ట్యానే కేంద్రం మరోసారి ఆయన పదవీ కాలాన్ని పొడిగించాలని నిర్ణయించింది.