15350 శాతం పెరిగిన స్టాక్,,లక్ష పెడితే 5 ఏళ్లలో1.53 కోట్లు

స్మాల్ క్యాప్ కేటగిరీలోని దిగ్గజ కంపెనీల్లో ఒకటైన హజూర్ మల్టీ ప్రాజెక్ట్స్ లిమిటెడ్ స్టాక్ అదరగొట్టింది. తమ ఇన్వెస్టర్లను కోటీశ్వరులను చేసింది. నవంబర్ 29వ తేదీన చేసిన ప్రకటనతో సోమవారం నాటి ట్రేడింగ్‌లో ఫోకస్‌లో ఉండనుంది. వారెంట్ల మార్పిడి కారణంగా ఈక్విటీ షేర్లను కేటాయిస్తామని ప్రకటించడంతో ఈ స్టాక్ ఫోకస్‌లోకి వచ్చింది. ఈ మేరకు స్టాక్ ఎక్స్చేంజీలకు వివరాలు అందించింది. రూ.1 ముఖ విలువ కలిగిన 13,20,000 ఈక్విటీ షేర్లను రూ.30 ఇష్యూ ధరతో కేటాయిస్తామని తెలిపింది. రూ.300 ఇష్యూ ధరతో జారీ చేసిన 1,32,000 వారెంట్ల స్థానంలో షేర్లను కేటాయిస్తామని పేర్కొంది.

ఎక్స్చేంజ్ ఫైలింగ్ ప్రకారం ఈ ఈక్విటీ షేర్ల కేటాయింపునకు సీబర్డ్ లీజింగ్ అండ్ ఫిన్‌సర్వ్ ప్రైవేట్ లిమిటెడ్, దేశాయ్ హెమంత్ కుమార్ అలాటీలుగా ఉండనున్నారు. సెబీ రెగ్యులేషన్స్ 2018 ప్రకారం ఈ వారెంట్లను నాన్ ప్రమోటర్లు, పబ్లిక్ కేటగిరీకి కేటాయించినట్లు తెలిపింది. రూ.300ల ఇష్యూ ధరతో ఒక వారేంటును రూ.75 చెల్లించిన వారికి కేటాయించినట్లు పేర్కొంది. ఇప్పుడు ఆ వారెంట్ల స్థానంలో ఈక్వీటీ షేర్లను కేటాయిస్తామని పేర్కొంది. వారెంట్లు అలాట్ చేసిన 18 నెలల్లోనే రూ.225 కంపెనీ చెల్లించినట్లు పేర్కొంది. కంపెనీ పెయిడప్ క్యాపిటల్ రూ.23,56,59,910గా ఉన్నట్లు తెలిపింది.

హజూర్ మల్టీ ప్రాజెక్ట్స్ లిమిటెడ్ షేరు పని తీరు పరిశీలిస్తే స్టాక్ మార్కెట్ చివరి ట్రేడింగ్ సెషన్‌లో 1 శాతం మేర లాభ పడి రూ.37.15 వద్ద ముగిసింది. గత 5 ట్రేడింగ్ సెషన్లలోనే ఈ స్టాక్ 17.68 శాతం లాభాలు అందించింది. అయితే, గత ఏడాది కాలంలో స్టాక్ ట్రెండ్ చూసుకుంటే ఒత్తిడికి గురైంది. గత ఆరు నెలల్లో 14.42 శాతం, ఏడాదిలో 30.40 శాతం నష్టపోయింది. కానీ, దీర్ఘకాలంలో చూసుకుంటే తమ ఇన్వస్టర్లపై కాసుల వర్షం కురిపించింది. గత 5 సంవత్సరాల కాలం లో ఈ స్టాక్ 15,350 శాతం మేర పెరిగింది. లక్ష రూపాయల పెట్టుబడిని ఏకంగా రూ.1.53 కోట్లు చేసి ఔరా అనిపించింది. ఇక ఈ స్టాక్ లిస్టింగ్ అయిన 2002 నుంచి చూసుకుంటే 1236.33 శాతం మేర పెరిగింది.

ఈ కథనం సమాచారం అందించడానికి మాత్రమే. గతంలో వచ్చిన రిటర్న్స్ భవిష్యత్తులో వస్తాయని చెప్పలేం. స్టాక్ మార్కెట్లో తీవ్ర ఒడుదొడుకులు ఉంటాయి. సరైన అవగాహన లేకుండా ఇన్వెస్ట్ చేస్తే మొత్తం కొల్పోయే ప్రమాదం ఉంటుంది. నిపుణుల సలహాలు తీసుకుని సరైన స్టాక్ ఎంచుకోగలిగితే లాభాలు అందుకోవచ్చు.