జొమాటో, స్విగ్గీకి పోటీగా.. ఫుడ్ డెలివరీలోకి మ్యాజిక్‌పిన్-రాపిడో

దేశంలో ప్రస్తుతం ఆన్‌లైన్ ఫుడ్ డెలివరీ లో జొమాటో, స్విగ్గీలదే ఆధిపత్యం. ఈ రెండు సంస్థల్లోనే నిత్యం లక్షల మంది ఫుడ్ ఆర్డర్ చేస్తుంటారు. అయితే, ఈ ఆధిపత్యాన్ని అధిగమించేందుకు మరో సంస్థ రానుంది. అందుకోసం మ్యాజిక్ పిన్, రాపిడో సంస్థలు జట్టు కట్టాయి. మూడో అతిపెద్ద ఫుడ్ డెలివరీ యాప్ అయిన మ్యాజిక్ పిన్ తన రెస్టారెంట్ నెట్‌వర్క్‌ను రాపిడో కు చెందిన ఓన్‌లీ ప్లాట్ ఫాంతో అనుసంధానం చేయనున్నట్లు తెలుస్తోంది. ఫుడ్ డెలివరీలో జొమాటో, స్విగ్గీల ఆధిపత్యం తగ్గించడమే లక్ష్యంగా ఈ భాగస్వామ్యం ఏర్పడినట్లు తెలుస్తోంది.

ఆగస్టు నెలలోనే బెంగళూరు కేంద్రంగా ప్రారంభమైన ఓన్‌లీ ఇతర నగరాలకు విస్తరించే ప్రయత్నాలు మొదలు పెట్టింది. ఇందులో భాగంగానే ఈ రెండు సంస్థల మధ్య ఒప్పందం కుదిరినట్లు సమాచారం. ఆన్‌బోర్డింగ్ పూర్తయ్యే నాటికి దేశవ్యాప్తంగా 80 వేల కంటే ఎక్కువ రెస్టారెంట్లను రాపిడో ఓన్‌లీ యాక్సెస్ చేసుకోవాలనే ప్రణాళికలో ఉందట. మరోవైపు కొన్ని ప్రాంతాల్లో రాపిడో డెలివరీ ఫ్లీట్‌ను వినియోగించుకునే అవకాశం మ్యాజిక్ పిన్‌కు లభించనుంది.

'మర్చంట్ టీమ్ ద్వారా రెస్టారెంట్లను నేరుగా ఆన్ బోర్డ్ చేసుకోవడమే రాబిడో ప్రధాన విధానం. కొన్ని సిటీల్లో మ్యాజిక్ పిన్ తో లాజిస్టిక్స్ పార్ట్నర్లుగా సైతం కలిసి పని చేయనున్నాం. మా కెప్టెన్ ఫ్లీట్ చివరి దశ డెలివరీలను నిర్వహించనుంది. వ్యాపారుల కోసం నమ్మకంగా, చవకైన, డెలివరీ పరిష్కారాలను అందిచాలనేదే మా లక్ష్యం' అని రాపిడో అధికార ప్రతినిధి ఈ-మెయిల్ ద్వారా వెల్లడించారు. అయితే, మ్యాజిక్ పిన్ నుంచి ఎలాంటి స్పందన రాలేదని ఓ జాతీయ మీడియా పేర్కొంది.

మ్యాజిక్ పిన్, రాపిడో కలయికతో ఈ రంగంలో కొంత చలనం తెచ్చే అవకాశం ఉన్నా ఫుడ్ డెలివరీలో నెగ్గడం అంత ఈజీ కాదని నిపుణులు అభిప్రాయపడుతున్నారు.రైడర్ల పారితోషికాలు, డెలివరీ ఖర్చులు, కస్టమర్లకు ఆఫర్ల మధ్య బ్యాలెన్స్ చేసుకోవడం వంటివి ఉంటాయి. బ్రాండ్లు, రెస్టారెంట్లతో సంబంధాల బలోపేతం సైతం ఒక సవాలేనని అంటున్నారు. అన్నింటికన్నా వినియోగదారుల విశ్వాసాన్ని గెలుచుకోవడం అనేది పెద్ద పరీక్షగా చెబుతున్నారు. ఏళ్ల తరబడి విశ్వసనీయత, వేగం ఆధారంగా జొమాటో, స్విగ్గీలు ఈ రంగంలో బలమైన పునాదులు వేసుకున్నాయని అంటున్నారు.