ఆస్ట్రేలియా చిన్నారికి భారతీయ కుటుంబం ఆతిథ్యం

భారతీయ సంస్కృతిలోని అతిథి దేవో భవ అనే గొప్ప సంప్రదాయాన్ని ప్రతిబింబిస్తూ.. ఆస్ట్రేలియాలో జరిగిన ఓ సంఘటన అందరి హృదయాలను హత్తుకుంటోంది. ముఖ్యంగా ఓ భారతీయ కుటుంబం పిక్నిక్‌కు వెళ్లి అక్కడే భోజనాలు చేస్తుండగా.. అనుకోకుండా వారి వద్దకు ఓ విదేశీ చిన్నారి వచ్చింది. ఆమె వీరి వైపే చూస్తుండడం గమనించిన భారతీయ కుటుంబం వెంటనే ఆమెను ఆహ్వానించారు. ఇలా ఆ చిన్నారి వారి వద్దకు వెళ్లగా.. ఆమెకు కూడా భోజనం పెట్టారు. ఎంతో ఆప్యాయంగా ఆమెకు నచ్చినవి వడ్డించి.. ఎలా తినాలో చూపించారు. చిన్నారి కూడా ఎంచక్కా వారితో కలిసిపోయి హాయిగా భోజనం చేసింది. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండగా.. అంతా తెగ సంబుర పడిపోతున్నారు.

ఈ మధురమైన క్షణాలను ఆస్ట్రేలియన్ కంటెంట్ క్రియేటర్ అయిన ఈవా తన ఇన్‌స్టాగ్రామ్ వీడియో ద్వారా పంచుకున్నారు. ఈవా తన కుమార్తె గైయాతో కలిసి ప్రయాణం చేస్తున్నప్పుడు ఈ సంఘటన చోటు చేసుకున్నట్లు చెప్పారు. తన పోస్టులోనే ఈ విషయాన్ని రాసుకొచ్చారు. ముఖ్యంగా ఒక నిమిషం క్రితం మేము వాళ్ల పక్క నుంచి నడుచుకుంటూ వెళ్తున్నామని ఈవా అన్నారు. మరు నిమిషంలోనే తన కుమార్తె గైయా తన కొత్త స్నేహితులతో కలిసి భారతీయ విందు భోజనం చేసిందని వివరించారు. నిజంగానే పిల్లలు ఎక్కడికి వెళ్లినా తమ జీవితాన్ని పూర్తిగా ఆస్వాదిస్తారని పేర్కొన్నారు.

ఈ వీడియోలో చిన్నారి గైయా ఒక చాపపై కాళ్లు ముడుచుకుని కూర్చుని.. చుట్టూ ఉన్న భారతీయ మహిళలు, పిల్లలతో కలిసి సంతోషంగా భోజనం చేస్తూ కనిపించింది. ముఖ్యంగా గైయా తమను చూడగానే.. వాళ్లు ఎంతో ఆప్యాయంగా పలకరించి, వారిలో కలుపుకోవడం నెటిజెన్లను ఆనందానికి గురి చేస్తోంది. ఈవా ఈ వీడియో పోస్ట్ చేసిన కొద్ది గంటల్లోనే లక్షల్లో వ్యూస్ వచ్చాయి. ఇది చూసిన ప్రతీ ఒక్కరూ.. భారతీయ కుటుంబంపై ప్రశంసల వర్షం కురిపిస్తున్నారు. భారతీయులు అతిథి దేవో భవ అనే సంప్రదాయాన్ని బాగా నమ్ముతారని.. త్వరగా వారు అందరితో కలిసి పోతారంటూ కామెంట్లు చేస్తున్నారు.

మరికొందరు తమ సొంత అనుభవాలను పంచుకుంటూ.. మేము కూడా గతంలో భారతీయ కుటుంబాల నుంచి ఆతిథ్యం స్వీకరించాం అంటూ చెప్పుకొస్తున్నారు. మా పొరుగువారు పండుగ రోజుల్లో ఎప్పుడూ ఏదో ఒక రకమైన కొత్త వంటకం తీసుకువచ్చి ఇస్తారని చెబుతున్నారు. తాము కూడా వారికి క్రిస్మస్ పండుగకి కుకీలు పంపితే వారు చాలా సంతోషిస్తారని వివరిస్తున్నారు. మరి ఈ వీడియో చూస్తే మీకెలా అనిపించింది కామెంట్ల రూపంలో తెలియజేయండి.