కారవాన్ టూరిజం.. ట్రయల్ రన్ షురూ..ఏపీ ప్రభుత్వం మాస్టర్ ప్లాన్

ఆంధ్రప్రదేశ్ ప్రభుత్వం పర్యాటక రంగ అభివృద్ధి కోసం సరికొత్త ప్రణాళికలు రచిస్తోంది. హోంస్టేలు, కారవాన్లు వంటి వినూత్న విధానాల ద్వారా సందర్శకులను కట్టిపడేయాలని భావిస్తోంది. ఈ క్రమంలోనే అల్లూరి సీతారామరాజు జిల్లాలోనే హోంస్టేలు, కారవాన్ టూరిజాన్ని అధికారులు ప్రోత్సహిస్తున్నారు. ఇందులో భాగంగా అల్లూరి జిల్లాలో కారవాన్ టూరిజం ట్రయల్ రన్ నిర్వహిస్తున్నారు . హైదరాబాద్ నుంచి వచ్చిన ఓ కారవాన్ ఆదివారం లంబసింగి చేరుకుంది. ఈ కారవాన్‌ వాహనంలో మూడు కుటుంబాలు ఉండేలా ఏర్పాట్లు చేశారు. అన్ని సౌకర్యాలు కల్పించారు. ట్రయల్ రన్‌లో భాగంగా కారవాన్ వాహనాన్ని హరిత రిసార్టు అధికారులు పరిశీలించారు. అలాగే అల్లూరి జిల్లాలో కారవాన్ టూరిజానికి ఉన్న అవకాశాలు, ప్రదేశాలు, వనరులను కారవాన్ నిర్వాహకులకు వివరించారు. ఈ ట్రయల్ రన్ విజయవంతమైతే.. వచ్చే రోజుల్లో ఇలాంటి వాహనాలను లంబసింగి, తాజంగిలోనూ అందుబాటులోకి తేనున్నారు.

మరోవైపు అల్లూరి సీతారామరాజు జిల్లాలోని లంబసింగి, తాజంగి ప్రాంతాల్లో కారవాన్ టూరిజ ప్రాజెక్టులు అమలుచేయాలని ప్రభుత్వం ప్రాథమికంగా గుర్తించింది. జిల్లా కలెక్టర్ ఆదేశాల మేరకు ఈ ప్రాంతాల్లో అవసరమైన ప్రదేశాలను కూడా ఇప్పటికే ఎంపిక చేశారు. రెవెన్యూశాఖ కూడా అవసరమైన స్థలాలను గుర్తించారు. మరోవైపు కారవాన్ టూరిజాన్ని ప్రోత్సహించేందుకు ఏపీ ప్రభుత్వం ప్రైవేట్ ఆపరేటర్లకు ప్రోత్సాహకాలు కూడా అందించనుంది. 2029 నాటికి ఏపీలో 150 కారవాన్ వాహనాలు, 25 వరకూ కారవాన్ పార్కులు ఏర్పాటు చేయాలనేది ప్రభుత్వ లక్ష్యం. అందుకు అనుగుణంగా కారవాన్ పాలసీని కూడా తీసుకొచ్చింది. ఇందులో భాగంగా ఏపీలో రిజిస్ట్రేషన్ చేసుకునేకారవాన్ వాహనాలకు లైఫ్ ట్యాక్స్ మినహాయింపుకూడా ఇవ్వనున్నారు.

రిజిస్ట్రేషన్ చేసుకున్న మొదటి 25 వాహనాలకు వంద శాతం లైఫ్‌టాక్స్‌ మినహాయింపు ఉంటుంది. మూడు లక్షల రూపాయల వరకూ లైఫ్ ట్యాక్స్ మినహాయిస్తారు ఆ తర్వాత 13 వాహనాలకు 50 శాతం.. అనంతరం రిజిస్ట్రేషన్ చేసుకునే 12 వాహనాలకు 25 శాతం లైఫ్‌ టాక్స్‌ మినహాయింపు ఉంటుంది. అలాగే ఏడేళ్లపాటు రాష్ట్ర జీఎస్‌టీ వెనక్కి చెల్లిస్తారు.

మరోవైపు కారవాన్ పార్కుల అభివృద్ధి కోసం పర్యాటకాభివృద్ధి సంస్థకు చెందిన స్థలాలను కూడా కేటాయించాలని ప్రభుత్వం నిర్ణయించింది. కారవాన్ వాహనాలను పార్కింగ్ చేసుకోవటంతో పాటుగా వసతి, భోజన సదుపాయాన్ని కారవాన్ పార్కులలో ఏర్పాటు చేయనున్నారు. రవాణా సౌకర్యం లేని మారుమూలల్లో ఉన్న ప్రకృతి అందాలను కూడా ఆస్వాదించేలా పర్యాటకుల కోసం ఈ కారవాన్ టూరిజం ఆలోచన చేశారు.