చాట్జీపీటీలో ఇకపై అడల్ట్ కంటెంట్కు అనుమతి
Technology | Suryaa Desk | Published : Fri, Oct 17, 2025, 08:08 AM_7103.jpg)
ఆర్టిఫిషియల్ ఇంటెలిజెన్స్ రంగంలో సంచలనాలకు కేంద్ర బిందువుగా ఉన్న ఓపెన్ఏఐ మరో కీలక నిర్ణయం తీసుకుంది. తన పాపులర్ చాట్బాట్ అయిన చాట్జీపీటీ ద్వారా అడల్ట్ కంటెంట్ రూపొందించుకునేందుకు అనుమతి ఇవ్వనున్నట్లు ప్రకటించింది. 18 ఏళ్లు నిండిన యూజర్లు ఈ సౌకర్యాన్ని వినియోగించుకోవచ్చని స్పష్టం చేసింది.ఓపెన్ఏఐ సీఈఓ శామ్ ఆల్ట్మన్ స్వయంగా ఈ విషయాన్ని వెల్లడించారు. "పెద్దలను పెద్దలుగానే పరిగణించాలన్నది తమ సిద్ధాంతం" అని పేర్కొంటూ, ఈ ఏడాది డిసెంబర్ నుంచి యూజర్లకు ఈ తరహా కంటెంట్ను అందుబాటులోకి తీసుకురానున్నట్లు తెలిపారు. యూజర్లు ఇచ్చే ఆదేశాల ఆధారంగా చాట్జీపీటీ కథలు, యానిమేషన్ చిత్రాలు, వీడియోల రూపంలో ఎరోటిక్ కంటెంట్ను సృష్టిస్తుందని ఆయన వివరించారు. అయితే, ఈ కంటెంట్లో ఎక్కడా నిజమైన మనుషులు ఉండరని, మొత్తం ఏఐ ద్వారానే రూపొందుతుందని కంపెనీ స్పష్టం చేసింది.నిజానికి శృంగారపరమైన కంటెంట్కు ఓపెన్ఏఐ ఇప్పటివరకు దూరంగా ఉంటూ వచ్చింది. అయితే, మార్కెట్లో నెలకొన్న పోటీ వాతావరణమే ఈ నిర్ణయానికి కారణమని టెక్ విశ్లేషకులు భావిస్తున్నారు. ఎలాన్ మస్క్కు చెందిన 'ఎక్స్ఏఐ' అభివృద్ధి చేసిన 'గ్రోక్' అనే చాట్బాట్ ఇప్పటికే ఈ తరహా సేవలను అందిస్తోంది. అందులోని 'గ్రోక్ ఇమాజిన్' అనే టూల్ ద్వారా యూజర్లు 3డీ యానిమేటెడ్ కంపానియన్స్తో శృంగార సంభాషణలు జరపడంతో పాటు, చిన్న వీడియోలు కూడా తయారుచేయవచ్చు. ఈ పోటీలో వెనుకబడకూడదనే ఉద్దేశంతోనే ఓపెన్ఏఐ ఈ కొత్త విధానాన్ని ప్రకటించిందని విమర్శలు వస్తున్నాయి.
|
|