రష్యా-ఉక్రెయిన్ యుద్ధనికి ముగింపు పలికేదిశగా అమెరికా ప్రయత్నాలు

సుమారు నాలుగేళ్లుగా కొనసాగుతున్న రష్యా-ఉక్రెయిన్ యుద్ధానికి ముగింపు పలికే దిశగా అమెరికా కీలక అడుగు వేసింది. ఈ మేరకు 28 అంశాలతో కూడిన ఒక ముసాయిదా శాంతి ప్రణాళికను ఉక్రెయిన్ అధ్యక్షుడు జెలెన్‌స్కీకి అధికారికంగా అందజేసింది. అయితే, ఈ ప్రణాళిక రూపకల్పనలో ఉక్రెయిన్‌ను భాగస్వామిని చేయకపోవడంపై కీవ్‌తో పాటు ఐరోపా దేశాల్లోనూ ఆందోళన వ్యక్తమవుతోంది. జెలెన్‌స్కీ ఈ ప్రతిపాదనను ఇంకా అంగీకరించలేదు, తిరస్కరించనూ లేదు.ఈ పత్రంలోని వివరాల ప్రకారం అమెరికా నుంచి భద్రతా హామీలు పొందాలంటే తూర్పున ఉన్న డాన్‌బాస్ ప్రాంతాన్ని రష్యాకు వదిలేయడంతో పాటు, సైన్యం పరిమాణాన్ని కూడా తగ్గించుకోవాల్సి ఉంటుందని తెలుస్తోంది. అయితే, ఈ ఒప్పందంలో కేవలం ఉక్రెయిన్ మాత్రమే కాకుండా మాస్కో కూడా కొన్ని రాజీలకు రావాల్సి ఉంటుందని అమెరికా అధికారులు స్పష్టం చేస్తున్నారు.గురువారం కీవ్‌లో అమెరికా సైనిక ప్రతినిధులతో సమావేశమైన జెలెన్‌స్కీ ఈ ప్రతిపాదనపై వాషింగ్టన్‌తో ‘నిర్మాణాత్మకమైన, నిజాయతీతో కూడిన వేగవంతమైన చర్చలకు’ సిద్ధంగా ఉన్నానని తెలిపారు. ప్రణాళిక అందిన మాట వాస్తవమేనని ఆయన కార్యాలయం ధ్రువీకరించింది. రానున్న రోజుల్లో జెలెన్‌స్కీ, అమెరికా అధ్యక్షుడు డొనాల్డ్ ట్రంప్‌తో మాట్లాడనుండగా, ఈ సంభాషణ అత్యంత కీలకం కానుంది.అమెరికా ప్రణాళికపై ఐరోపా దేశాలు తీవ్ర ఆందోళన వ్యక్తం చేశాయి. రష్యా నుంచి స్పష్టమైన హామీలు లేకుండా ఉక్రెయిన్‌పై భారీ రాయితీల కోసం ఒత్తిడి తేవడంపై అసంతృప్తిగా ఉన్నాయి. ‘శాంతి అంటే లొంగిపోవడం కాదు’ అని ఫ్రాన్స్ విదేశాంగ మంత్రి జీన్-నోయెల్ బారోట్ స్పష్టం చేశారు.