టాప్ బ్యాంకుల కంటే ఇందులోనే అధిక వడ్డీ

డబ్బులు ఇన్వెస్ట్ చేసేందుకు.. ఎన్నో ఆప్షన్లు ఉన్నాయి. ఇక్కడ దీర్ఘకాలంలో మంచి రిటర్న్స్ కోసం.. పోస్టాఫీస్ పథకాలు, స్టాక్ మార్కెట్లు, మ్యూచువల్ ఫండ్స్, బంగారం, రియల్ ఎస్టేట్ ఇలా చాలానే ఉన్నప్పటికీ.. ఇప్పటికీ సురక్షితమైన పెట్టుబడి సాధనంగా బ్యాంక్ ఫిక్స్‌డ్ డిపాజిట్లు ఉన్నాయి. వీటిని సురక్షిత, సంప్రదాయ పెట్టుబడి పథకాలుగా చెబుతుంటారు. ఇందులో ఎలాంటి రిస్క్ ఉండదు. నిర్దిష్ట వడ్డీ రేటుపై నిర్ణీత కాల వ్యవధికి రాబడి వస్తుంటుంది. ఎక్కువగా రిస్క్ కోరుకోని సీనియర్ సిటిజెన్లు ఈ ఎఫ్‌డీలో పెట్టుబడి పెట్టేందుకు ఆసక్తి చూపిస్తుంటారని చెప్పొచ్చు. ఇక్కడ చాలా మంది తమ స్థోమతకు తగ్గట్లుగా డిపాజిట్లు చేస్తుంటారు. కనీసం వారం నుంచి గరిష్టంగా పదేళ్ల వరకు డిపాజిట్ చేయొచ్చు. వడ్డీ రేట్లు బ్యాంకుల్ని బట్టి మారుతుంటాయి.

చాలా వరకు ప్రభుత్వ బ్యాంకుల కంటే ప్రైవేట్ బ్యాంకుల్లో వడ్డీ కాస్త అధికంగా ఉంటుంది. ఇంకా వీటి కంటే స్మాల్ ఫైనాన్స్ బ్యాంకుల్లో మరింత వడ్డీ ఎక్కువగా వస్తుంది. ఇక కొంత కాలంగా రిజర్వ్ బ్యాంక్ ఆఫ్ ఇండియా రెపో రేట్లను తగ్గిస్తూ వస్తోంది. దీంతో బ్యాంకులు కూడా లోన్లపైన వడ్డీ రేట్లను తగ్గిస్తూ.. ఇదే సమయంలో ఫిక్స్‌డ్ డిపాజిట్ వడ్డీ రేట్లను కూడా తగ్గిస్తూ వచ్చాయి. దిగ్గజ బ్యాంకుల్లో ఎస్బీఐ, హెచ్‌డీఎఫ్‌సీ వంటివి కూడా తమ డిపాజిట్ వడ్డీ రేట్లను వరుసగా తగ్గించేశాయి. దీంతో వీటిల్లో రాబడి తగ్గిందని చెప్పొచ్చు.

అయితే చాలా ప్రముఖ ప్రైవేట్, ప్రభుత్వ బ్యాంకుల కంటే స్మాల్ ఫైనాన్స్ బ్యాంకుల్లోనే వడ్డీ ఎక్కువగా ఉండగా.. వీటిల్లో రూ. 2 లక్షలు జమ చేస్తే మూడేళ్ల వ్యవధికి (మెచ్యూరిటీకి) ఎంత వస్తుందో చూద్దాం. అన్నింటికి మించి ఉత్కర్ష్ స్మాల్ ఫైనాన్స్ బ్యాంకు 7.65 శాతం వడ్డీ ఆఫర్ చేస్తుండగా.. ఇక్కడ రూ. 2 లక్షలపై రూ. 51,050 వడ్డీ వస్తుంది. స్లైస్ స్మాల్ ఫైనాన్స్ బ్యాంక్, జనా స్మాల్ ఫైనాన్స్ బ్యాంకులు 7.50 శాతం చొప్పున వడ్డీ అందిస్తుండగా.. ఇక్కడ రూ. 2 లక్షలపై రూ. 49,943 వస్తుంది.

ప్రైవేట్ బ్యాంకుల్లో చూస్తే అత్యధికంగా ఆర్బీఎల్ బ్యాంక్ అందిస్తుంది. ఇక్కడ వడ్డీ రేటు 7.20 శాతంగా ఉంది. రూ. 2 లక్షలు జమ చేసిన వారికి ఇక్కడ రూ. 47,744 వస్తుంది. ఐసీఐసీఐ, యాక్సిస్ బ్యాంకుల్లో మూడేళ్ల డిపాజిట్‌పై 6.60 శాతంగా వడ్డీ రేటు ఉంది. దీంట్లో రూ. 2 లక్షలు జమ చేసిన వారికి రూ. 43,399 వస్తుంది. హెచ్‌డీఎఫ్‌సీ బ్యాంకులో 6.45 శాతంగా వడ్డీ రేటు ఉంది. ఇక్కడ రూ. 2 లక్షలు జమ చేస్తే మెచ్యూరిటీకి రూ. 42,324 వడ్డీ వస్తుంది. ప్రభుత్వ బ్యాంకుల్లో యూనియన్ బ్యాంక్ ఆఫ్ ఇండియా అత్యధికంగా 6.60 శాతం వడ్డీ అందిస్తుంది. దీంతో 2 లక్షలపై రూ. 43,399 వడ్డీ వస్తుంది. ఎస్బీఐలో వడ్డీ రేటు 6.30 శాతంగానే ఉంది. ఇక్కడ 2 లక్షలు డిపాజిట్ చేసిన వారికి రూ. 41,253 వడ్డీ వస్తుంది.