1 రూపాయికే 30 రోజులు.. అపరిమిత కాల్స్, రోజుకు 2జీబీ డేటా,,,బీఎస్ఎన్ఎల్‌ దీపావళి బొనాంజా

ప్రభుత్వ రంగ టెలికాం దిగ్గజం భారత్ సంచార్ నిగమ్ లిమిటెడ్ (బీఎస్ఎన్ఎల్) తమ యూజర్లకు బంపర్ ఆఫర్ ప్రకటించింది. దీపావళి పర్వదినాన్ని పురస్కరించుకుని కేవలం రూ.1కే కొత్త ప్లాన్ తెచ్చి అందరినీ ఆశ్చర్య పరిచింది. బీఎస్ఎన్ఎల్ దీపావళి బొనాంజా పేరుతో ఈ కొత్త ప్లాన్ లాంచ్ చేసింది. ఈ కొత్త ప్లాన్‌లో భాగంగా 1 రూపాయికే అపరిమిత సర్వీసులు అందిస్తోంది. మరి ఈ ఆఫర్ ఎవరికి వర్తిస్తుంది? ఎలా పొందాలి? ఎప్పటి వరకు అందుబాటులో ఉంటుంది? అనే పూర్తి వివరాలు ఇప్పుడు తెలుసుకుందాం.

దీపావళి సందర్భంగా బీఎస్ఎన్ఎల్ దివాళీ బొనాంజా పేరుతో తెచ్చిన కొత్త ప్లాన్ ద్వారా కేవలం ఒక్క రూపాయికే అపరిమిత సేవలు పొందవచ్చు. అయితే, ఈ ఆఫర్ కొత్త యూజర్లకు మాత్రమేనని తెలిపింది. ఈ మేరకు బీఎస్ఎన్ఎల్ సోషల్ మీడియా ఎక్స్ వేదికగా ఓ పోస్ట్ చేసింది. ఈ దీపావళి బొనాంజా ఆఫర్ అక్టోబర్ 15వ తేదీ నుంచే అందుబాటులోకి వచ్చినట్లు తెలిపింది. నవంబర్ 15వ తేదీ వరకు ఈ ఆఫర్ అందుబాటులో ఉంటుందని, కేవలం రూ. 1 కే సేవలు పొందవచ్చని తెలిపింది.

దీపావళి బొనాంజా ఆఫర్‌లో భాగంగా కేవలం రూ. 1 కే 30 రోజుల పాటు వ్యాలిడిటీ లభిస్తుంది. అపరిమిత వాయిస్ కాల్స్, రోజుకు 2 జీబీ డేటాతో పాటు రోజుకు 100 చొప్పున ఉచిత ఎస్ఎంఎస్‌లు అందిస్తున్నట్లు బీఎస్ఎన్ఎల్ తెలిపింది. ఉచితంగా సిమ్ పొందవచ్చని పేర్కొంది. ఆసక్తి ఉన్న వారు ఈ ఆఫర్ కోసం సమీపంలోని బీఎస్ఎన్ఎల్ సర్వీసె కేంద్రం లేదా రిటైలర్లను సంప్రదించవచ్చని పేర్కొంది.

కొద్ది నెలల క్రితం రిలయన్స్ జియో, ఎయిర్‌టెల్, వొడాఫోన్ ఐడీయా వంటి ప్రైవేట్ టెలికాం కంపెనీలు రీఛార్జ్ ప్లాన్ల ధరలను పెంచిన సంగతి తెలిసిందే. ఈ క్రమంలోనే బీఎస్ఎన్ఎల్ పుంజుకుంది. చౌక ప్లాన్లను తీసుకొచ్చి మొబైల్ యూజర్లను ఆకర్షిస్తోంది. ప్రైవేట్ సంస్థలకు షాక్ ఇస్తూ చాలా తక్కువ ధరకే ఇంటర్నెట్, వాయిస్ కాల్స్ కల్పిస్తోంది. దీంతో చాలా మంది బీఎస్ఎన్ఎల్‌కు మారుతున్నారు. త్వరలోనే 5జీ సేవలు సైతం అందుబాటులోకి తెస్తామని, ఇందుకోసం వందలాది టవర్లను అప్‌గ్రేడ్ చేసే ప్రక్రియను ప్రారంభించినట్లు ఇటీవలే కేంద్రం ప్రకటించింది. దీంతో ప్రైవేట్ టెలికాం కంపెనీలకు పోటీ ఇవ్వనుంది. చాలా మంది యూజర్లు సైతం ఇదే విషయంపై ఫిర్యాదులు చేస్తున్నారు. సరైన సిగ్నల్ లేకపోడవంతో ఇబ్బందులు పడుతున్నట్లు చెబుతున్నారు.