నేపాల్ కచేరీలో భారత జెండాను ప్రదర్శించిన పాక్ రాపర్ తల్హా అంజుమ్

సంగీతానికి సరిహద్దులు లేవని పాకిస్థానీ హిప్-హాప్ రాపర్ తల్హా అంజుమ్ మరోసారి నిరూపించారు. నేపాల్‌లో జరిగిన ఆయన కచేరీలో ఒక అభిమాని (భారతీయుడు) అందించిన భారత జాతీయ పతాకాన్ని తల్హా అత్యంత గౌరవంగా స్వీకరించారు. ఆపై దానిని గాల్లో ఊపుతూ.. తన భుజాలపై ధరించారు. ఈ సంఘటన తక్షణమే ప్రపంచవ్యాప్తంగా సంచలనం సృష్టించింది. తల్హా చేసిన ఈ పని మానవత్వం, శాంతి, సౌభ్రాతృత్వాన్ని పెంపొందిస్తుందంటూ ఒక వర్గం నెటిజన్లు ప్రశంసించగా.. ప్రధానంగా పాకిస్థాన్ నుంచి వచ్చిన కొంతమంది నెటిజన్లు మాత్రం ఆయనపై తీవ్ర విమర్శలు, ట్రోలింగ్‌కు దిగారు.

రాపర్ టార్గెట్‌గా ఆన్‌లైన్ ట్రోలింగ్..

భారత జెండాను భుజాన పెట్టుకున్న తల్హా అంజుమ్ వీడియో నెట్టింట క్షణాల్లోనే వైరల్ అయింది. పాకిస్థాన్‌కు చెందిన కొందరు నెటిజన్లు రాపర్‌ను "సరిహద్దులు దాటారని" విమర్శించారు. ఒక నెటిజన్ అయితే డబ్బులు అన్నింటినీ శాసిస్తాయి. బాగా డబ్బు చెల్లిస్తే మోదీ బూట్లు కూడా నాకుతారు అంటూ ఘాటైన వ్యాఖ్య చేశారు. మరొకరు అభ్యంతరకరమైన పదజాలంతో ఆయనను దూషించారు. దేశభక్తి పేరుతో కొందరు నెటిజన్లు ఈ కళాకారుడిపై వ్యక్తిగత దాడులకు దిగారు.

విమర్శలకు స్టైలిష్ సమాధానం..

తనపై జరుగుతున్న ఆన్‌లైన్ దాడిని గమనించిన తల్హా అంజుమ్.. విమర్శకులకు దీటుగా సమాధానం ఇచ్చారు. ఆయన తన ఆలోచనలను ఎక్స్ వేదికగా పంచుకున్నారు. ‘‘నా హృదయంలో ద్వేషానికి చోటు లేదు.. కళకు సరిహద్దులు లేవు. భారత జెండాను నేను ఎగరేయడం వివాదమైతే అలాగే ఉండనివ్వండి. నేను మళ్లీ అలాగే చేస్తాను’’ అని తల్హా స్పష్టం చేశారు. మీడియా, యుద్ధాన్ని కోరుకునే ప్రభుత్వాలు, వాటి ప్రచారాల గురించి తాను ఎప్పుడూ పట్టించుకోనని తల్హా తెలిపారు. ఉర్దూ రాప్ ఎప్పుడూ సరిహద్దులు లేనిదే అని ఘాటుగా బదులిచ్చారు. సంగీతం, కళ ద్వారా భారత్-పాక్ ప్రజల మధ్య స్నేహాన్ని బలోపేతం చేయాలనేదే తన ఉద్దేశమని ఆయన వెల్లడించారు.

తల్హా అంజుమ్ నేపథ్యమిదీ..!

కరాచీలో పుట్టి పెరిగిన తల్హా అంజుమ్.. పాకిస్థాన్‌లో అత్యంత ప్రముఖ హిప్-హాప్ కళాకారులలో ఒకరు. 2012లో తల్హా యూనుస్‌తో కలిసి 'యంగ్ స్టన్నర్స్' అనే ఉర్దూ రాప్ ద్వయాన్ని స్థాపించారు. వారి పాట 'బర్గ్-ఎ-కరాచీ'తో వీరు బాగా ప్రాచుర్యం పొందారు. దక్షిణాసియా రాప్ సర్కిల్స్‌లో తల్హా అంజుమ్ సుపరిచితమైన వ్యక్తి. ఇంతటి పేరున్న ఓ పాకిస్థానీ రాపర్.. భారత జెండాను ప్రదర్శించడంతో ఈ గొడవ మొదలైంది.