ఉద్యోగార్ధులకు గుడ్ న్యూస్! స్త్రీ, శిశు సంక్షేమ శాఖలో పోస్టులు – చివరి తేదీ అక్టోబర్ 22!
Andhra Pradesh Telugu | Suryaa Desk | Published : Thu, Oct 16, 2025, 09:43 PM
ఎన్టీఆర్ జిల్లా మహిళా అభివృద్ధి మరియు శిశు సంక్షేమ శాఖ ఆధ్వర్యంలో విజయవాడలో నడుస్తున్న ఇంటిగ్రేటెడ్ చైల్డ్ ప్రొటెక్షన్ స్కీమ్ (ICPS), ఎస్ఏఏ, చిల్డ్రన్ హోమ్స్ లో కాంట్రాక్ట్ లేదా అవుట్సోర్సింగ్ విధానంలో పనిచేయడానికి అర్హులైన అభ్యర్థుల నుంచి దరఖాస్తులు కోరుతున్నట్లు జిల్లా స్త్రీ, శిశు సంక్షేమ మరియు సాధికారత అధికారిణి షేక్ రుక్సానా సుల్తానా బేగం తెలిపారు.అకౌంటెంట్, అసిస్టెంట్ కమ్ డేటా ఎంట్రీ ఆపరేటర్, పార్ట్టైమ్ డాక్టర్, చౌకీదార్ కమ్ నైట్ వాచ్ విమెన్, ఎడ్యుకేటర్ (పార్ట్టైమ్), ఆర్ట్ అండ్ క్రాఫ్ట్ / మ్యూజిక్ టీచర్ (పార్ట్టైమ్), పీటీ ఇన్స్ట్రక్టర్ కమ్ యోగా టీచర్ (పార్ట్టైమ్), కుక్, హెల్పర్, హౌస్కీపర్, హెల్పర్ కమ్ నైట్ వాచ్ విమెన్ వంటి పోస్టులకు స్థానిక మహిళా అభ్యర్థుల నుంచి దరఖాస్తులు ఆహ్వానిస్తున్నట్లు తెలిపారు.అభ్యర్థులు 18 నుండి 42 సంవత్సరాల వయస్సు గలవారై ఉండాలి. ఎస్సీ, ఎస్టీ, బీసీ, ఈడబ్ల్యూఎస్ అభ్యర్థులకు ఐదు సంవత్సరాలు, దివ్యాంగులకు పది సంవత్సరాల వయోపరిమితి సడలింపు వర్తిస్తుంది.అభ్యర్థులు ntr.ap.gov.in వెబ్సైట్ నుంచి దరఖాస్తు ఫారం డౌన్లోడ్ చేసుకుని, పూర్తి వివరాలతో పాటు అవసరమైన అన్ని ధ్రువపత్రాల నకళ్లు గజిటెడ్ అధికారిచే అటెస్ట్ చేయించాలి. పూర్తి చేసిన దరఖాస్తులను ఈ నెల 22వ తేదీ సాయంత్రం 5 గంటలలోగా జిల్లా స్త్రీ, శిశు సంక్షేమ మరియు సాధికారత అధికారిణి కార్యాలయానికి (డోర్ నెం. 6-93, కార్మెల్ చర్చి ఎదురురోడ్, కానూరు, విజయవాడ) స్వయంగా సమర్పించాలని సూచించారు.
|
|