అమెరికాలో భారత సంతతి మిలియనీర్ అరెస్ట్

అమెరికాలోని కాలిఫోర్నియాలో భారత సంతతికి చెందిన మిలియనీర్, ప్రముఖ వ్యాపారవేత్త , 42 ఏళ్ల విక్రమ్ బెరి పోలీసులకు చిక్కాడు. సారాటోగాలో ఉన్న ఒక వైన్ తయారీ కేంద్రాన్ని తగులబెట్టేందుకు ప్రయత్నించడంతో పాటు అక్కడ పార్క్ చేసి ఉన్న కార్లను ఢీకొట్టిన ఆరోపణలపై అధికారులు అతడిని అదుపులోకి తీసుకున్నారు. ఈ ఘటన అమెరికన్ బిజినెస్ సర్కిల్స్‌లో సంచలనం సృష్టించింది.

అసలేం జరిగిందంటే?

డిసెంబరు 8వ తేదీన విక్రమ్ బెరి.. సారాటోగాలోని వైన్ తయారీ కేంద్రానికి నిప్పు పెట్టేందుకు ప్రయత్నించాడు. అక్కడి సిబ్బంది వెంటనే అతడిని అడ్డుకునేందుకు ప్రయత్నించగా.. విక్రమ్ వారిపైకి వైన్ బాటిల్‌ను విసిరాడు. దీంతో పరిస్థితి ఉద్రిక్తంగా మారింది. అనంతరం అక్కడి నుంచి పారిపోయే క్రమంలో విక్రమ్ తన టెస్లా కారుతో పక్కన పార్క్ చేసి ఉన్న మరో రెండు కార్లను బలంగా ఢీకొట్టాడు. ఆపై కారులోని కూర్చుని లాక్ చేసుకున్నాడు. దీంతో సిబ్బంది పోలీసులకు ఫిర్యాదు చేశారు. రంగంలోకి దిగిన పోలీసులు.. సంఘటనా స్థలానికి చేరుకుని విక్రమ్‌ను అరెస్ట్ చేసే ప్రయత్నం చేశారు.

అరెస్ట్ చేసేందుకు వెళ్తే కారులో లాక్ చేసుకుని..

కానీ అప్పటికే కారులోకి చేరి తనను తాను లాక్ చేసుకున్న విక్రమ్ బయటకు వచ్చేందుకు నిరాకరించాడు. దీంతో పోలీసులు చివరకు పెప్పర్‌బాల్‌ స్ప్రేలను ఉపయోగించి అతడిని అదుపులోకి తీసుకున్నారు. తక్షణ వైద్య సహాయం కోసం అతడిని ఆస్పత్రికి తరలించారు. అధికారులు తెలిపిన వివరాల ప్రకారం.. విక్రమ్‌పై మారణాయుధంతో దాడి చేశాడనే అభియోగాల కింద కేసు నమోదు చేసి కౌంటీ ఆఫ్ శాంటా క్లారా ప్రధాన జైలుకు పంపారు. ఈ ఘటనపై సమగ్ర దర్యాప్తు కొనసాగుతోంది. విక్రమ్ బెరి ఈ చర్యకు పాల్పడటానికి గల కారణాలపై స్పష్టత రావాల్సి ఉంది.

విక్రమ్ బెరి బెటర్‌లైఫ్ వెల్‌నెస్ అనే ఆన్‌లైన్ మానసిక ఆరోగ్య కౌన్సిలింగ్ సంస్థ వ్యవస్థాపకుడు. 2016లో ఆయన ఈ కంపెనీని ప్రారంభించాడు. అయితే ఇతడు యూనివర్సిటీ ఆఫ్ ఇల్లినాయిస్ అర్బానా-ఛాంపైన్ నుంచి మెకానికల్ ఇంజినీరింగ్‌లో డిగ్రీ పూర్తి చేశారు. ఇండియన్ స్కూల్ ఆఫ్ బిజినెస్ నుంచి మార్కెటింగ్, స్ట్రాటజీలో ఎంబీఏ చదివారు. డెలాయిట్ కన్సల్టింగ్, మ్యానుఫ్యాక్చరింగ్ రంగంలో పని చేసిన అనుభవం కూడా ఉంది. 2011 నుంచి ఫీల్డ్‌కింగ్ కంపెనీలో బిజినెస్ డెవలప్‌మెంట్ ఎగ్జిక్యూటివ్ డైరెక్టర్‌గా చేరి.. ప్రస్తుతం ఆ సంస్థకు ప్రెసిడెంట్‌గా కొనసాగుతున్నారు.