సతీశ్ మృతి మర్మం.. ధ్వంసమైన మొబైల్‌లో దాగి ఉన్న రహస్యం!

తిరుమల తిరుపతి దేవస్థానం మాజీ అసిస్టెంట్ విజిలెన్స్ అండ్ సెక్యూరిటీ ఆఫీసర్ (ఏవీఎస్‌వో) ఏవీ సతీశ్ మరణం ఇప్పుడు రాష్ట్రవ్యాప్తంగా చర్చనీయాంశంగా మారింది. పరకామణి చోరీ కేసులో నిందితుడిగా ఉన్న ఆయన ఈ నెల 6వ తేదీన విచారణకు హాజరయ్యారు. కానీ కేవలం ఏడు రోజుల తర్వాత, అంటే 13వ తేదీన అనుమానాస్పద పరిస్థితుల్లో మృతి చెందడం పోలీసులను ఆందోళనకు గురిచేసింది. ఈ రెండు తేడాల మధ్య జరిగిన సంఘటనలు ఇప్పుడు దర్యాప్తు కేంద్ర బిందువుగా మారాయి.
సతీశ్ దుర్మరణానికి ముందు ఆయన మొబైల్ ఫోన్ పూర్తిగా ధ్వంసమైనట్టు తెలుస్తోంది. దీంతో ఆ ఫోన్‌ను హైదరాబాద్‌లోని ఫోరెన్సిక్ సైన్స్ ల్యాబొరేటరీ (ఎఫ్‌ఎస్‌ఎల్)కు పంపిన పోలీసులు ఇప్పుడు డేటా రికవరీపై పూర్తి దృష్టి పెట్టారు. ధ్వంసమైనా కూడా ఫోన్‌లోని చిప్‌ల నుంచి కొంత సమాచారాన్ని తిరిగి పొందే అవకాశం ఉందని నిపుణులు చెబుతున్నారు. ఈ డేటా వెలికితీత దర్యాప్తుకు కీలక మలుపు తెచ్చే అవకాశం ఉంది.
ప్రత్యేకంగా నవంబర్ 6 నుంచి 13వ తేదీ మధ్య సతీశ్ ఎవరితో మాట్లాడారు, ఏ వాట్సాప్ కాల్స్ చేశారు, ఏ ఇంటర్నెట్ కాల్స్ (వీడియో/వాయిస్) జరిగాయి, ఏ మెసేజ్‌లు పంపారు లేదా అందుకున్నారు – ఈ వివరాలన్నీ పోలీసులు గంటగంటకూ పరిశీలిస్తున్నారు. ఈ కాల్ డేటా, చాట్ హిస్టరీ ద్వారా ఆయనపై ఒత్తిడి తెచ్చిన వ్యక్తులు లేదా సంస్థల ఆచూకీ దొరికే అవకాశం ఉందని దర్యాప్తు అధికారులు భావిస్తున్నారు.
పరకామణి చోరీ కేసులో ఇప్పటికే పలువురు ఉన్నతాధికారులు, ఉద్యోగులు నిందితులుగా ఉండటం.. ఆ తర్వాత ఈ అనుమానాస్పద మరణం.. ఇవన్నీ కలిపి టీటీడీలో జరుగుతున్న పరిణామాలపై పెను అనుమానాలు రేకెత్తిస్తున్నాయి. ఫోరెన్సిక్ నివేదిక వచ్చాకే ఈ కేసు నిజస్వరూపం బయటపడనుందని పోలీసు వర్గాలు తెలిపాయి. ఈ ఘటనపై రాష్ట్ర ప్రజలందరూ ఆసక్తిగా ఎదురుచూస్తున్నారు.