ఎమ్మెల్యేగానే పనిచేస్తా.. తేజస్వీ యాదవ్

ఇటీవల జరిగినబిహార్ అసెంబ్లీ ఎన్నికల్లో రాష్ట్రీయ జనతాదళ్ (ఆర్జేడీ)దారుణ పరాజయానికి నైతిక బాధ్యత వహిస్తూ ఆ పార్టీ శాసనసభాపక్ష నేత పదవిని చేపట్టడానికి తేజస్వీ యాదవ్ నిరాకరించారు. అయితే, తండ్రి లాలూ ప్రసాద్ యాదవ్ నచ్చచెప్పడంతో తేజస్వీ వెనక్కితగ్గారు. విశ్వసనీయ వర్గాల ప్రకారం.. సోమవారం జరిగిన ఆర్జేడీ సమీక్షా సమావేశంలో ఎమ్మెల్యేగానే పనిచేస్తానని, అసెంబ్లీలో ప్రతిపక్ష నేత పదవి చేపట్టడానికి తేజస్వీ ససేమిరా అన్నారు. ఎన్నికల్లో పార్టీ ఓటమికి పూర్తిగా తానే బాధ్యతవహిస్తానని చెప్పారు. ఈసారి ఆర్జేడీ కేవలం 25 సీట్లతో సరిపెట్టుకున్న సంగతి తెలిసిందే.

ప్రతిపక్ష నాయకుడి పదవిని వదులుకోవాలన్న తేజస్వి యాదవ్ ప్రతిపాదనను మిగతావారు తిరస్కరించారు. తండ్రి లాలూ ప్రసాద్ యాదవ్ సభలో పార్టీ నడిపించే బాధ్యతలు తీసుకోవాల్సిందేనని పట్టుబట్టారని వర్గాలు తెలిపాయి. తన తండ్రి లాలూ ఆదేశాల ప్రకారమే పార్టీ వ్యవహారాలను నిర్వహిస్తున్నట్టు తేజస్వీ పేర్కొన్నారు. ‘‘ఆయన ఆదేశాల మేరకు నేను పార్టీ వ్యవహారాలను నిర్వహిస్తున్నాను.. ఈ ఎన్నికల్లో నేను చాలా ప్రయత్నించాను కానీ విఫలమయ్యాను’ అని ఆయన అన్నారు. సమావేశంలో సీనియర్ నాయకులు యువనేతకు మద్దతు తెలిపి, తాము ఆయన వెంటే ఉన్నామని స్పష్టం చేశారు.

కాగా, తన సన్నిహితుడు, ఆర్జేడీ రాజ్యసభ ఎంపీ సంజయ్ యాదవ్‌కు తేజస్వీ మద్దతుగా నిలిచినట్టు తెలుస్తోంది.లాలూ కుటుంబంలో గొడవలతో సంజయ్ పేరు బయటకు వచ్చింది.తాను ఇంటి నుంచి వెళ్లిపోవడానికి సంజయ్ కారణమని లాలూ కుమార్తె రోహిణీ ఆచార్య ఆరోపించిన సంగతి తెలిసిందే. ఎన్నికల్లో పార్టీ పేలవ ప్రదర్శనకు సంజయ్‌ను టార్గెట్ చేయడం తప్పని, ఆయన బాధ్యులు కాదని లాలూ తనయుడు అన్నారు.

తేజస్వీకి అత్యంత నమ్మకస్తులైన వ్యక్తుల్లో ఒకరైన సంజయ్.. ప్రచార వ్యూహాలు, పార్టీ అభ్యర్థుల ఖరారు సహా ఆర్జేడీ ఎన్నికల సన్నాహాల్లో కీలక పాత్ర పోషిస్తున్నారు. ఎవరైనా తేజస్వీని కలవాలంటే ముందు సంజయ్ అనుమతి తీసుకోవాలి. తన సోదరుడితో మాట్లాడటానికి సంజయ్ అనుమతించడం లేదంటూ లాలూ పెద్ద కుమారుడు తేజ్ ప్రతాప్ ఇటీవల ఆరోపించడం గమనార్హం. మరోవైపు, కుటుంబంలో విబేధాలపై లాలూ ప్రసాద్ యాదవ్ స్పందించారు. ఇవి తమ కుటుంబ అంతర్గత వ్యవహారమని, మేమే పరిష్కరించుకుంటామని అన్నారు.