15 ఏళ్లలో రూ. కోటి కావాలంటే.. నెలకు సిప్ రూపంలో ఎంత ఇన్వెస్ట్ చేయాలో

 మీరు పదేళ్లలో రూ. 50 లక్షలు సంపాదించాలనుకుంటున్నారా.. 15 ఏళ్లలో మీ టార్గెట్ కోటి రూపాయలా..? పిల్లల చదువులు, సొంత ఇల్లు కట్టుకోవడం, ఇతర వైద్య అవసరాల కోసం పొదుపు చేయడం ఇలాంటి లక్ష్యాలు మీకు ఉన్నాయా..? అయితే ఇక్కడ ముందు నుంచి కచ్చితమైన మార్గంలో పయనించాలి. ముందు నుంచి ఆర్థిక క్రమశిక్షణ అలవర్చుకోవాలి. ముఖ్యంగా మలి వయసులో, ఉద్యోగం లేనప్పుడు.. రిటైర్మెంట్ తర్వాత ఆర్థిక ఇబ్బందులు లేకుండా ఉండాలంటే ముందే డబ్బును కూడబెట్టి పెట్టుబడులు పెట్టాల్సి ఉంటుంది. చాలా మంది ఈ లక్ష్యాల్ని దీర్ఘకాలంలో నెరవేర్చుకునేందుకు మ్యూచువల్ ఫండ్స్‌ను ఎక్కువగా ఎంచుకుంటుంటారు. ఇక్కడ రిస్క్ కాస్త ఉన్నా.. లాంగ్ రన్‌లో మెరుగైన రాబడి వస్తుందని ఆశిస్తుంటారు. నిపుణులు కూడా ఇదే చెబుతుంటారు.

మ్యూచువల్ ఫండ్లలో ప్రధానంగా ద్రవ్యోల్బణాన్ని మించేలా రాబడి ఆశించొచ్చు. ఇంకా కాంపౌండింగ్ ఇంట్రెస్ట్ బెనిఫిట్ వల్ల ఏటా సంపద పెరుగుతూనే ఉంటుంది. ఇంకా మ్యూచువల్ ఫండ్లలో సిప్ పెట్టుబడి బెస్ట్ ఆప్షన్. దీని ద్వారా నెలకు మీ స్థోమతకు తగ్గట్లుగా ఇన్వెస్ట్ చేస్తూ పోవచ్చు. అవసరాన్ని బట్టి.. మీ ప్రాధాన్యతలను బట్టి దీనిని ఏటా పెంచుకుంటూ కూడా పోవచ్చు. చిన్న వయసులోనే పెట్టుబడులు ప్రారంభించడం వల్ల రిటైర్మెంట్ వరకు చూస్తే పెద్ద మొత్తంలో రాబడి అందుకోవచ్చు. ఇక్కడ ప్రారంభ సంవత్సరాల్లో కంటే.. కాలం గడుస్తున్న కొద్దీ ఆ చక్రవడ్డీ కారణంగా సంపద విపరీతంగా పెరుగుతుంటుంది. అందుకే.. ఇక్కడ చాలా కాలం పాటు పెట్టుబడుల్ని కొనసాగిస్తుంటారని చెప్పొచ్చు.

>> మీరు మ్యూచువల్ ఫండ్లలో పెట్టుబడి పెట్టాలనుకుంటే.. ఇన్నేళ్లకు ఇంత టార్గెట్ అని నిర్దేశించుకోవాలి. ప్రధానంగా ఇక్కడ వార్షిక ప్రాతిపదికన రాబడి ఎంత వస్తుందనే దానిపై రిటర్న్స్ ఆధారపడి ఉంటాయి. చాలా వరకు మ్యూచువల్ ఫండ్స్ సగటున వార్షిక ప్రాతిపదికన 12 శాతానికి మించి రిటర్న్స్ ఇస్తుంటాయి. ఆశించే రాబడిని బట్టి.. నెలనెలా సిప్ అనేది ఎంత చేయాలో తెలుసుకోవచ్చు. ఇక్కడ మ్యూచువల్ ఫండ్స్ సిప్ కాలిక్యులేటర్స్ చాలానే ఉంటాయి. ఎంత రాబడికి.. ఎన్నేళ్లకు.. నెలకు ఎంత ఇన్వెస్ట్ చేస్తే.. ఎంత వస్తుందో ఈజీగా అంచనా వేయొచ్చు.

ఇక్కడ మీరు 15 సంవత్సరాలలో రూ. కోటి టార్గెట్ పెట్టుకున్నారనుకుందాం. ఇక్కడ ఎంత వార్షిక రాబడి అంచనాతో.. నెలనెలా సిప్ ఎంత చేయాలనే దాని లెక్కల గురించి చూద్దాం. మీరు 12 శాతం వార్షిక రాబడి ఆశిస్తే.. రూ. కోటి రావాలంటే నెలకు రూ. 20,016 చొప్పున సిప్ చేస్తే సరిపోతుంది. ఇక్కడ మీ మొత్తం పెట్టుబడి రూ. 36.03 లక్షలుగా ఉంది. ఇక 11 శాతం వార్షిక రాబడి లెక్కన చూస్తే.. నెలకు రూ. 21,993 చొప్పున సిప్ చేయాలి. ఇక్కడ మొత్తం పెట్టుబడి రూ. 39.59 లక్షలుగా ఉంది. అదే 10 శాతంపై అయితే నెలకు సిప్ రూ. 24,127; 9 శాతం లెక్కన చూస్తే నెలకు రూ. 26,426 చొప్పున సిప్ చేయాల్సి వస్తుంది. వార్షిక అంచనా రాబడి తగ్గుతున్న కొద్దీ.. మీ మొత్తం పెట్టుబడి పెరుగుతుందని గుర్తుంచుకోవాలి.