పాడుబడిన లారీలో ఇలా..కానిస్టేబుల్‌ను కత్తితో పొడిచి పారిపోయిన నిందితుడు దొరికాడు

తెలంగాణ రాష్ట్రంలోని నిజామాబాద్ జిల్లాలో పోలీస్ కానిస్టేబుల్ ప్రమోద్‌ను దారుణంగా హత్య చేసి పరారైన రౌడీషీటర్ షేక్ రియాజ్ ను ఎట్టకేలకు పోలీసులు అదుపులోకి తీసుకున్నారు. శనివారం రాత్రి నుండి తొమ్మిది ప్రత్యేక బృందాలతో గాలించిన పోలీసులకు నిజామాబాద్ నగర శివారులోని సారంగపూర్ ప్రాంతంలో అతని ఆచూకీ లభించింది.

రియాజ్ అరెస్ట్..

సీసీఎస్ కానిస్టేబుల్ ప్రమోద్‌ను హత్య చేసి, అతని మేనల్లుడు ఆకాష్‌ను, ఎస్సై విఠల్‌ను గాయపరిచిన ఈ ఘటనను కమిషనర్ ఆఫ్ పోలీస్ (సీపీ) సాయి చైతన్య తీవ్రంగా పరిగణించి.. నిందితుడిని పట్టుకోవడానికి ఎనిమిది ప్రత్యేక బృందాలను రంగంలోకి దింపారు. రియాజ్ నగరం నుంచి బయటకు వెళ్లకుండా పోలీసులు ఎక్కడికక్కడ బందోబస్తు ఏర్పాటు చేసి జల్లెడ పట్టారు. సారంగపూర్ సమీపంలో రోడ్డు ప్రమాదానికి గురై నిరుపయోగంగా ఉన్న ఒక సరుకు రవాణా లారీలో రియాజ్ దాక్కున్నట్లు సమాచారం అందింది. పోలీసులు అక్కడ చుట్టుముట్టడంతో నిందితుడు లొంగిపోయాడు. అరెస్టు చేసే సమయంలో అతడిపై పోలీసులు కాల్పలు జరిపినట్లుగా కూడా సమాచారం తెలిసింది.

ఏం జరిగిందంటే..

కానిస్టేబుల్ ప్రమోద్ శుక్రవారం సాయంత్రం తన అన్న కూతురిని ప్రైవేట్ ఆసుపత్రిలో పరామర్శించడానికి మేనల్లుడు ఆకాష్‌తో కలిసి మోటారు సైకిల్‌పై బయలుదేరారు. ఆ సమయంలో రౌడీ రియాజ్ గురించి సమాచారం అందడంతో.. ప్రమోద్ మేనల్లుడితో కలిసి ఖిల్లా ప్రాంతానికి వెళ్లి, సీసీఎస్ ఎస్సైలు విఠల్, భీంరావ్‌కు విషయాన్ని తెలియజేశారు. నిందితుడు మురికి కాలువలో దూకి పారిపోవడానికి ప్రయత్నించగా ప్రమోద్ కూడా అదే కాలువలో దూకి అతడిని పట్టుకున్నాడు.

పట్టుకున్న రియాజ్‌ను అతని మోటారు స్కూటర్‌పైనే మధ్యలో కూర్చోబెట్టుకుని స్టేషన్‌కు తీసుకెళ్తుండగా.. అనుకోకుండా ప్రమోద్ హత్యకు గురయ్యాడు. రియాజ్ కత్తితో ప్రమోద్ ఛాతీలో పొడవగా.. అడ్డుకోవడానికి ప్రయత్నించిన ఆకాష్‌పై కూడా దాడి చేశాడు. వారి వెనుకాలే వచ్చిన ఎస్సై విఠల్‌ను సైతం గాయపరిచి పారిపోయాడు. మరో ఎస్సై భీంరావ్ అధికారులకు సమాచారం అందించారు.

ప్రమోద్‌ను హత్య చేసిన రియాజ్ అరబ్‌పై నిజామాబాద్ జిల్లాలో 37 నేరారోపణలు ఉన్నాయి. వాహన చోరీలు, సాధారణ దొంగతనాలు, చైన్ స్నాచింగ్‌లు, హత్య వంటి కేసుల్లో అతడు నిందితుడు. బెయిల్‌పై విడుదలైనా... నేరాలు చేయడం మానలేదు. విధి నిర్వహణలో ప్రాణాలు కోల్పోయిన కానిస్టేబుల్ ప్రమోద్‌కు పోస్టుమార్టం అనంతరం అధికారిక లాంఛనాలతో అంత్యక్రియలు జరిగాయి.