యువతికి షాకిచ్చిన హైకోర్టు,,,,పెళ్లికి ముందు శారీరక సంబంధం సర్వసాధారణమైపోయింది

పెళ్లికి ముందు వ్యక్తిగత శారీరక సంబంధం సర్వసాధారణంగా మారిపోయిందని, సమాజంలో జరుగుతున్నవి న్యాయస్థానాలకు తెలియకుండా ఉండవని మద్రాస్‌ హైకోర్టు మదురై ధర్మాసనం వ్యాఖ్యానించింది. పెళ్లి చేసుకుంటానని నమ్మించి తనతో తొమ్మిదేళ్లు లైంగిక సంబంధం కొనసాగించి, మోసం చేశాడని ఆరోపిస్తూ మాజీ ప్రియుడిపై ఓ యువతి పెట్టిన అత్యాచారం కేసు విచారణ సమయంలో మదురై ధర్మాసనం ఈ వ్యాఖ్యలు చేసింది. వివరాల్లోకి వెళ్తే.. తిరునెల్వేలికి చెందిన దేవా విజయ్‌ అనే యువకుడిపై అతడితో కలిసి చదువుకున్న యువతి పోలీసులకు ఫిర్యాదు చేసింది.

కాలేజీలోనే తాము ప్రేమించుకున్నామని, వివాహం చేసుకుంటానని మాట ఇవ్వడంతో శారీరక సంబంధం ఏర్పడిందని పేర్కొంది. తొమ్మిదేళ్లు తనతో శారీరక సంబంధం కొనసాగించి చివరకు పెళ్లి గురించి అడిగితే నిరాకరించాడని ఆమె ఆరోపించింది. అంతేకాదు, ఇద్దరు కులాలు వేరని, ఇంతటితో ఈ విషయం వదిలేయాలని బెదిరించాడని ఆరోపణలు చేసింది. దీంతో పోలీసులు అత్యాచారం, మోసం తదితర సెక్షణ్ల కింద కేసు నమోదుచేశారు. దీంతో ఈ కేసును రద్దుచేయాలని కోరుతూ మద్రాస్ హైకోర్టు‌ను విజయ్ ఆశ్రయించాడు. ఈ పిటిషన్‌‌పై మదురై ధర్మాసనం న్యాయమూర్తి జస్టిస్‌ పుగళేంది సోమవారం విచారణ చేపట్టారు.

ఈ సందర్భంగా పిటిషనర్ తరఫున లాయర్ వాదనలు వినిపిస్తూ.. తన క్లయింట్ ఎటువంటి నేరం చేయడలేదని, పరస్పర అంగీకారంతో ఇరువురి శారీరక సంబంధం కొనసాగిందని తెలిపారు. ఇరువురూ విడిపోయిన తర్వాతే ఫిర్యాదు చేశారని, మొదట్లో మోసం చేశారనడానికి ఎటువంటి ఆధారాలు లేవని ఆయన వాదించారు. వయోజనురాలు, న్యాయవాది అయిన ఆమె ఏమి చేస్తుందో తెలుసని ఆయన న్యాయవాది కోర్టుకు తెలిపారు. ఈ వాదనలతో ఏకీభవించిన జస్టిస్ పుగళేంది కీలక వ్యాఖ్యలు చేశారు.

‘సుదీర్ఘ కాలం శారీరక సంబంధం కొనసాగినప్పటికీ.. వ్యతిరేకించకపోవడం ఇది సమ్మతితోనే జరిగిందని సూచిస్తోంది. వివాహం చేసుకుంటానని చెప్పి మోసం చేశాడనడానికి ఎలాంటి ఆధారాల్లేవు.. సుదీర్ఘకాలం పరస్పర సమ్మతితో శారీరకంగా సన్నిహితంగా ఉన్నప్పుడు విబేధాలు ఏర్పడితే క్రిమినల్‌ చట్టాన్ని వాడుకోవడం సరికాదు. వారి మధ్య సంబంధం ప్రేమతో ఏర్పడిందా? పెళ్లి కోసం ఎదురుచూశారా? కేవలం పరస్పర ఆనందమ కోసమా? అనేది వాళ్లకు మాత్రమే తెలుసు. ఇలాంటి విషయాల్లో న్యాయస్థానం కచ్చితమైన నిర్ణయానికి రావడం అసాధ్యం’ అని జస్టిస్ పుగళేంది పేర్కొన్నారు. ఇటువంటి కేసు పెట్టడం న్యాయ ప్రక్రియ దుర్వినియోగంతో సమానమని భావిస్తూ దానిని రద్దుచేస్తున్నట్టు ప్రకటించారు. ఇది ఏ విధంగా మోసం కాదని, పెళ్లికి శారీరక సంబంధాలు ఇప్పుడు ఫ్యాషన్ అయిపోయాయని, విజయ్‌పై పెట్టిన కేసును కొట్టివేస్తున్నట్టు స్పష్టం చేశారు.