రూ.30 లక్షల జీతం వదిలేసి.. దేశాలు చుట్టి వస్తున్న మహిళ

సాఫ్ట్‌వేర్ డెవలపర్‌గా ఒక 10 ఏళ్లకు పైగా ఒరాకిల్‌ కంపెనీలో పనిచేసిన వనతి ఎస్, తన జీవితంలోనే అతిపెద్ద నిర్ణయం తీసుకున్నారు. ' ది అన్‌టోల్డ్ ట్రైల్స్ ' పేరుతో కంటెంట్ క్రియేటర్‌గా తన కెరీర్‌ను ప్రారంభించారు. ఈ మహిళ తాను సంవత్సరానికి రూ. 30 లక్షల జీతం వచ్చే తన సాఫ్ట్‌వేర్ ఉద్యోగాన్ని వదిలేసి.. ట్రావెలింగ్‌పై తనకు ఉన్న ఇష్టాన్ని వెల్లడించారు. తన ప్రొఫెషనల్ లక్ష్యాలను సాధించేందుకు.. ఒక దశాబ్దానికి పైగా సాఫ్ట్‌వేర్ ఇంజినీర్‌గా పనిచేసినప్పటికీ.. గ్రాడ్యుయేషన్, మంచి ఉద్యోగం, పెళ్లి, తల్లిదండ్రుల సంరక్షణ, డబ్బు ఆదా, ఇల్లు కట్టుకోవడం వంటి జీవితంలో సాధారణంగా పూర్తి చేయాల్సిన అన్ని బాధ్యతలను నెరవేర్చినట్లు ఆమె తెలిపారు.

అయితే.. ఆ క్రమంలోనే ఇతరులు తన నుంచి కోరుకున్న జీవితాన్ని మాత్రమే గడుపుతున్నానని.. తనకు ఇష్టమైన, ఆనందాన్ని ఇచ్చే జీవితాన్ని కాదని గ్రహించి.. ఈ నిర్ణయం తీసుకున్నట్లు వనతి తెలిపారు. ప్రత్యేకమైన ట్రావెల్ కంటెంట్, అడ్వెంచరస్ హైకింగ్‌లు, ట్రెక్కింగ్‌లు, మహిళలు ఒంటరిగా ప్రయాణించే తన ఫాలోవర్లకు స్ఫూర్తినిచ్చే వనతి.. తన కలను అనుసరించే మార్గంలో అనేక సవాళ్లు ఉన్నాయని వనతి అంగీకరించారు. ఈ మార్గం చాలా కష్టమని.. అది భయంకరమే అయినప్పటికీ.. భవిష్యత్తు ఎలా ఉంటుందో తనకు తెలియదని పేర్కొన్నారు.

కానీ మరో 5 ఏళ్లలో తాను మళ్లీ ఉద్యోగం సాధించగలనని తనకు తెలుసని తెలిపారు. ఒరాకిల్‌లో పనిచేస్తున్నప్పుడు.. వీకెండ్స్‌లో ప్రయాణాలు, ట్రెక్కింగ్‌లు చేస్తూ మిగిలిన వారం రోజులు 9-5 ఉద్యోగాన్ని బ్యాలెన్స్ చేయడానికి ప్రయత్నించానని వనతి వివరించారు. కానీ క్రమ క్రమంగా కార్పొరేట్ ఉద్యోగంపై తనకు ఆసక్తి తగ్గిందని.. అవే మీటింగ్‌లు, స్ర్పింట్‌లు, కోడ్‌లు.. ఇదంతా తప్పించుకోలేని ఒక పంజరంలా అనిపించిందని తెలిపారు.

తాను కోల్పోలేనిది ఈ క్షణమని.. శక్తి, యవ్వనం, ప్రపంచాన్ని అన్వేషించాలనే కోరికతో ఈ నిర్ణయం తీసుకున్నట్లు వనతి వెల్లడించారు. దానికి సరైన సమయం కోసం ఎదురుచూడటం మానేసి.. తన జీవితంలో అత్యంత కష్టమైన, సంతృప్తినిచ్చే నిర్ణయం తీసుకున్నట్లు తెలిపారు. ఇక వనతి తీసుకున్న నిర్ణయాన్ని నెటిజన్లు ఎంతగానో ప్రశంసించారు.

ట్రావెల్ వ్లాగర్ సంధ్యా మజ్జి లాంటి వారు కూడా కార్పొరేట్ ఉద్యోగాన్ని కోల్పోవడం మిస్ అయినప్పటికీ.. ఉద్యోగం వదిలేసిన తర్వాత.. ఇది తన జీవితంలో తీసుకున్న ఉత్తమ నిర్ణయమని కామెంట్ చేశారు. లింక్డ్‌ ఇన్ ప్రొఫైల్ ప్రకారం ఒరాకిల్‌లో ప్రిన్సిపల్ మెంబర్ ఆఫ్ టెక్నికల్ స్టాఫ్‌గా పనిచేసిన వనతి.. ప్రస్తుతం టెడ్ఎక్స్ స్పీకర్‌గా.. తన కలలను అనుసరించడానికి.. సామాజిక కట్టుబాట్లను ఎలా అధిగమించాలనే దానిపై స్టోరీలను పంచుకుంటూ స్ఫూర్తినిస్తున్నారు.