మళ్లీ భారీగా తగ్గిన బంగారం ధర.. వెండి ఒక్కరోజే రూ. 8 వేలు డౌన్

అమెరికా ప్రభుత్వం నుంచి వచ్చిన కీలక సంకేతాలతో బంగారం ధర మళ్లీ భారీగా తగ్గుతోంది. యూఎస్ షట్‌డౌన్ దాదాపు 43 రోజుల పాటు సాగగా.. దీని ముగింపు నిధుల బిల్లుపై ట్రంప్ సర్కార్ సంతకం చేసింది. దీంతో ఆర్థిక వ్యవస్థ తేరుకుంది. అయితే.. ఇక్కడే మరో సమస్య వచ్చి పడింది. షట్ డౌన్ ఎత్తివేత నేపథ్యంలో.. అమెరికా కీలక ఆర్థిక గణాంకాల్ని విడుదల చేయలేదు. ఇది మరింత ఆలస్యమయ్యే అవకాశం ఉంది. ఈ క్రమంలోనే.. యూఎస్ ఫెడరల్ రిజర్వ్ నుంచి కూడా కీలక సంకేతాలు వచ్చాయి. సాధారణంగా ఆర్థిక గణాంకాల ఆధారంగానే అమెరికా ఫెడరల్ రిజర్వ్ కీలక వడ్డీ రేట్లను తగ్గించాలా లేదా పెంచాలా లేదా స్థిరంగా ఉంచాలా అనేది నిర్ణయిస్తుంటుంది.

వాస్తవానికి ఇటీవల వడ్డీ రేట్లను ఫెడ్ 25 బేసిస్ పాయింట్ల మేర తగ్గించగా.. ఇప్పుడు డిసెంబరు నెలలో మరోసారి 25 బేసిస్ పాయింట్ల వరకు తగ్గించనున్నట్లు చాలా అంచనాలు వచ్చాయి. ఫెడ్ వడ్డీ రేట్లను తగ్గిస్తే.. బంగారం ధర మరింత పెరుగుతుంటుంది. అటు డిమాండ్ పెరిగి రేట్లు పెరుగుతుంటాయి. ఇటీవల అదే జరిగింది. కానీ ఇప్పుడు కీలక గణాంకాల విడుదలలో జాప్యంతో.. ఫెడ్ కూడా వడ్డీ రేట్ల తగ్గింపు అంచనాల్ని తగ్గించింది. ఇది ఇప్పట్లో ఉండకపోవచ్చని తెలుస్తోంది. దీంతో మళ్లీ బంగారం ఆకర్షణ కోల్పోయింది.

ఇప్పటికే మనం శుక్రవారం రోజు దీని గురించి చెప్పుకున్నాం. ఆ రోజు ఇంటర్నేషనల్ మార్కెట్లో పసిడి ధర భారీ స్థాయిలో పడిపోగా.. దేశీయంగా శనివారం ఉదయం 10 గంటల తర్వాత తగ్గుతాయని అంచనా వేయగా అదే నిజమైంది. ఈ రోజు గోల్డ్, సిల్వర్ రేట్లు భారీగా తగ్గుముఖం పట్టాయి. ఇంటర్నేషనల్ మార్కెట్లో స్పాట్ గోల్డ్ రేటు అంతకుముందు ఔన్సుకు 4200 డాలర్లు దాటగా.. చివరికి 4085 డాలర్ల స్థాయిలో స్థిరపడింది. సిల్వర్ రేటు 53 డాలర్ల నుంచి తగ్గి 50.59 డాలర్లకు చేరింది.

హైదరాబాద్ మార్కెట్లో 22 క్యారెట్ల పసిడి ధర రూ. 1800 తగ్గడంతో తులం రూ. 1,14,650 కి చేరింది. ముందటి రోజు కూడా రూ. 1450 పడిపోయింది. ఇక 24 క్యారెట్ల గోల్డ్ రేటు రూ. 1960 పడిపోవడంతో 10 గ్రాములకు ఇప్పుడు రూ. 1,25,080 కి చేరింది. ముందటి రోజు ఇది రూ. 1580 పతనమైంది. ఇలా 2 రోజుల్లో బంగారం ధర రూ. 3500 కుపైగా తగ్గింది. ఇక వెండి ధర విషయానికి వస్తే ఇంతకంటే ఎక్కువే పడిపోయింది. ఒక్కరోజులోనే రూ. 8 వేలు తగ్గడంతో కేజీకి హైదరాబాద్ మార్కెట్లో రూ. 1.75 లక్షలకు దిగొచ్చింది. దీనికి ముందు వరుసగా 5 రోజుల్లో రూ. 18,100 పెరిగింది.