ఐపీఎల్ 2026 వేలం,,,ఐపీఎల్ ఫ్రాంఛైజీల దృష్టిని ఆకర్షిస్తున్న రాజ్ లింబానీ

ఇండియా టాలెంటెడ్ క్రికెట్ ప్లేయర్లను వెలుగులోకి తీసుకురావడంలో ఐపీఎల్ చేసిన కృషి ఎంత చెప్పిన తక్కువే. ఎంతోమంది ప్లేయర్లను టీమిండియాలోకి తీసుకురావడంలో ఐపీఎల్ లీగ్‌లు దోహదపడ్డాయి. అప్పుడెప్పుడో హార్దిక్ పాండ్యా నుంచి నిన్నటి అభిషేక్ శర్మ వరకూ అందరూ ఐపీఎల్ ద్వారానే లైమ్ లైట్‌లోకి వచ్చిన వాళ్లే. ముఖ్యంగా 14 ఏళ్ల వైభవ్ సూర్యవంశీని ప్రపంచానికి పరిచయం చేసింది. దాంతో రానున్న ఐపీఎల్ 2026 ఆసక్తికరంగా మారనుంది.

ఐపీఎల్ 2026 ప్రారంభానికి ముందు ఐపీఎల్ ఫ్రాంఛైజీలను 20 ఏళ్ల జూనియర్ భువి ఆకట్టుకుంటున్నాడు. ఇప్పుడు అందరి కళ్లు ఆ యంగ్ ప్లేయర్‌పైనే ఉన్నాయి. అండర్ 19లో టీమిండియా తరఫున ఆడిన ఆ యువ ఆటగాడు కళ్లు చెదిరే స్వింగ్ బౌలింగ్‌తో ప్రత్యర్థులను ముప్పుతిప్పలు పెట్టాడు. వికెట్లు సైతం గాల్లో ఎగిరిన సందర్భాలు ఉన్నాయి. ఐపీఎల్ 2026 వేలం మరికొద్ది నెలల్లో ప్రారంభం కానుండగా ఇప్పుడు ఈ ఆటగాడు వైరల్ అవుతున్నాడు.

భువనేశ్వర్ కుమార్‌ను తలపించే స్వింగ్ బౌలింగ్‌తో ఆకట్టుకుంటున్న ఆ టాలెంటెడ్ ప్లేయర్ ఎవరంటే.. 20 సంవత్సరాల రాజ్ లింబానీ . జూనియర్ భువిగా పిలుస్తున్న రాజ్ లింబానీ 130 కిలోమీటర్ల వేగంతో బంతులు విసరడమే కాకుండా.. తన లైన్ అండ్ లెంగ్త్‌తో ఆటగాళ్లను ఉక్కిరిబిక్కిరి చేశాడు. ఆసీస్ యంగ్ ప్లేయర్ సామ్ కోన్‌స్టాస్ లాంటి ఆటగాడిని సైతం క్లీన్ బౌల్డ్ చేసి తనేంటో నిరూపించుకున్నాడు. అదే ఉత్సాహంతో గతేడాది బరోడా తరఫున కూడా దేశవాళీ క్రికెట్‌లో ఎంట్రీ ఇచ్చి, హార్దిక్ చేతుల మీదుగా క్యాప్ కూడా అందుకున్నాడు.

ఫిబ్రవరి 2, 2005న పాకిస్తాన్‌కు కూతవేటు దూరంలో ఉన్న రన్ ఆఫ్ కచ్ ప్రాంతంలో జన్మించిన రాజ్ లింబానీ రైట్ ఆర్మ్ మీడియమ్ పేస్ బౌలర్‌గా గుర్తింపు తెచ్చుకున్నాడు. టీమిండియా తరఫున అండర్ - 19 వరల్డ్ కప్‌తో పాటు, ఆసియా కప్‌లోనూ ఆడాడు. కొత్త బంతితో స్వింగ్ తిప్పడంలో నమ్మకమైన బౌలర్‌గా పేరు తెచ్చుకున్నాడు. ఐపీఎల్ 2025లో గుజరాత్ టైటాన్స్ నెట్ బౌలర్‌గా ఉన్న రాజ్ లింబానీ రానున్న ఐపీఎల్ 2026 వేలానికి వచ్చే అవకాశం ఉన్నట్లు కనిపిస్తోంది. మరి ఈ యంగ్ టాలెంటెడ్ ప్లేయర్ కోసం ఎన్ని ఫ్రాంఛైజీలు పోటీపడతాయో చూడాలి.