బాబా సిద్ధిఖీ హత్య కేసు.. లారెన్స్ బిష్ణోయ్ సోదరుడ్ని బహిష్కరించిన అమెరికా

కరుడగట్టిన గ్యాంగ్‌స్టర్ లారెన్స్ బిష్ణోయ్ సోదరుడు అన్‌మోల్ బిష్ణోయ్‌ను అమెరికా మంగళవారం బహిష్కరించింది. గతేడాది ముంబయిలో జరిగిన మహారాష్ట్ర మాజీ మంత్రి, ఎన్సీపీ నేత బాబా సిద్దిఖీ హత్య కేసులో ప్రధాన నిందితుడిగా ఉన్న అన్‌మోల్.. భారత్‌కు మోస్ట్ వాంటెడ్ నేరస్థుల్లో ఒకరు. అతడికి అనేక తీవ్రమైన నేరాలతో సంబంధాలు ఉన్నాయి.. అన్‌మోల్‌ను తమ దేశం నుంచి బహిష్కరించినట్టు బాబా సిద్ధిఖీ తనయుడు జీషాన్ సిద్ధిఖీకి అమెరికా హోమ్‌ల్యాండ్ సెక్యూరిటీ ఓ మెయిల్ ద్వారా సమాచారం ఇచ్చింది. ‘అన్‌మోల్ బిష్ణోయ్‌ను 2025 నవంబరు 18న ఫెడరల్ ప్రభుత్వం అమెరికా నుంచి బహిష్కరించినట్టు మీకు మెయిల్ ద్వారా సమాచారం ఇస్తున్నాం’ అని అందులో పేర్కొంది.

బాబా సిద్ధిఖీ హత్య , 2022 మేలో పంజాబీ గాయకుడు సిద్ధూ మూసేవాలా హత్యతో పాటు గతేడాది ముంబయిలోని బాలీవుడ్ నటుడు సల్మాన్ ఖాన్ నివాసంపై కాల్పులు ఘటన తదితర నేరాల్లో అన్‌మోల్ కుట్రలు గుర్తించారు. అమెరికాలోని అక్రమంగా ప్రవేశించడంతో గతేడాది నవంబరు 1న అతడ్ని ట్రంప్ యంత్రాంగం అరెస్ట్ చేసింది. ఎన్సీపీ నేత బాబా సిద్ధిఖీ హత్య కేసులోమహారాష్ట్ర కోర్టు నాన్-బెయిలబుల్ వారెంట్, ఇంటర్‌పోల్ రెడ్ కార్నర్ నోటీసులు జారీచేయడంతో అతడ్ని భారత్‌కు రప్పించేందుకు అధికారులు ప్రయత్నాలు ప్రారంభించారు.

మోస్ట్ వాంటెడ్ క్రిమినల్ అమెరికాలో ఆశ్రయం కోసం దరఖాస్తు చేసుకున్నందున అప్పట్లో భారత ప్రభుత్వం అన్‌మోల్‌ను అప్పగిస్తారని ఊహించలేదని వర్గాలు తెలిపాయి. అతడ్ని జాతీయ దర్యాప్తు సంస్థ మోస్ట్ వాంటెడ్ జాబితాలో చేర్చి, రూ. 10 లక్షల రివార్డు ప్రకటించడంతో వార్తల్లో నిలిచాడు.గ్యాంగ్‌స్టర్ లారెన్స్ బిష్ణోయ్ సోదరుడిపై అక్రమ ఆయుధాలు, రవాణాకు సహకరించడం, మూసేవాలా హత్య సహా మొత్తం 18 కేసులు ఉన్నాయి. ఇక, పంజాబీ గాయకుడు సిద్ధూ మూసేవాలా హత్య వెనుక లారెన్స్ స్నేహితుడు గోల్డీ బ్రార్ పాత్ర కూడా వెలుగులోకి వచ్చింది.

ఈ ఏడాది జూన్‌లో అన్మోల్ బిష్ణోయ్ అరెస్టుతో మాఫియా డాన్‌లుగా మారిన యూనివర్సిటీ స్నేహితులైన గోల్డీ బ్రార్, లారెన్స్ విడిపోయారు. దోపిడీ, హత్య, డ్రగ్స్, ఆయుధ అక్రమ రవాణా, ఇతర చట్ట వ్యతిరేక వ్యాపారాలు, అంతర్జాతీయ స్థాయి నేరాల్లో ఆరితేరిన ఈ ఇద్దరి మధ్య కొద్ది రోజులుగా విబేధాలు తలెత్తాయి. బ్రార్, మరొక గ్యాంగ్‌స్టర్ రోహిత్ గొడారా తన సోదరుడికి బెయిల్ పొందడానికి సహాయం చేయలేదని లారెన్స్ బిష్ణోయ్ భావించడమే దీనికి కారణమని వర్గాలు తెలిపాయి. గత కొన్నేళ్లుగా లారెన్స్ బిష్ణోయ్ జైల్లోనే ఉన్నా.. అక్కడ నుంచి కూడా నేర సామ్రాజ్యాన్ని నడుపుతుండటంతో అధికారులు షాకవుతున్నారు.