సౌదీకి ఎఫ్-35 యుద్ద విమానాలు ట్రంప్ గిఫ్ట్.. ఇజ్రాయెల్ వ్యూహాత్మక మౌనం

పశ్చిమాసియాలో అమెరికా ప్రాధాన్యత మారుతోంది. ఇందుకు ఇటీవల జరుగుతోన్న పరిణామాలే నిదర్శనం. రెండోసారి అధ్యక్ష బాధ్యతలు చేపట్టిన తర్వాత మొదటిసారి పశ్చిమాసియా పర్యటనకు వచ్చిన ట్రంప్.. ఒకప్పుడు అమెరికా ఉగ్రవాదిగా గుర్తించిన సిరియా అధ్యక్షుడు అల్ బషర్‌తో భేటీ అయి అందర్నీ ఆశ్చర్యానికి గురిచేశారు. ఇటీవల అల్ బషర్‌ అమెరికాలో పర్యటించి, ట్రంప్‌తో చర్చలు జరిపారు. తాజాగా, F-35 యుద్ధ విమానాలను సౌదీ అరేబియాకు అమ్మడానికి ట్రంప్ సిద్ధమయ్యారు. ఇప్పటి వరకూ ఈ ఫైటర్ జెట్లు ఇజ్రాయెల్‌కు మాత్రమే సరఫరా చేసింది. వీటి ద్వారా గగనతలంపై ఇజ్రాయెల్ తిరుగులేని ఆధిపత్యాన్ని సాధించింది. కానీ, వీటిని సౌదీకి కానుకగా ఇవ్వడానికి ముందుకురావడం అంతర్జాతీయంగా తీవ్ర చర్చ మొదలైంది. ఇక్కడ ఆశ్చర్యకరమైన విషయం ఏంటంటే ఈ నిర్ణయంపై ఇజ్రాయెల్‌ ఇంతవరకు నోరువిప్పలేదు.

ఏడేళ్ల తర్వాత అమెరికా పర్యటనకు సౌదీ యువరాజు మహ్మద్‌ బిన్‌ సల్మాన్‌ వెళ్లనున్నారు. ఆయన పర్యటనకు ముందే F-35 యుద్ధ విమానాల అమ్మకాల ఒప్పందాన్ని ఆమోదిస్తానని ట్రంప్ ప్రకటించారు. వైట్‌హౌస్ వద్ద ఆయన మీడియాతో మాట్లాడుతూ... అమెరికాకు సౌదీ మంచి మిత్రదేశమని కొనియాడారు. స్వయంగా వ్యాపారవేత్త అయిన అమెరికా అధినేత ఈ నిర్ణయాన్ని అంత సులభంగా తీసుకోలేదు. ఇరాన్‌ అణు కేంద్రాలపై అమెరికా సైన్యం ఈ ఏడాది జరిపిన క్షిపణి దాడులకు సౌదీ అందించిన సహకారాన్ని ట్రంప్ ఈ సందర్భంగా ప్రస్తావించారు. అంటే, దీని వెనక ఆర్థిక ప్రయోజనాలతో పాటు రాజకీయపరమైన సహాకారం కూడా ఉన్నట్లు స్పష్టమవుతోంది.

ప్రపంచంలోనే అత్యంత అధునాతన యుద్ధ విమానంగా గుర్తింపు పొందిన ఎఫ్-35‌లో శత్రువుల రాడార్ల కంటబడకుండా తప్పించుకునే స్టెల్త్‌ టెక్నాలజీ ప్రత్యేకత. ఇజ్రాయెల్‌, సౌదీ మధ్య అధికారికంగా ఎటువంటి దౌత్య సంబంధాలు లేవు. ఈ క్రమంలో అత్యంత శక్తివంతమైన యుద్ధ విమానాన్ని సౌదీకి సరఫరా చేయడానికి అమెరికా ముందుకొస్తే ఇజ్రాయెల్‌ అభ్యంతరం చెప్పడం సర్వసాధారణం. ఇప్పటి వరకూ అగ్రరాజ్యం తన అధునాతన ఆయుధాలను కేవలం ఇజ్రాయెల్‌కు మాత్రమే సరఫరా చేస్తోంది. తద్వారా పశ్చిమాసియాలో ఇజ్రాయెల్ భద్రతపరంగా మెరుగైన స్థితిలో ఉండేది. అలాంటిది అమెరికా వైఖరి మారినా ఇజ్రాయెల్‌ మౌనంగా ఉండటం వెనుక పెద్ద వ్యూహం ఉన్నట్లు సమాచారం.

సౌదీ, ఇజ్రాయెల్ మధ్య సంబంధాలను బలోపేతం చయడానికి F-35 యుద్ధ విమానాలను ట్రంప్ ఒక సాధనంగా ఉపయోగించే ప్రయత్నం చేస్తున్నారనేది విశ్లేషకులు అభిప్రాయం. అయితే, ప్రస్తుతం ట్రంప్ దృష్టంతా ‘అబ్రహం అకార్డ్‌’ ఒప్పందం విస్తరణపైనే ఉంది. మొదటిసారి ట్రంప్ అధికారంలో ఉన్నప్పుడు కుదిరిన ఈ ఒప్పందం ద్వారా కొన్ని అరబ్ దేశాల (యూఏఈ, బహ్రెయిన్, మొరాకో, సూడాన్), ఇజ్రాయెల్ మధ్య దౌత్య సంబంధాలు ఏర్పడ్డాయి. కానీ, సౌదీ ఇందులో భాగస్వామి కాలేదు. మళ్లీ ట్రంప్ అధ్యక్షుడు కావడంతో ఈ ఒప్పందంలో సౌదీని కూడా చేర్చడం ప్రధాన లక్ష్యాల్లో ఒకటిగా మారింది. అన్నీ అనుకున్నట్టు జరిగితే నోబెల్ శాంతి బహుమతి కల కోసం దీనిని ట్రంప్ అస్త్రంగా వాడుకునే అవకాశం ఉంది.