హిడ్మా ఎన్‌కౌంటర్ తర్వాత ఏపీలో హై అలర్ట్.. సచివాలయం ఫోర్ట్‌నెస్‌లా మారింది!

ఆంధ్రప్రదేశ్‌లో మావోయిస్టు అగ్రనేత మడ్కం హిడ్మా ఎన్‌కౌంటర్‌తో పాటు మరో 51 మంది మావోయిస్టుల అరెస్టు రాష్ట్ర భద్రతా వ్యవస్థను అత్యంత అప్రమత్తం చేసింది. ఈ ఘటన తర్వాత మిగతా మావోయిస్టు కేడర్ ప్రతీకార చర్యలకు పాల్పడే అవకాశం ఉందనే అంచనాతో పోలీసు యంత్రాంగం రాష్ట్రవ్యాప్తంగా హై అలర్ట్ ప్రకటించింది. ముఖ్యంగా రాజధాని ప్రాంతంలో భద్రతను బలోపేతం చేస్తూ ప్రతి చోట కట్టుదిట్టమైన చెక్‌పోస్టులు ఏర్పాటు చేశారు.
అమరావతి పరిధిలోని వెలగపూడి సచివాలయం వద్ద భద్రత ఇప్పుడు ఎప్పటికీ లేనంతగా కఠినతరం అయింది. సచివాలయానికి వెళ్లే ప్రతి వాహనాన్ని లోపలి వరకు తనిఖీ చేస్తున్నారు. బాగ్ స్కానింగ్, అండర్ బెల్లీ చెక్, డాగ్ స్క్వాడ్‌తో పాటు బాంబ్ డిటెక్షన్ బృందాలు నిరంతరం అందుబాటులో ఉంటున్నాయి. సాధారణ రోజుల్లో కొద్దిసేపట్లో లోపలికి వెళ్లే వాహనాలు ఇప్పుడు 15–20 నిమిషాల పాటు తనిఖీల్లో ఆగాల్సి వస్తోంది.
సచివాలయ ఉద్యోగులు, అధికారులు కూడా గుర్తింపు కార్డు లేకుండా లోపలికి అడుగుపెట్టే అవకాశం లేదు. ఐడీ కార్డుతో పాటు ముఖ గుర్తింపు, బయోమెట్రిక్ వేరిఫికేషన్‌ను తప్పనిసరి చేశారు. బయటి నుంచి వచ్చే సందర్శకులు, మీడియా ప్రతినిధులకు ముందస్తు అనుమతి తప్పనిసరి చేస్తూ ఎంట్రీ పాస్‌లు జారీ చేస్తున్నారు. గతంలో ఎప్పుడూ లేని విధంగా సచివాలయం ఇప్పుడు దాదాపు ఫోర్ట్‌నెస్‌లా కనిపిస్తోంది.
విజయవాడ నగరం మరియు పరిసర ప్రాంతాల్లో ఇంకా కొందరు మావోయిస్టులు దాక్కుని ఉండొచ్చనే ఇంటెలిజెన్స్ సమాచారం ఆధారంగా పోలీసులు రాత్రింబవళ్లు అప్రమత్తంగా ఉన్నారు. గ్రే హౌండ్స్, ఆక్టోపస్, ఏపీ ఎస్పీజీ బలగాలను అందుబాటులో ఉంచుతూ నగరంలో భారీ బందోబస్తు ఏర్పాటు చేశారు. ఈ నేపథ్యంలో రాష్ట్ర ప్రభుత్వ ప్రధాన కార్యాలయం ఎటువంటి ఆందోళనకర ఘటన జరగకుండా గట్టి భద్రతా ఉక్కును అమలు చేస్తోంది.