బురఖా వేసుకోలేదని భార్య, ఇద్దరు కుమార్తెలను చంపేసిన కిరాతకుడు

ఉత్తర ప్రదేశ్‌లో అమానవీయ ఘటన వెలుగుచూసింది. కేవలం బురఖా వేసుకోలేదన్న కోపంతో ఓ వ్యక్తి తన కుటుంబాన్నే కడతేర్చాడు. ముఖ్యంగా విపరీతమైన కోపంతో భార్యను, ఆమెకు తోడుగా ఉన్నారని ఇద్దరు అభంశుభం తెలియని కుమార్తెలను దారుణంగా హత్య చేసి.. ఎవరికీ అనుమానం రాకుండా తన ఇంట్లోనే పాతిపెట్టిన ఉదంతం స్థానికంగా పెను సంచలనం సృష్టిస్తోంది.

అసలేం జరిగిందంటే?

ఉత్తర ప్రదేశ్‌లోని శామ్లీ జిల్లాకు చెందిన ఫరూక్‌కు 35 ఏళ్ల భార్య తాహిరా, ఇద్దరు కుమార్తెలు షరీన్ (14), ఆఫ్రీన్ (6)లు ఉన్నారు. అయితే గత వారం రోజులుగా వీరు ముగ్గురూ కనిపించకుండా పోయారు. దీనిపై గ్రామ సర్పంచ్ పోలీసులకు సమాచారం అందించడంతో విచారణ ప్రారంభం అయింది. ఫరూక్ ప్రవర్తనపై అనుమానం వచ్చిన పోలీసులు అతడిని అదుపులోకి తీసుకుని తమదైన శైలిలో విచారించగా.. అసలు నిజం బయటపడింది. తన భార్య, పిల్లలను తానే చంపి ఇంట్లో గోతి తీసి పూడ్చి పెట్టినట్లు నిందితుడు అంగీకరించాడు.

బురఖా వివాదమే హత్యకు దారి తీసిందా?

పోలీసుల దర్యాప్తులో విస్తుపోయే విషయాలు వెలుగులోకి వచ్చాయి. నెల రోజుల క్రితం భార్యాభర్తల మధ్య డబ్బు విషయంలో గొడవ జరిగింది. ఆ సమయంలో తాహిరా కోపంతో బురఖా ధరించకుండానే తన పుట్టింటికి వెళ్లిపోయింది. బహిరంగంగా బురఖా లేకుండా వెళ్లడం వల్ల తన పరువు పోయిందని భావించిన ఫరూక్.. దీనిని తీవ్ర అవమానంగా భావించాడు. అప్పటి నుంచి మనసులోని కోపం దాచుకున్న అతడు.. నెల రోజుల తర్వాత భార్యను తిరిగి ఇంటికి తీసుకువచ్చాడు. మంగళవారం రాత్రి గొడవ పడి.. తన వద్ద ఉన్న పిస్టల్‌తో భార్యను, ఇద్దరు కుమార్తెలను కాల్చి చంపాడు. అనంతరం ఎవరికీ తెలియకుండా ఇంటి లోపలే గొయ్యి తీసి వారి మృతదేహాలను పాతిపెట్టాడు.

శామ్లీ ఎస్పీ ఎన్‌పి సింగ్ నేతృత్వంలోని పోలీసు బృందం ఘటనా స్థలానికి చేరుకుని.. నిందితుడు చూపించిన చోట మృతదేహాలను వెలికితీశారు. హత్యకు ఉపయోగించిన పిస్టల్‌తో పాటు బుల్లెట్లను కూడా స్వాధీనం చేసుకున్నారు. ప్రస్తుతం నిందితుడు ఫరూక్ పోలీసుల కస్టడీలో ఉన్నాడు. మృతదేహాలను పోస్ట్‌మార్టం నిమిత్తం ఆసుపత్రికి తరలించారు. ఈ ట్రిపుల్ మర్డర్ కేసును గృహహింస, పరువు హత్య కోణంలో విచారిస్తున్నట్లు అధికారులు వెల్లడించారు. స్వల్ప కారణానికే కన్న బిడ్డలను సైతం చూడకుండా చంపేసిన ఈ కిరాతకుడిపై కఠిన చర్యలు తీసుకోవాలని గ్రామస్థులు డిమాండ్ చేస్తున్నారు.