రోహిత్ శర్మ మైండ్‌ని చదివేసిన మేజిషియన్,,,సోషల్ మీడియాలో వైరల్ అవుతోన్న వీడియో

ఆస్ట్రేలియా సిరీస్‌లో హీరోగా నిలిచిన హిట్ మ్యాన్ రోహిత్ శర్మ మళ్లీ ఇప్పుడు సోషల్ మీడియాలో ట్రెండింగ్ అయ్యాడు. అయితే ఈ సారి సెంచరీనో.. డబుల్ సెంచరీనో చేసి కాదు! ఓ మేజిషియన్ వీడియోతో సోషల్ మీడియాలో వైరల్ అయ్యాడు. రోహిత్ మైండ్ వాయీస్‌ను చదివేసిన మేజిషియన్, హిట్ మ్యాన్‌కి ఎవరిపై కోపం ఉందో కూడా చెప్పేశాడు.

టీమిండియా ఓపెనర్ రోహిత్ శర్మ ను ఆశ్చర్యపరిచేలా మైండ్ రీడర్ నామన్ ఆనంద్ చేసిన ట్రిక్ ప్రస్తుతం ఇంటర్నెట్‌లో ట్రెండింగ్‌లో ఉంది. నేను రోహిత్ శర్మ మైండ్‌ని చదివేశా అనే టైటిల్‌తో నామన్ ఆనంద్ ఇన్‌స్టాగ్రామ్‌లో వీడియోను షేర్ చేశాడు. వీడియోలో రోహిత్ శర్మతో పాటు శ్రేయస్ అయ్యర్, టీమిండియా మాజీ బ్యాటింగ్ కోచ్ అభిషేక్ నాయర్, టీవీ యాంకర్లు సమీర్ కొచ్చర్, గౌరవ్ కపూర్ కూడా ఉన్నారు.

ఒక ప్రైవేట్ పార్టీ సమయంలో నామన్ రోహిత్‌ని తన మనస్సులో ఒక పేరు ఆలోచించాలని అడిగాడు. రోహిత్ ఏదో పేరు మనసులో అనుకున్నాడు. అప్పుడు మైండ్ రీడర్ అడిగాడు ఇటీవల ఈ వ్యక్తితో మాట్లాడలేదు కదా? అని. రోహిత్ నవ్వుతూ అంగీకరించాడు. తర్వాత నామన్ అతనికి దయచేసి రిలాక్స్‌ ఉండండి అని చెప్పి రోహిత్ చేతులను జేబులో నుంచి బయటకు తీయమన్నాడు.

రోహిత్ నవ్వుతూ నేను చెబుతున్నాను అని సరదాగా అన్నాడు. అప్పుడు నామన్ తన మొబైల్‌లో ఒక పేరు రాసి, చుట్టూ ఉన్నవారికి చూపించాడు. కానీ రోహిత్‌కు మాత్రం చూపలేదు. తర్వాత రోహిత్ తన మనసులో ఉంచుకున్న పేరును బహిరంగంగా చెప్పాడు అజాన్. వెంటనే నామన్ రాసిన స్క్రీన్‌ను చూపించగానే అందరూ షాక్ అయ్యారు. అదే పేరు అజాన్!

ఈ వీడియోలో రోహిత్ ఆశ్చర్యపోవడం, అక్కడున్నవాళ్లందరూ చప్పట్లు కొట్టడం సోషల్ మీడియాలో వైరల్ అయ్యింది. అభిమానులు కూడా ఈ ఘటనపై సరదా కామెంట్లు చేస్తున్నారు. రోహిత్ భాయ్ తను ఏ పేరు ఆలోచించారో మర్చిపోతే? అని ఒకరు సరదాగా కామెంట్ చేస్తే.. మరొకరు శ్రేయస్ అయ్యర్‌కి ఈ ట్రిక్ తెలుసనుకుంటా అని కామెంట్ చేశారు. అయితే, చాలా మంది మాత్రం ఎవరు ఈ అజాన్ అంటూ కామెంట్లు చేస్తున్నారు.

రోహిత్ శర్మ ఈ వీడియోతోపాటు సిడ్నీ శతకంతోనూ అభిమానుల హృదయాల్లో మళ్లీ స్థానం సంపాదించాడు. 121 పరుగులతో నాటౌట్‌గా నిలిచి భారత్‌కు గౌరవప్రదమైన విజయం అందించిన రోహిత్, తన వయస్సు గురించి వస్తున్న విమర్శలకు సమాధానం చెప్పాడు. 73, 121 ఇన్నింగ్స్‌లతో సిరీస్ ముగించడంతో అతను ఇంకా ఎంత క్లాస్ ఉన్న ఆటగాడో మరోసారి నిరూపించాడు. రోహిత్ శర్మ ఇప్పుడు తన బ్యాటింగ్‌‌తో మాత్రమే కాదు, ఈ మైండ్ రీడింగ్ మ్యాజిక్ వీడియోతో కూడా ట్రెండ్ అవుతున్నాడు.